Ezekiyɛl 39 - WẼNNAAM SEBRE 2014

Koɛɛg Goog yĩng yɛsa

¹ Foom a ninsaala, togs pĩnd-n-bãngr goam Goog wɛɛngẽ n yeel tɩ maam a Zu-soab a Sẽn-Ka-Saab yetame: «Googe, mam zabda ne foom, fo sẽn yaa Roos ne Mesɛk la Tuball tẽmsã naabã!

² Mam na n talla foom ne pãnga, la m peeg foom n yiis nug-rɩtg sẽnẽ zĩ-zãrsẽ wã, n wa ne-f Israyɛll tãmsã zutu.

³ Mam na n penga f tãpã sẽn be f goabg nugẽ wã tɩ lʋɩ, la m kɩt tɩ pɛɛmã sẽn be f rɩtg nugẽ wã lʋɩ tẽnga.

⁴ Foom ne f tãb-bi-sulã fãa, ne neb nins sẽn be ne foomã na n lʋɩɩ Israyɛll tãmsã zutu. Mam na n basame tɩ y lebg yɩbrend ne bõn-yɩgdɩ buud fãa, la we-rũms buud toor-toor dɩɩbo.

⁵ Fo na n kii weoogã pʋga. Bala, yaa maam n gome. Maam a Zu-soab a Sẽn-Ka-Saab n yeele.

⁶ Mam na n kɩtame tɩ bugum sig Magoog tẽngã zugu, ne neb nins sẽn zĩ ne bãan tẽms nins sẽn be koom sʋkã sʋka. Woto, bãmb na n bãngame tɩ mam yaa Sẽn-Ka-Saabo.

⁷ Mam na n kɩtame tɩ Israyɛll sẽn yaa mam nebã bãng mam yʋʋrã sẽn welg toorã. La m ka na n tol n leb n bas tɩ b sãam m yʋʋrã sẽn welg toorã ye. Woto, buud toay-toayã na n bãngame tɩ mam yaa Zu-soab a Sẽn-Ka-Saabo, n yaa Israyɛll Pʋ-Peelem-Soabã.

⁸ Bõn-kãens fãa watame, bõn-kãens na n yɩɩme. Yaa daar ning mam sẽn gom a yellã. Maam a Zu-soab a Sẽn-Ka-Saab n yeele.

⁹ Dẽ, Israyɛll tẽmsã neb na n yiime. Bãmb na n wʋka zab-teedã n yõog bugum: yaa gãn-bi wã ne gãn-bɛdã, la tãbdã, ne pɛɛmã, la rasabã ne kãnã.

¹⁰ Bãmb ka na n leb n kẽ weoog n bao raado, la b ka na n leb n kẽ kãgrẽ n kɛ raad ye. Bala, yaa zab-teedã la bãmb na n tar n tugund bugum. Bãmb na n zɛɛ sẽn dag n zɛɛd-b bãmbã, la b fã sẽn dag fãad-b bãmbã. Maam a Zu-soab a Sẽn-Ka-Saab n yeele.

¹¹ Badaare, mam na n yãka yaad zĩig Israyɛll pʋgẽ n kõ Googe. Yaa so-loaadbã long sẽn be yamsem ko-kãsengã yaangã. Yaadã zĩ-kãng gɩda so-loaadbã sore. Yaa zĩ-kãng la b na n mum Goog ne a kʋʋngã fãa. La b na n boonda zĩ-kãng tɩ Goog kʋʋngã longo.

¹² Israyɛll buudã na n muma neb kʋʋngã, sẽn na yɩl n yɩlg tẽngã, la bõn-kãng na n dɩka kiuug a yopoe.

¹³ Tẽngã nebã fãa na n muma bãmba, la daar ning mam sẽn na n puk m ziirã, bõn-kãng na n yɩɩ bãmb zu-zẽkre. Maam a Zu-soab a Sẽn-Ka-Saab n yeele.

¹⁴ Bãmb na n yãka neb tɩ b gilgd n get tẽngã wakat fãa. So-loaadbã na n sõngda nin-bãmb tɩ b wʋkd kũum nins sẽn ket n dʋr tẽngã n mumdẽ, sẽn na yɩl n yɩlg tẽngã. Bãmb na n dɩka kiuug a yopoe n bao kũumã.

¹⁵ So-loaadb-kãens na n gilga tẽngã, la ned a yembr sã n wa yãnd ninsaal kõaba, a na n ninga bãnd zĩ-kãng sɛɛgẽ, tɩ yao-tuudbã tõe n dɩk-b n tɩ mum Goog kʋʋngã longẽ wã.

¹⁶ Tẽng a yembr yʋʋr yaa Hamona, sẽn dat n togs tɩ ‹Kʋʋngo.› B na n maana a woto n yɩlg tẽngã.»

¹⁷ Zu-soab a Sẽn-Ka-Saab yetame: «Foom a ninsaala, yeel bõn-yɩgdɩ buud fãa, ne we-rũmsã fãa yaa: ‹Yi-y zĩig zãng n wa tigim, tigm-y taab mam maoongã maaneg yĩnga. Maoong ning mam mengã sẽn na n maan yãmb yĩngã. Yaa maoon-kãseng ning mam sẽn na n maan Israyɛll tãmsã zutã! Yãmb na n wãba nemd la y yũ zɩɩm.

¹⁸ Yãmb na n wãba tãb-bi-gãndaadã nemdo! Yãmb na n yũu dũniyã nanambs zɩɩm. Bãmb yaa wa pe-raado, la wa pe-ribli, wa boeese, wa lolse, bãmb fãa yaa Basã tẽng rũm-nobdse.

¹⁹ Mam maoongã daare, maoong ning mam sẽn maand yãmb yĩngã, yãmb na n wãba nem-kaam n tɩge, la y na n yũu zɩɩm hal tɩ y nens yilme.

²⁰ Mam dɩɩbã zĩigẽ, yãmb na n wãba wiid nemdo, rũms sẽn tɛt teed nemdo, la gãndaadã ne tãb-biisã fãa nemd n tɩge. Maam a Sẽn-Ka-Saab n yeele.

²¹ Mam na n puka m ziirã buud toay-toayã sʋka. Buud toay-toayã fãa na n yãnda sɩbgr nins mam sẽn na n puk m pãngã ne bãmb n kao b bʋʋdã to-to.

²² Sẽn sɩng ne badaare, Israyɛll buudã na bãng tɩ mam yaa Sẽn-Ka-Saab sẽn yaa bãmb Wẽnnaam.› »

A Ezekɩyɛll koɛɛgã kʋmsgo

²³ Woto, buud a taabã na n bãngame tɩ yaa b beegrã yĩnga, ne a sẽn maan sẽn kis n beeg maamã yĩnga, la b sẽn tall Israyɛll nebã n kẽng tẽn-zẽngã. Yaa rẽ n kɩt tɩ mam wẽnemd m neng n bas-b b bɛɛbã nugẽ, sẽn na n yɩlẽ tɩ b fãa pa tãpẽ.

²⁴ Mam maana bãmb wa sẽn zems b tʋʋm-dẽgdã ne b beegrã, la m wẽnemda m neng n bas-ba.

²⁵ Bõn-kãens yĩnga, maam a Zu-soab a Sẽn-Ka-Saab yetame: «Mam na n lebsa a Zakoob yagensã b zĩigẽ, la m zoe Israyɛll buudã fãa nimbãanega, la m na n wilga m sũ-ki-kãsengã m yʋʋrã sẽn welg toorã yĩnga.

²⁶ Baa bãmb sã n wa be b tẽngẽ wã n zĩ ne bãan tɩ ned ka be n na n yɛɛs-ba, b na n ket n tẽra b yãn-tʋʋmã ne b tʋʋm-kiti wã b sẽn dag n maan n beeg maamã yelle.

²⁷ Mam sã n tɩ yiis bãmb neb buud toay-toayã sʋka, mam sã n wa yiis bãmb b bɛɛbã tẽmsẽ n tigim n tall n wa b tẽngẽ wã, mam na n wilga m pʋ-peelmã ne bãmb buud wʋsg nifẽ.

²⁸ Mam sã n wa sãeeg bãmb buud toay-toayã sʋka, mam na n leb n tigim-b-la b tẽngẽ wã. Mam ka na n bas bãmb sʋkã ned ba a yembr beenẽ ye. Woto, bãmb na bãng tɩ mam yaa Sẽn-Ka-Saab sẽn yaa bãmb Wẽnnaam.

²⁹ Mam sẽn na n pʋdg m sɩɩgã Israyɛll buudã zugã yĩnga, m ka na n leb n wẽnemd n bas bãmb abada. Maam a Zu-soab a Sẽn-Ka-Saab n yeele.»