Ezekiyɛl 36 - WẼNNAAM SEBRE 2014

Israyɛll nebã na n leb n sooga b tẽngã

¹ «Foom a ninsaala, togs pĩnd-n-bãngr goam Israyɛll tãmsã wɛɛngẽ n yeele: ‹Israyɛll tãmse, kelg-y Sẽn-Ka-Saab goamã!›

² Ade, Zu-soab a Sẽn-Ka-Saab yetame: «Bɛɛbã yaala yãmb n yeele: ‹N-faa! N-faa! Yẽnda kʋdem-wẽndẽ tãmsã lebga tõnd dẽnda!

³ Bõn-kãng yĩnga, togs pĩnd-n-bãngr goam n yeel tɩ Zu-soab a Sẽn-Ka-Saab yetame: ‹Hakɩɩka! Neb sẽn yi zĩig zãng n baood n na n kɩt tɩ yãmb lebg zĩ-vɩʋʋgo, la b modg yãmba, n dat n kɩt tɩ yãmb lebg soolem a taab rẽndã, ne yãmb sẽn lebg nebã fãa sõasg zĩigẽ yel-bũndã yĩnga,

⁴ Israyɛll tãmse, kelg-y Zu-soab a Sẽn-Ka-Saab koɛɛga!› Zu-soab a Sẽn-Ka-Saab yeta tãmsã ne kunkubã, la bogdã, ne tãn-londã, la tẽms nins sẽn lebg raboodã ne tẽms nins sẽn ka tar-b nebã. Yaa tẽms b sẽn fã, la tẽms soolem a taab nins sẽn gũbg bãmbã sẽn paooge.»

⁵ Bõn-kãng yĩnga, maam a Zu-soab a Sẽn-Ka-Saab yetame: «Mam sũurã puugame tɩ m gomd ne Israyɛll yagsã, sẽn yɩɩd fãa, Edom soolmã fãa, sẽn yik ne kɩdeng la tɩtaam, n deeg m tẽngã n sooge, la b fã a rũmsã.»

⁶ Bõn-kãng yĩnga, togs pĩnd-n-bãngr goam Israyɛll zugu! Yeel tãmsã, ne kunkubã, ne kʋɩlsã la bãtã, tɩ m yaa Zu-soaba, la m gomda ne nonglem-kãsenga, la ne sũ-puugri, buud a taabã sẽn paoog yãmbã yĩnga.

⁷ Bõn-kãng yĩnga, Zu-soab a Sẽn-Ka-Saab yetame: «Mam zẽkda m nug n wẽend n yetẽ: ‹Hakɩɩka!› Buud a taabã sẽn gũbg yãmbã na n paama yãnd b mensã tʋy yĩnga.»

⁸ La yãmb a Israyɛll tãmse, tɩɩsã na n tãoo wil yãmb zutu, n wom biis Israyɛll sẽn yaa mam nebã yĩnga. Bala, bõn-kãens waoong ta n sɛɛme.

⁹ Ade, mam bee ne yãmba, la m na n wẽnemda m nengã n tees y sẽnẽ, n kɩt tɩ b leb n war tẽngã n bʋde.

¹⁰ Mam na n kɩtame tɩ yãmb sẽn yaa Israyɛll buudã gill nebã fɩɩg n lebg wʋsg n paase. Nebã na n leb n wa kẽe tẽmsã pʋse, la b na n lebs n mee raboodã.

¹¹ Mam na n kɩtame tɩ y nebã ne y rũmsã fɩɩg n lebg wʋsg n paase. Bãmb na n fɩɩgame n lebg wʋsgo. Mam na n kɩtame tɩ y pid tẽngã wa pĩnda, la mam na n maana yãmb neer n yɩɩd pĩnda. Woto, yãmb na bãng tɩ mam yaa Sẽn-Ka-Saabo.

¹² Mam na n kɩtame tɩ ninsaalb kẽn yãmb zutu. Yaa Israyɛll sẽn yaa mam nebã. Bãmb na n deega foom n sooge. Fo na n yɩ bãmb pʋɩɩre, la fo kõn leb n kʋ bãmb kambã ye.

¹³ Ade, Zu-soab a Sẽn-Ka-Saab yetame: «B yetame tɩ y rɩɩ ninsaalba, la y kʋ y buudã meng kamba.

¹⁴ Bõn-kãng yĩnga, fo kõn leb n dɩ ninsaalba, la fo kõn leb n kʋ f buudã kamb ye. Maam a Zu-soab a Sẽn-Ka-Saab n yeele.

¹⁵ Mam na n kɩtame tɩ f ra leb n wʋm buud a taabã tʋyã, neb a taabã paoogr kõn leb n zĩnd fo zug ye. Yãmb kõn leb n yɩ kug-lakdg y tẽngã yĩng ye. Maam a Zu-soab a Sẽn-Ka-Saab n yeele.»

Sẽn-Ka-Saab tigma Israyɛll nebã n na n yɩlg-ba

¹⁶ Sẽn-Ka-Saab goma ne maam n yeele:

¹⁷ «Ninsaala, kelge: Israyɛll buudã sẽn wa n ket b tẽngẽ wã, b rẽgm-a-la ne b manesmã, la ne b tʋʋmã. Bãmb manesmã rag n wẽnda wa pag sẽn yaa rẽgd a pekr wakatã.

¹⁸ Dẽ, mam sũurã puuga ne bãmb hal wʋsgo, bala, bãmb sẽn daag zɩɩm tẽngã pʋgẽ wã, la bãmb sẽn waoog wẽn-naandsã yĩng rẽgma bãmba.

¹⁹ Mam kɩtame tɩ b sãeeg n be buud toay-toayã sʋka, bãmb sãeegame n be tẽmsã fãa pʋse. Mam kaoo bãmb bʋʋd wa sẽn zems b tʋʋmã la b manesmã.

²⁰ Bãmb sẽn ta buud toay-toayã tẽms nins fãa pʋga, bãmb sãamda mam yʋʋrã sẽn welg toorã. Sɩd me, nebã rag n gomda bãmb yell n yetẽ: ‹Nin-bãmbã yaa Sẽn-Ka-Saab nebã! Bãmb yii Sẽn-Ka-Saab tẽngẽ wã!›

²¹ Woto, mam dag n datẽ lame n koglg m yʋʋrã sẽn welg toorã, yʋʋr ning Israyɛll nebã sẽn dag n sãamd buud nins fãa bãmb sẽn dag n kẽngẽ wã sʋkã.»

²² Bõn-kãng yĩnga, yeel Israyɛll buudã tɩ maam a Zu-soab a Sẽn-Ka-Saab yetame: «Israyɛll buudu, ka yãmb yĩng la mam sẽn maan a woto wã ye. Yaa mam yʋʋrã sẽn welg toorã yĩnga, yʋʋr ning yãmb sẽn dag n sãam buud nins fãa yãmb sẽn dag n be b sʋkã yĩnga.

²³ Mam na n wilgame tɩ m yʋ-kãsengã b sẽn sãam buud toay-toayã sʋkã, yʋʋr ning yãmb sẽn dag n sãam bu-bãmb sʋkã, yaa yʋʋr sẽn welg toore. Woto, mam sã n wa wilg m pʋ-peelmã ne yãmb buud toay-toayã nifẽ, bãmb na bãng tɩ mam yaa Sẽn-Ka-Saabo! Maam a Zu-soab a Sẽn-Ka-Saab n yeele.»

²⁴ Mam na n yiisa yãmb bu-zẽmsã sʋka, mam na n tigim-y-la tẽmsã fãa pʋs n tall-y n lebg n wa y tẽngẽ wã.

²⁵ Mam na n dɩka ko-yɩlemd n zãgs yãmba, la yãmb na n yɩɩ yɩlma. Mam na n yɩlga yãmb n yiis y rẽgdã ne y bõn-naandsã.

²⁶ Mam na n kõo yãmb sũ-paalga, la yam-paalga, m na n yiisa sũur ning sẽn yaa kãenkãe wa kugrã yãmb yĩngẽ wã, la m kõ yãmb sũur sẽn yaa ninsaal sũuri.

²⁷ Mam na n ninga m sɩɩgã yãmb pʋsẽ, n kɩt tɩ y sak mam no-tũudsã ne m noyã.

²⁸ Yãmb na n zĩnda tẽng ning mam sẽn dag n kõ yãmb yaab-rãmbã pʋgẽ. Yãmb na n yɩɩ mam neba, la mam na n yɩ yãmb Wẽnnaam.

²⁹ Mam na n yiisa yãmb dẽgdã fãa. Mam na n kɩtame tɩ kood zĩndi, la m na n kɩtame t'a fɩɩge. Mam ka na n leb n kɩt tɩ kom yõk yãmb ye.

³⁰ Mam na n kɩtame tɩ tɩɩsã wom biis wʋsgo, la m kɩt tɩ pʋtã bõn-koaadl fãa sake, tɩ kom da leb n yõk yãmb tɩ y paam paoogr buud toay-toayã sʋk ye.

³¹ Dẽ, yãmb na n tẽega y tʋʋm-wẽnsã ne y manesmã sẽn ka sõama wã yelle. La yãmb ka n leb n tõog n ges y mensã, yãmb kongrã ne y tʋʋm-beedã yĩnga.

³² Bãng-y tɩ ka yãmb yĩng la mam sẽn maand a woto wã ye. Israyɛll buudu, zoe-y yãnde, la bɩ y manesmã yãnd yõk-yã! Maam a Zu-soab a Sẽn-Ka-Saab n yeele.

³³ Ade, maam a Zu-soab a Sẽn-Ka-Saab yetame: «Daar ning mam sẽn na n yɩlg yãmb ne y kongrã fãa wã, mam na n lebs n pidsa tẽmsã ne nebã, la b na n lebs n mee raboodã.

³⁴ B na n leb n koo tẽng ning sẽn dag n lebg zĩ-vɩʋʋgã pʋga, tẽng ning b sẽn dag n sãam so-loaadbã fãa nifẽ wã.

³⁵ La b na n yeelame: ‹Tẽn-kãngã sẽn dag n lebg zĩ-vɩʋʋgã lebga wa Edɛn zẽed zĩiga. Tẽn-bãmbã sẽn dag n lebg raboodo, n yaa zĩ-vɩɩdo, n sãam zãngã fãa lebga pãng zĩisi tɩ neb be b pʋsẽ!

³⁶ Woto, buud toay-toay nins sẽn na n kell-bã sẽn gũbg yãmbã na n bãngame tɩ maam a Sẽn-Ka-Saab n lebs n me b sẽn dag n kõogã, la m sel b sẽn dag n võ wã. Maam a Sẽn-Ka-Saab n gome, la m na n maan-a lame.› »

³⁷ Ade, maam a Zu-soab a Sẽn-Ka-Saab yetame: «Mam na n leb n basa Israyɛll buudã tɩ b kos maam sõngre, la m na n leoka b kosgã, n kɩt tɩ b fɩɩg n lebg wʋsg wa piisi.

³⁸ La tẽms nins sẽn yaa raboodã na n pida ne nebã, wa rũms sẽn welg toore, wa Zeruzalɛm sẽn dag n pit ne maand rũmsã to-to tigã wakatã. Woto, b na n bãngame tɩ mam yaa Sẽn-Ka-Saabo.»