Ezekiyɛl 35 - WẼNNAAM SEBRE 2014

Pĩnd-n-bãngr goam Edom nebã yĩnga

¹ Sẽn-Ka-Saab goma ne maam n yeele:

² «Ninsaala, wẽnemd f nengã n tees Seyɩɩr soolem ning sẽn be tãms sʋkã n togs pĩnd-n-bãngr goamã.

³ ‹Yeel bãmb tɩ maam a Zu-soab a Sẽn-Ka-Saab yetame: Seyɩɩr soolem ning sẽn be tãms sʋka, mam na n yika zabr ne foom, m na n tẽega m nugã fo zugu n kɩt tɩ f lebg zĩ-vɩʋʋgo.

⁴ Mam na n kɩtame tɩ f tẽmsã lebg raboodo, la f tẽngã gill na n sãamame. Woto, fo na bãng tɩ mam yaa Sẽn-Ka-Saabo.

⁵ Fo sẽn dɩt beem ne Israyɛll wakat fãa n bas-b tɩ bɛɛbã kʋ-b ne sʋʋg b beegrã wakatã yĩnga,

⁶ mam wẽenda ne m mengã, tɩ m na n daaga fo zɩɩm, la zɩɩmã na n pʋga foom, fo sẽn kisg zɩɩmã yĩnga, zɩɩm n na n pʋg foom.

⁷ Mam na n kɩtame tɩ Seyɩɩr soolem ning sẽn be tãms sʋkã lebg zĩ-vɩʋʋgo, la m na n menesa neb nins sẽn tũud beenẽ n loogdẽ wã.

⁸ Mam na n pidsa yẽnda tãmsã zut ne kũum. La neb nins sẽn pa tãpẽ wã kũum na n dʋra fo kunkubã zutu, ne f tãn-londã pʋse, la f bogdã fãa pʋse.

⁹ Mam na n kɩtame tɩ fo lebg zĩ-vɩʋʋgo, la ned kõn leb n zĩnd beenẽ ye. Woto, yãmb na bãng tɩ mam yaa Sẽn-Ka-Saabo.› »

¹⁰ Fo yeelame: «Buud a yiibã sẽn yaa tẽms a yiibã na n yɩɩ mam dẽnda, la mam na n deeg-b lame n sooge.» Sẽn-Ka-Saab yaool n dag n be beenẽ.

¹¹ Bõn-kãng yĩnga, mam wẽenda ne m meng n yetẽ tɩ mam me na n dola yãmb ne sũ-yikri la ne sũ-kiiri, wa yãmb sẽn maan bãmb y sẽn kisg-bã pʋgẽ wã. La mam sã n wa n sɩbg yãmba, mam na n kɩtame tɩ bãmb bãng mam sẽn yaa ned ninga. Maam a Zu-soab a Sẽn-Ka-Saab n yeele.

¹² Woto, yãmb na bãng tɩ maam a Sẽn-Ka-Saab wʋma tʋy nins fãa yãmb sẽn tʋ Israyɛll tãmsã. Yãmb yeelame: «B lebga zĩ-vɩɩdo, b rɩk-b lame n kõ tõnd tɩ b lebg tõnd dɩɩbo!

¹³ Yãmb gom n paooga maam, yãmb goma wuk-m-men-goam n paoog maam. Mam meng wʋma gom-kãense.»

¹⁴ Ade, Zu-soab a Sẽn-Ka-Saab yetame: «Tẽngã fãa sã n wa maand sũ-noogo, mam na n kɩtame tɩ fo lebg zĩ-vɩʋʋgo.

¹⁵ Yãmb sẽn maan sũ-noog Israyɛll buudã soolem sẽn lebg zĩ-vɩʋʋgã yĩnga, mam me na n maana yãmb a woto. Foom a Seyɩɩr soolem ning sẽn be tãms sʋkã, fo na n lebga zĩ-vɩʋʋgo, foom ne Edom soolmã gilli! Woto, b na n bãngame tɩ mam yaa Sẽn-Ka-Saabo.»