Ezekiyɛl 32 - WẼNNAAM SEBRE 2014

Wiisg a Faarõ ne Ezɩpt yĩnga

¹ Yʋʋmd piig la a yiib soabã pʋga, kiuug piig la a yiibẽ soabã pipi daarã, Sẽn-Ka-Saab goma ne maam n yeele:

² «Ninsaala, pʋd sũ-sãang yɩɩll Faarõ sẽn yaa Ezɩpt rĩmã yĩng n yeel yaa: ‹Fo bee bu-zẽmsã sʋk wa gɩgem-polle, la fo yaa wa wag-bɛɛg sẽn be ko-kãsemsã pʋse, fo rag n be f kʋɩlsã pʋs n lisd n pukdẽ, fo naoã rag n bendgda koomã, fo rag n dãmbda b ko-wĩisã.›

³ Ade, maam a Zu-soab a Sẽn-Ka-Saab yetame: ‹M na n kɩtame tɩ neb wʋsg wa tigme, tɩ m yɛdg m gãmbrã fo zugu. Bãmb na n vuuga foom ne m gãmbrã n yiisi.

⁴ M na n basa foom tẽn-koɛɛngã zugu, m na n tɩ lob-f-la weoogẽ wã. Mam na n kɩtame tɩ yĩngr bõn-yɩgdɩ wã fãa wa zĩnd fo zugu. La m na n kɩtame tɩ dũniyã rũmsã fãa wa wãb foom n tɩge.

⁵ Mam na n sãeega f nemdã tãmsã zutu, la m pids tãn-londã ne f nem-zersã.

⁶ Mam na n zãgsa tẽng ning fo sẽn be a pʋgẽ n dugdã ne fo zɩɩmã, hal n tãag tãmsã zutu, n pid f kʋɩl-wagdã.

⁷ Fo sã n wa ki, m na n luda sa-gãongã, la m kɩt tɩ ãdsã sobge. Mam na n luda wĩndgã ne sawad-taoko, la kiuugã ka na n leb n kõ a vẽenem yɛs ye.

⁸ Fo yĩnga, mam na n kɩtame tɩ vẽenem buudã fãa sẽn be yĩngrã lebg lika, la m kɩt tɩ f tẽngã gill lebg lik bida. Maam a Zu-soab a Sẽn-Ka-Saab n yeele.›

⁹ Mam sã n wa kɩt tɩ buud toay-toay sẽn be tẽms fo sẽn dag n ka mi pʋs wʋm fo sãoongã kibare, mam na n kɩtame tɩ neb buud wʋsg sũy sãame.

¹⁰ Mam na n sãama buud wʋsg neb fo yĩnga, la bãmb dĩm-dãmbã na n diga ne rabeem fo yĩnga. Mam sã n wa wõog m sʋʋgã bãmb taoore, bãmb ned kam fãa na n diga ne rabeem a mengã vɩɩm yĩng fo sãoongã daare.»

¹¹ Ade, Zu-soab a Sẽn-Ka-Saab yetame: «Babilond dĩmã sʋʋg na n taa foom.

¹² Mam na n kɩtame tɩ gãndaad sẽn yaa nin-toos n yɩɩd buud a taabã fãa wã kʋ f neb kʋʋngã ne zabr sʋʋga. Bãmb na n kɩtame tɩ Ezɩpt tɩtaamã sɛ, la b sãam a neb kʋʋngã fãa.

¹³ M na n sãama a rũms nins fãa sẽn wat ko-kãsemsã noyã. Ninsaal naoor kõn leb n bendg koomã, la rũng nao-beong me kõn leb n bendg-a ye.

¹⁴ Dẽ, mam na n kɩtame tɩ Ezɩpt koomã tisgi, la m kɩt tɩ b kʋɩlsã koom zoe wa kaam. Maam a Zu-soab a Sẽn-Ka-Saab n yeele.

¹⁵ Mam sã n wa kɩt tɩ Ezɩpt lebg zĩ-vɩʋʋgo, la m kɩt tɩ b vaag bũmb nins fãa sẽn be tẽngã pʋgẽ wã n looge, mam sã n wa kʋ tẽngã neb fãa zãnga, bãmb na bãng tɩ mam yaa Zu-soab a Sẽn-Ka-Saabo.»

¹⁶ Woto yaa sũ-sãang yɩɩlle, la b na n yɩɩl-a lame. Buud a taabã fãa kom-pugli na n yɩɩl-a lame. Bãmb na n yɩɩl-a-la Ezɩpt ne a neb kʋʋngã fãa yĩnga. Maam a Zu-soab a Sẽn-Ka-Saab n yeele.

Sũ-sãang yɩɩll buud a taabã yĩnga

¹⁷ Yʋʋmd piig la a yiib soabã pʋgẽ, kiuugã rasem piig la a nu daarã, Sẽn-Ka-Saab goma ne maam n yeele:

¹⁸ «Ninsaala, wõos Ezɩpt neb kʋʋngã yĩnga, la f kɩt tɩ bãmb ne buud a taabã sẽn tar pãensã tẽms sig dũniyã zĩ-zulumsẽ wã, n naag b rãmb nins sẽn sigd bokẽ wã.

¹⁹ Fo yɩɩda ãnda ne ra-sãnde? Sig tɩ b gãneg-f n naag sẽn ka kẽ-b bãongã!

²⁰ Ezɩpt neb kʋʋngã na n ki n naaga neb nins sẽn pa tãpẽ wã. Zabr sʋʋg waame. Sãam-y Ezɩpt ne a neb kʋʋngã!

²¹ Gãndaad meng-mengã, ne Ezɩpt sõangdbã na n zĩnda kɩɩm-kulg n gom ne-a n yeele: Ad sẽn ka kẽ-b bãongã sẽn ki zabrẽ wã watame n na n gãand ne tõndo.

²² Ade, Asiiri ne a zãma wã fãa la woto. Ad yẽnda zãma wã sẽn pa tãpẽ wã yaad sẽn gũbg-a.

²³ B ninga bãmb yaadã bokã zĩ-zulumsẽ, n gũbg a yaoogã. Bãmb sẽn dag n kẽesd dũniyã nin-vɩɩs rabeemã paa tãpẽ.

²⁴ Ad Elam ne a zãma wã fãa yaad sẽn gũbg a yaoogã, bãmb fãa paa tãpẽ. Bãmb fãa sẽn dag n kẽesd dũniyã nin-vɩɩs rabeemã siga dũniyã zĩ-zulumsẽ n ka kẽ bãong ye. Bãmb naaga neb nins sẽn sigd bok pʋgẽ wã n dɩ yãnde.

²⁵ N-yẽe! B tʋɩɩ Elam dĩmã gãag a zãma wã fãa sẽn ki wã sʋka, tɩ b yaadã gũbg-a. Nin-bãmbã fãa sẽn ka kẽ bãongã paa tãpẽ, bala, bãmb dag n kẽesda dũniyã nin-vɩɩs rabeem, la bãmb naaga neb nins sẽn sigd bok pʋgẽ wã n dɩ yãnde. B ninga bãmb sẽn ki-bã sʋka.

²⁶ Mesɛk ne Tuball me bee be, la b zãma wã fãa yaad gũbga bãmba. Nin-bãmbã fãa sẽn ka kẽ bãongã paa tãpẽ, bala, bãmb dag n kẽesda dũniyã nin-vɩɩs rabeem.

²⁷ B ka gãneg bãmb n naag gãndaadã, b ka naag bãmb neb nins sẽn ka kẽ bãongã sẽn ki wã sʋk ye. Bãmb siga kɩɩm-kulg ne b zab-teedã, tɩ b kʋgl bãmb zutã ne b zabr sʋʋsã. Bãmb yel-wẽnã yaool n taba b kõabã, bala, bãmb dag n kẽesda dũniyã nin-vɩɩs rabeem.

²⁸ La sã n yaa ne foom a Faarõ, fo me na n kiime tɩ b mum foom n naag sẽn ka kẽ-b bãongã sẽn ki zabrẽ wã.»

²⁹ «Ad Edom ne a rĩm-dãmbã la a nanambsã. Baa ne bãmb sẽn dag n yaa gãndaadã, b rɩka bãmb n ning sẽn pa-b tãpẽ wã sʋka. B gãnega bãmb sẽn ka kẽ-b bãongã sʋka, n naag sẽn sigd-b bok pʋgẽ wã.

³⁰ Ad tẽms nins fãa sẽn be nug-rɩtgã nanambsã, ne Sɩdõ nebã fãa sẽn naag sẽn ki-bã n sigã. Baa ne bãmb sẽn yɩ gãndaad n dag n kẽesd nebã rabeemã, bãmb dɩɩ yãnde. Nin-bãmbã sẽn ka kẽ bãongã gãeeme n naag sẽn pa-b tãpẽ wã, la bãmb ne sẽn sigd-b bokẽ wã rɩɩ yãnde.

³¹ Faarõ na n yãnda bãmba, la a na n paama belsgo, yẽnda zãma wã fãa ne a nebã la a tãb-biisã fãa sẽn pa tãpẽ wã wɛɛngẽ. Maam a Zu-soab a Sẽn-Ka-Saab n yeele.

³² Bala, mam na n kẽesa dũniyã nin-vɩɩs rabeem. B na n gãnega Faarõ ne a zãma wã fãa neb nins sẽn ka kẽ-b bãongã sʋka, n naag b rãmb nins sẽn pa tãpẽ wã. Maam a Zu-soab a Sẽn-Ka-Saab n yeele.»