Ezekiyɛl 29 - WẼNNAAM SEBRE 2014

Pĩnd-n-bãngr goam Ezɩpt yĩnga

¹ Yʋʋm piig soabã pʋga, kiuug piig soabã rasem piig la a yiibã daare, Sẽn-Ka-Saab goma ne maam n yeele:

² «Ninsaala, wẽnemd f neng n tees Ezɩpt dĩm a Faarõ sẽnẽ, n togs pĩnd-n-bãngr goam yẽnda ne Ezɩpt tẽngã fãa wɛɛngẽ!

³ Yeel tɩ maam a Zu-soab a Sẽn-Ka-Saab yetame: ‹Foom a Faarõ sẽn yaa Ezɩpt rĩmã, mam zabda ne foom! Bala, fo yaa wag-bɛ-kẽeng n gãe fo Nill kʋɩlgã ko-soay sʋk n yetẽ: Nill kʋɩl-kãngã yaa maam n so, maam n maan-a m mengã yĩnga!

⁴ Beneere, mam na n ninga f yɛyã bãnga, la m kɩt tɩ fo Nill kʋɩlgã ko-soay zĩm wa tabend f yĩngã, la m na n taka foom n yiis f Nill kʋɩlgã ko-soay sʋka, foom ne f Nill kʋɩlgã zĩm nins fãa sẽn na n tabl fo yĩngã.

⁵ Mam na n basa foom we-raoogã pʋga, foom ne f Nill kʋɩlgã ko-soay zĩmã fãa. Fo na n kii tẽn-koɛɛngã zugu. B ka na n mum-f ye, f na n paa be n weele. Mam na n kɩtame tɩ fo yɩ we-rũms la yĩngr bõn-yɩgdɩ rɩɩbo.

⁶ Woto, Ezɩpt nebã fãa na n bãngame, tɩ mam yaa Sẽn-Ka-Saabo. Bala, bãmb yɩɩ wa tãnwĩig ra-tikdg Israyɛll buudã yĩnga.

⁷ Bãmb sẽn tik foomã, fo kaoome n pogl b bãokã. Bãmb sẽn tik foomã, fo kaoome, la fo komsa bãmb kɩɩlã zãnga.›

⁸ Bõn-kãng yĩnga, maam a Zu-soab a Sẽn-Ka-Saab yetame: ‹Mam na n kɩtame tɩ b wa zab ne foom ne zabr sʋʋga, n menes ninsaalbã ne rũmsã sẽn be fo pʋgẽ wã.

⁹ Ezɩpt tẽngã na n lebga zĩ-vɩʋʋgo, la raboogo. Woto la b na n bãng tɩ mam yaa Zu-soab a Sẽn-Ka-Saabo.› » Bala, yẽnda yetame: «Nill kʋɩlgã yaa maam n so, la yaa maam n maan-a.

¹⁰ Woto n kɩt tɩ mam zabd ne foom ne f Nill kʋɩlgã ko-soayã fãa. Mam na n kɩtame tɩ Ezɩpt tẽngã lebg raboogo. A na n yɩɩ raboogo, la zĩ-vɩʋʋgo, sẽn sɩng ne Migdoll n tɩ tãag Sɩyɛnde, ne Kuus todsã.

¹¹ Ninsaal naoor kõn tabg be, rũng naoor kõn tabg be. Yẽnda na n paa woto yʋʋm pis-naas tɩ ned ka zĩnd a pʋgẽ ye.

¹² Mam na n kɩtame tɩ Ezɩpt tẽngã lebg zĩ-vɩʋʋgo, n yɩ wa tẽms nins sẽn yaa zĩ-vɩɩdã, la yẽnda tẽmsã na n lebga zĩ-vɩɩdo, wa tẽms nins sẽn yaa raboodã, hal n tãag yʋʋm pis-naase. Mam na n kɩtame tɩ Ezɩpt nebã sãeeg n kẽ buud a taabã sʋka. Mam na n kɩtame tɩ bãmb sãeeg n tɩ zĩnd tẽmsã fãa pʋse.»

¹³ Ade, maam a Zu-soab a Sẽn-Ka-Saab yetame: ‹Yʋʋm pis-naasã sã n wa pidi, mam na n tigsa Ezɩpt nebã sẽn sãeeg buud a taabã sʋkã.

¹⁴ Mam na n lebsa Ezɩpt tẽngã a zĩigẽ. Mam na n leb n talla bãmb n wa Patroose, tẽng ning bãmb sẽn yitẽ wã, la beenẽ, bãmb na n vigla soolem sẽn ka pãnga.

¹⁵ Bãmb soolmã pãng na n yɩɩ bilf n yɩɩd soolem-dãmb a taabã, la a ka na n leb n zẽk a meng n yɩɩg buud a taabã ye. Mam na n booga b pãngã, tɩ b ka leb n tõog n soog buud a taabã ye.

¹⁶ Israyɛll buudã kõn leb n dɩk b teegr n teeg Ezɩpt nebã, tɩ yɩ tẽegre, kongr ning Israyɛll buudã sẽn dag n maanã, b sẽn dag n wẽnemd n dɩk b teegrã n teeg Ezɩptã yĩnga. Woto la bãmb na n bãng tɩ mam yaa Zu-soab a Sẽn-Ka-Saabo.› »

Rĩm a Nebukatnedzaar na n sooga Ezɩpte

¹⁷ Yʋʋmd pisi la a yopoe soabã pʋgẽ, pipi kiuugã pipi daare, Sẽn-Ka-Saab goma ne maam n yeele:

¹⁸ «Ninsaala, Babilond dĩm a Nebukatnedzaar kɩtame t'a tãb-biisã modg b meng n maan tʋʋmd sẽn yaa toogo, n na n zab ne Tɩɩr nebã. Bãmb fãa zutã wa n kõogame, tɩ b bãgdã fãa meede. La Babilond dĩmã woo, a tãb-biisã woo, bãmb ba a yembr ka paam yaood tʋʋmd ning b sẽn maan n zab ne Tɩɩr tẽngã yĩng ye.

¹⁹ Bõn-kãng yĩnga, ad maam a Sẽn-Ka-Saab sẽn yeta: ‹Mam na n dɩka Ezɩpt tẽngã n sagl Babilond dĩm a Nebukatnedzaar nugẽ. Yẽnda na n looga ne Ezɩpt paoongã, n wʋk a teedã, la a fã tẽngã: rẽndã n na n yɩ yẽnda tãb-biisã yaoodo,

²⁰ tʋʋmd ning a sẽn maanã yĩnga. Mam dɩkda Ezɩpt tẽngã n ningd Babilond dĩmã nugẽ. Bala, yẽnda tãb-biisã tʋm n kõo maam.» Maam a Zu-soab a Sẽn-Ka-Saab yetame:

²¹ «Badaare, mam na n kɩtame tɩ Israyɛll buudã paam pãnga, la m kɩt tɩ foom a Ezekɩyɛll zelemdã lak tɩ f gom bãmb sʋka. Woto la bãmb na n bãng tɩ mam yaa Sẽn-Ka-Saabo.»