Ezekiyɛl 27 - WẼNNAAM SEBRE 2014

Wiisg Tɩɩr tẽngã yĩnga

¹ Sẽn-Ka-Saab goma ne maam n yeele:

² «Ninsaala, wiis Tɩɩr tẽngã yĩnga!

³ Gom ne Tɩɩr tẽngã sẽn be ko-kãsengã noor n maand leebg ne nebã buud fãa wã, la sẽn wẽnemd n tees tẽms wʋsg sẽn be koom sʋkã, n yeel-a tɩ maam a Zu-soab a Sẽn-Ka-Saab yetame yaa: ‹Tɩɩr tẽnga, fo rag n yetame tɩ fo yaa tẽng sẽn tar da-sãnde!

⁴ Fo todsã bee ko-kãsengã sʋka. Sẽn me-b foomã mee foom tɩ f yaa neer zãnga.

⁵ Bãmb maana fo kɩremsã ne sɩprɛs tɩɩs raad sẽn yit Seniir tẽnga. Bãmb maana fo ra-lugdsã ne sɛɛdr tɩɩs raad sẽn yit Libã.

⁶ Bãmb maana fo kogl-rugsdsã ne sɛn tɩɩs raad sẽn yit Basã, la b maan fo zĩndg zĩisã ne sɩprɛs tɩɩs raad sẽn yit Sɩpre, n nags-b ne wob-yẽna.

⁷ B maana fo pɛɛlã b sẽn kãdã ne gĩs-bãaneg sẽn yit Ezɩpt tẽnga. B maana fo tãb-kaoorã pɛɛl ne peen-bãmba, la b maan fo fu-rotã ne peen-moaamã, la peen-miid sẽn yit Eliisa tẽms nins koom sẽn gũbgã.

⁸ Sɩdõ ne Arvaad nebã n dag n yaa fo kogl-rugsdba, la foom a Tɩɩr tẽng yam-dãmbã n dag n yaa fo tʋmtʋmdb koom koglgã pʋga.

⁹ Geball tẽng kãsem-dãmbã ne a tʋʋm-mitbã n dag n be ne foom n manegd bũmb nins fãa sẽn sãam koglgã pʋgã. Koom kogend nins fãa sẽn dag n kẽnd ko-kãsengã zugã, ne b tʋmtʋmdbã rag n wata fo nengẽ n daad fo teedã.

¹⁰ Pɛrs-rãmbã, ne Luud-rãmbã la Put tẽng rãmbã rag n bee fo tãb-biisã sʋka, bãmb n dag n yaa fo zab-zabdba. B rag n yagenda b gãndã ne b kut pugli wã fo nengẽ. Bãmb dag n kɩtame tɩ fo paamd zu-zẽkre.›

¹¹ Arvaad nebã ne fo tãb-biisã n dag n karg n gilg fo lalsã. La Gamaad nebã n dag n be fo gãsdẽ wã. Bãmb dag n yagenda b logdã n gilg fo lalsã, n kɩt tɩ fo yaa neer zãnga.› »

Tɩɩr yaa leebg na-tẽnga

¹² Tarsɩɩs tẽngã rag n leebda ne foom, fo sẽn dag n tar teed buud toor-toor sẽn yaa wʋsgã yĩnga. Bãmb wata ne wanzuri, kutu, waasdo, la namdo, n koosd ne foom.

¹³ Gɛrs tẽngã, ne Tuball la Mesɛk tẽmsã dag n leebda ne foom, b rag n wata ne yembse, la teed sẽn yõg ne zũudu, n tekd ne teed nins fo sẽn tarã.

¹⁴ Togarma nebã rag n wata ne wiidi, la ne rũms sẽn tõe n tɛ teedo, la bõn-weese, n koosd ne foom.

¹⁵ Dedan tẽng nebã me rag n leebda ne foom. Tẽms wʋsg sẽn be koom sʋkã rag n tũnugda foom n leebdẽ. La b rag n yaooda foom ne wob-yẽna, la ra-sabl sẽn yaa sĩdma.

¹⁶ Siiri nebã rag n leebda ne foom, fo sẽn dag n tar teed wʋsgã yĩnga. La b wat ne kug-sõama sẽn pɩnda, peen-miidu, pɛɛl b sẽn kãde, la peen-gʋlem, ne zẽems buud toor-toor wams sẽn yaa miid la kẽese, la kug-sõama buud sẽn yaa miidu, n koosd ne foom.

¹⁷ Zʋʋda ne Israyɛll tẽmsã rag n leebda ne foom. Bãmb rag n wata ne bɩle sẽn yit Minit soolmẽ, ne bur-maas buud toor-toore, la sɩɩdo, ne kaam, la bãas tɩ-sõodem, n koosd ne foom.

¹⁸ Damaas tẽngã rag n leebda ne foom, fo sẽn dag n tar teed buud toor-toor sẽn yaa wʋsgã yĩnga. Bãmb dag n wata ne reezẽ rãam sẽn yit Elbõ ne pe-kõbd sẽn yaa pɛɛlga, n koosd ne foom.

¹⁹ Vedan ne Yaavan sẽn be Uzall soolmẽ wã rag n wata ne kut b sẽn kudi, ne parfẽ sẽn tar yũ-noogo, n tekd ne fo teedã.

²⁰ Dedan nebã rag n leebda ne foom, n wat ne wed-moos zombg teedo.

²¹ Araabi ne Kedaar tẽng nanambsã fãa rag n tũnugda foom n leebdẽ. Bãmb dag n koosda pe-ribli, ne pe-raado, la boees ne foom.

²² Seba ne Rama lɛɛbdbã rag n wat n leebda fo nengẽ. Bãmb dag n wata ne parfẽ-rãmb sẽn tar yũ-noogo, la ne kug-sõama buud toor-toore, la sãnem n koosd ne foom.

²³ Aarã ne Kane, la Edɛn, ne Seba, la Asiiri ne Kilmaad lɛɛbdbã rag n leebda ne foom.

²⁴ Bãmb dag n wata ne te-neeb n leebd ne foom: Yaa fut sẽn yaa miidu, fut b sẽn kãde, fu-gʋlem buud toor-toore, ne wĩy b sẽn kale, n tar pãnga, n leebd ne foom.

²⁵ Tarsɩɩs koom kogl-bɛdã n dag n zɩt fo teedã. Fo rag n tara arzegs la ziir wʋsgo, n be ko-kãsemsã sʋka.

Wiisg Tɩɩr yĩnga

²⁶ Kogl-rugsdbã talla foom n kẽn ko-kãsems zutu. Yaang sobg wa n sãama foom ko-kãsemsã sʋka.

²⁷ Fo lʋɩɩsã daare, fo arzegsã, fo leebgã, fo teedã, la fo pʋgẽ tʋmtʋmdbã, ne f te-manegdbã, ne neb nins sẽn manegd fo teed sẽn sãamã, la fo raadensã, ne tãb-biis nins sẽn be fo nengẽ wã, la zãma wã fãa sẽn be fo pʋgẽ wã, b fãa gill na n paa ko-kãsemsã sʋka.

²⁸ Sẽn manegd-b teedã fo pʋgẽ wã yel-pakrã kelemsã kɩtame tɩ zĩis nins sẽn be koomã noorã rigimdi.

²⁹ Neb nins sẽn mi-b koglg rugsgã fãa na n sig n basa b koom kogendã, la koom kogendã pʋsẽ tʋmtʋmdbã, ne sẽn manegd-b kogendã teedã fãa na n yii ko-kãsengã pʋga. Bãmb na n yalsa tẽn-koɛɛngã zugu.

³⁰ Bãmb na n zẽka b koees n yãb fo yĩnga, bãmb na n kelma ne sũ-sãanga. Bãmb na n yuga b zut tom, bãmb na n bilma tompeglmẽ.

³¹ Bãmb na n põnga b zut fo yĩnga, bãmb na n sẽgna boto, bãmb na n kelma ne sũ-sãang f yĩnga. Bãmb na n wiisa ne sũ-sãang fo yĩnga.

³² Bãmb toogã pʋga, b na n wiisa ne sũ-sãanga, la b yãb fo yĩng n yeele: «Ãnda n dag n yaa wa Tɩɩr tẽnga? Ãnda n dag n yaa wa tẽng ning sẽn lebg sɩddd... ko-kãsengã sʋkã?

³³ Wakat ning b sẽn dag n yiisd fo leebgã teedã ko-kãsemsã pʋsẽ wã, fo rag n tɩgsda neb kʋʋng buud toor-toore. Fo paoongã ne f teedã sẽn dag n yaa wʋsgã yĩnga, fo kɩtame tɩ dũniyã rĩm-dãmb lebg arzegs rãmba.

³⁴ La ko-kãsemsã sẽn wa n sãam foomã, fo teedã ne f zãma wã fãa sẽn be fo pʋgẽ wã lisa ko-zulumsẽ wã.

³⁵ Tẽms nins fãa sẽn be koom sʋkã yɛɛsa fo yĩnga. Rabeem kẽe bãmb dĩm-dãmbã, bãmb nens yeegame.

³⁶ Tẽn-zẽmsã neb nins sẽn yaa lɛɛbdbã fɩɩnda fo wɛɛngẽ. Fo lebga bũmb sẽn wat ne pelen-yɩka. Fo ka leb n beẽ, la f kõn tol n leb n zĩnd abada.»