Ezekiyɛl 26 - WẼNNAAM SEBRE 2014

Pĩnd-n-bãngr goam Tɩɩr nebã yĩnga

¹ Yembdã loogr zugẽ tɩ yʋʋm piig la a yembre, kiuugã pipi daare, Sẽn-Ka-Saab goma ne maam n yeele:

² «Ninsaala, Tɩɩr nebã goma Zeruzalɛm n yeel tɩ: ‹Ha, ha, ha! B wãa tẽng ning sẽn dag yaa nebã fãa rignoorã! Tõnd n na n deeg yẽnda zĩiga. D na n lebga arzegs rãmba, bala, Zeruzalɛm lebga raboogo!›

³ Bõn-kãng yĩnga, maam a Zu-soab a Sẽn-Ka-Saab yetame: ‹Tɩɩr tẽnga, mam na n zaba ne foom! M na n kɩtame tɩ buud wʋsg wa zab ne foom, wa ko-kãsengã ko-wĩis sẽn zẽkdã.

⁴ Bãmb na n sãama Tɩɩr lalsã, la b sarem a gãsdã. Mam na n kõoga tẽngã toma, n bas t'a pĩigã puki.

⁵ Tɩɩr tẽngã na n lebga zĩm-gãmbã yɛdgr zĩig ko-kãsengã sʋka. Yaa maam n gome. B na n basame tɩ buud a taab fã bãmba. Maam a Zu-soab a Sẽn-Ka-Saab n yeele.

⁶ La b na n sãama yẽnda tẽn-bãooneg nins sẽn gũbg yẽnda wã ne zabr sʋʋga. Woto, b na bãng tɩ mam yaa Sẽn-Ka-Saabo.»

⁷ Ade, Zu-soab a Sẽn-Ka-Saab yetame: «Mam na n kɩtame tɩ Babilond naab a Nebukatnedzaar sẽn yaa dĩm-dãmb dĩmã yi rɩtg sẽnẽ n wa zab ne Tɩɩr tẽngã. Yẽnda na n waa ne wiidi, saar-dãmba, wed-rʋʋdba, la tãb-bi-kʋʋngo.

⁸ La yẽnda na n sãama fo kom-pugli nins sẽn be-b wetẽ wã ne zabr sʋʋga. Bãmb na n tuu bogd n zam tom-dʋy n gilg foom. La b na n tilga gãn wa lalg n kogl b meng n zab ne foom.

⁹ Yẽnda na n tã y lalsã ne zab-te-bɛd n wã, la b siig y gãsdã ne ra-zoob-bɛda.

¹⁰ Yẽnda na n wa ne wed-mo-kʋʋngo, hal tɩ wiidã wubsg lud yãmba, la b wiidi wã ne b saar-dãmbã na n kɩtame tɩ f lalsã rigimdi. La bãmb sã n wa na n tũ tẽnga rignoor n kẽ tẽnga pʋga, tɩ yaa wa tẽng b sẽn zoe n zab n deege.

¹¹ Yẽnda wiidã nao na n taba y tẽngã soayã fãa, a na n kʋ y nebã ne zabr sʋʋga, la a lub y kug-viginds sẽn yaa yãmb pãng zĩigã tẽnga.

¹² B na n wʋka y arzegsã tɩ yɩ b paoongo, la b zɛ yãmb leebgã teedo, la b siig y lalsã, la b lub y ro-neebã, la b wʋk y kugã ne y raadã, la y tẽngã tom n lob koomã pʋga.

¹³ Mam na n kɩtame tɩ y yɩɩlã bʋrg sɛ, tɩ b ra leb n wʋm pends rãamd ye.

¹⁴ Mam na n kɩtame tɩ y tẽngã lebg pĩig tɩ b yɛdgd zĩm-gãmbã a zugu. La b kõn tol n leb n me foom yɛs ye. Maam a Sẽn-Ka-Saab n gome. Yaa Zu-soab a Sẽn-Ka-Saab n yeele.»

¹⁵ Ad Zu-soab a Sẽn-Ka-Saab sẽn gomd ne Tɩɩr nebã n yetẽ: «Fo lʋɩɩsã rãamde, la sẽn kiidbã yãbrã, la nebã kʋʋb sã n wa yik fo pʋgẽ, tẽms nins sẽn be koom sʋkã ka na n dig sɩda?

¹⁶ La tẽms nins fãa sẽn be koom noorã nanambs na n siga b naamã gɛy zut n yees b naam futã, la b yees b fut nins b sẽn kãdã. Rabeem-kãseng na n kẽe bãmb tɩ b zĩnd tẽnga. La wakat fãa, bãmb na n yɛɛsdame, la b pɛleng na n yɩka fo yĩnga.

¹⁷ Bãmb na n wiisa fo yĩng n yeel foom yaa: ‹Kayto! Foom a tẽng ning yʋʋr sẽn dag n yi, foom a tẽng ning ko-kãsengã zug nebã sẽn dag n wat n tigimdẽ, n yaa tẽng sẽn tar pãng ko-kãsengã pʋgẽ wã, fo sãamame n menem! Fo nebã rag n kẽesda tẽms nins sẽn gũbg foomã neb rabeem!

¹⁸ Moasã, tẽms nins koom sẽn gũbgã na n diga ne rabeem fo lʋɩɩsã daare. Tẽms nins ko-kãsengã sẽn gũbgã zĩi ne rabeem fo menengã yĩnga.›

¹⁹ N-yẽe! Zu-soab a Sẽn-Ka-Saab yetame: ‹Mam sã n wa kɩt tɩ fo lebg tẽng sẽn yaa raboogo, wa tẽms nins ned sẽn ka be b pʋsẽ wã. Mam sã n wa kɩt tɩ zĩ-zulumsẽ koom zẽk n lim foom, tɩ ko-kãsemsã lim foom,

²⁰ mam na n kɩtame tɩ f naag neb nins sẽn sigd zĩ-zulumsẽ wã, n bʋʋg sẽn ki-b hal kʋdem wẽndẽ wã. Mam na n kɩtame tɩ f zĩnd tẽngã zĩ-zulumsẽ wã, ne neb nins sẽn sigd bog-zulungẽ wã n yɩ wa kʋdem-wẽndẽ raboodã, tɩ ned ra leb n zĩnd f pʋgẽ ye. Mam na n kɩtame tɩ nin-vɩɩsã tẽng tall ziiri.

²¹ Mam na n kɩtame tɩ f lebg bũmb sẽn kõt pelen-yɩka, la fo kõn leb n yɩ baa fɩ. B na n baoo foom la b kõn tol n leb n yãnd-f abada. Maam a Zu-soab a Sẽn-Ka-Saab n yeele.› »