Ezekiyɛl 25 - WẼNNAAM SEBRE 2014

Pĩnd-n-bãngr goam Amo nebã yĩnga

¹ Sẽn-Ka-Saab yeela maam yaa:

² «Ninsaala, wẽnemd n tees Amo nebã sẽnẽ n togs pĩnd-n-bãngr goam b wɛɛngẽ.

³ Yeel Amo nebã tɩ b kelg Zu-soab a Sẽn-Ka-Saab koɛɛga! Ade, Zu-soab a Sẽn-Ka-Saab yetame: ‹Yãmb laa ha, ha, ha›, b sẽn dẽgem m sɛk zĩigã, la b sãam m tẽngã n tall Zʋʋda nebã n kẽng yembdã yĩnga.

⁴ Bõn-kãng yĩnga, mam na n basame tɩ buud nins sẽn be yaangã soog yãmba. Bãmb na n tilga b rot y tẽnga pʋgẽ n zĩnd be n dɩ y koodã la b yũ y tẽngã bĩisim.

⁵ Mam na n kɩtame tɩ Raba lebg yʋgma bãgre, tɩ Amo nebã tẽng lebg rũm-bãooneg bãgre. Woto, yãmb na bãng tɩ mam yaa Sẽn-Ka-Saabo.»

⁶ Ad Zu-soab a Sẽn-Ka-Saab sẽn yeta: «Yãmb wẽe nug-poak n yɩg n tirs ne sũ-noog n maan y toor kae ne toog ning sẽn paam Israyɛllã.

⁷ Bõn-kãng yĩnga, bãng-y tɩ mam na n wilga yãmb m pãngã. Mam na n basame tɩ bu-zẽmsã fã yãmba. Mam na n yiisa yãmb buud a taabã sʋka, mam na n menesa yãmb tẽms pʋse, mam na n sãama yãmba. Woto, yãmb na bãng tɩ mam yaa Sẽn-Ka-Saabo.»

Pĩnd-n-bãngr goam Moaab nebã yĩnga

⁸ Zu-soab a Sẽn-Ka-Saab yetame: «Moaab nebã ne Seyɩɩr nebã yeelame tɩ Zʋʋda buudã me yaa wa buud a taabã fãa.

⁹ Woto yĩnga, mam na n kɩtame tɩ b wa zab ne tẽms nins sẽn be Moaab toadgẽ wã. Bãmb na n zaba ne a tẽmsã, a tẽms nins sẽn yaa neeb n yɩɩdã. Yaa Bɛt-Yesimote, Baall-Mewõ ne Kiriyatayim.

¹⁰ Mam na n naaga bãmb ne Amo nebã n kõ buud nins sẽn be yaangã tɩ b sooge, sẽn na n yɩlẽ tɩ b ra leb n tẽeg Amo nebã sẽn be buud a taabã sʋkã yell ye.

¹¹ Mam na n sɩbga Moaab nebã. Woto, b na bãng tɩ mam yaa Sẽn-Ka-Saabo.»

Pĩnd-n-bãngr goam Edom yĩnga

¹² Zu-soab a Sẽn-Ka-Saab yetame: «Edom nebã sẽn dok b sũur ne Zʋʋda buudã yĩnga, bãmb ninga b meng taale.

¹³ Bõn-kãng yĩnga, Zu-soab a Sẽn-Ka-Saab yetame: ‹Mam na n tẽega m nug n zab ne Edom, mam na n menesa ninsaalbã ne rũmsã, mam na n kɩtame t'a lebg raboogo, sẽn sɩng ne Teman n tɩ tãag Dedan tẽngã. Bãmb na n paa tãpẽ.

¹⁴ Mam na n tũnuga Israyɛll sẽn yaa mam nebã n dok m sũur ne Edom. Israyɛll na n maana bãmb wa sẽn zems mam sũ-puugrã ne m sũ-kãbrã. Woto, bãmb na bãng mam sũ-dokrã sẽn yaa bũmb ninga. Maam a Zu-soab a Sẽn-Ka-Saab n yeele.› »

Pĩnd-n-bãngr goam Filistẽ-dãmbã yĩnga

¹⁵ Zu-soab a Sẽn-Ka-Saab yetame: «Filistẽ-dãmbã sẽn maan sũ-dokre, n dok b sũur ne kisgri, la ne b sũur fãa, n dat n sãamã yĩnga, la beem ning bãmb sẽn tar wakat fãa wã yĩnga,

¹⁶ Zu-soab a Sẽn-Ka-Saab yetame: ‹Mam na n tẽega m nug Filistẽ-dãmbã zugu. Mam na n yiisa Kerɛt nebã, la m kɩt tɩ sẽn be-b ko-kãsengã noorã meneme.

¹⁷ Mam na n doka m sũur ne bãmba, ne sũ-puug-kãsemse. Mam sã n wa rok m sũurã ne bãmb n sɛ, la b na n bãng tɩ mam yaa Sẽn-Ka-Saabo.› »