Ezekiyɛl 21 - WẼNNAAM SEBRE 2014

Pĩnd-n-bãngr goam Negɛɛv weoogã yĩnga

¹ Sẽn-Ka-Saab goma ne maam n yeele:

² «Ninsaala, wẽnemd f neng n tees nug-goabg sẽnẽ n togs pĩnd-n-bãngr goam n mong-a bʋʋm. Togs pĩnd-n-bãngr goam n keoog Negɛɛv weoogã.

³ Yeel Negɛɛv weoogã yaa: ‹Kelg Sẽn-Ka-Saab koɛɛga.› Ade, Zu-soab a Sẽn-Ka-Saab yetame. ‹Mam na n yõgna bugum fo pʋgẽ t'a rɩ tɩ-maasã fãa ne tɩ-koeemsã fãa. Bug-kãng sẽn witã ka na n tol n ki ye. Bugmã na n dɩɩ nensã fãa, sẽn sɩng ne nug-goabg n tɩ tãag nug-rɩtgo.

⁴ Nebã fãa na n yãame tɩ yaa maam a Sẽn-Ka-Saab n yõgen bugmã, la a ka na n tol n ki ye.› »

⁵ Dẽ, mam yeelame yaa: «Wii! Zu-soab a Sẽn-Ka-Saabo, b gomda mam yell n yetẽ tɩ mam wẽeda yel-bũn bala.»

⁶ Sẽn-Ka-Saab goma ne maam n yeele:

⁷ «Ninsaala, wẽnemd f neng n tees Zeruzalɛm sẽnẽ n togs pĩnd-n-bãngr goam n mong a pʋʋsg zĩisã bʋʋm. La f togs pĩnd-n-bãngr goam n sagl Israyɛll nebã.

⁸ Yeel Israyɛll tẽn-gãongã tɩ maam a Sẽn-Ka-Saab yetame: ‹Ade, mam zabda ne foom. Mam na n wõoga m zabr sʋʋg n menes nin-tɩrsã ne nin-wẽnsã sẽn be fo pʋgẽ wã.

⁹ Mam sẽn na n menes nin-tɩrsã ne nin-wẽnsã yĩnga, mam sʋʋgã na n yi a wʋʋgẽ n kʋ b fãa, sẽn sɩng ne nug-goabg n tɩ tãag nug-rɩtgo.

¹⁰ Woto, bãmb fãa na n bãngame tɩ yaa maam a Sẽn-Ka-Saab n wõog m sʋʋgã, la m ka na n leb n sui-a a wʋʋgẽ ye.

¹¹ La foom a ninsaala, wõose, sulg ne sũ-sãanga, wõos bãmb nifẽ.

¹² La b sã n sok foom tɩ yaa bõe tɩ f wõosdẽ, bɩ f yeel-b tɩ yaa kibar n wate, la a sã n wa, nebã fãa sũy na n sãamame tɩ b nusã pãng sɛ, tɩ b yamã yuusi, tɩ b rũmã rigi. Ade, a watame, a taame. Maam a Zu-soab a Sẽn-Ka-Saab n yeele.› »

Koɛɛga, zabr sʋʋg wɛɛngẽ

¹³ Sẽn-Ka-Saab goma ne maam n yeele:

¹⁴ «Ninsaala, togs pĩnd-n-bãngr goamã! Yeel tɩ maam a Sẽn-Ka-Saab yetame: ‹Zabr sʋʋga! Zabr sʋʋga! Sʋʋga saasame, b sõog-a lame t'a pɩnda.

¹⁵ B saas-a-la kʋʋb yĩnga. B ruug-a lame t'a tõe n yãge. Yaa tõnd sũur na yɩ noog sɩda? M biigã dasaar paoogda tɩɩg buudã fãa.

¹⁶ B rɩk-a lame n kɩs tɩ b ruugi, tɩ nug tõe n tall-a n zabe. B saas-a lame, b saasa zabr sʋʋgã, b sõog-a lame n ning-a nin-kʋʋdã nugẽ.

¹⁷ Ninsaala, yãb n wiisi. Bala, b wõoga sʋʋgã n na n sɩbg m nebã. B wõog-a lame n na n sɩbg Israyɛll nanambsã fãa. B naaga bãmb ne m nebã n kʋ ne sʋʋgã. Dẽ yĩngã, bɩ f pĩis f ger ne sũ-sãanga.

¹⁸ Bala, yaa makre. La dasaar ning sẽn paoogd-a wã sã n sãame, na n yɩɩ bõe moasã? Zu-soab a Sẽn-Ka-Saab n yeele.

¹⁹ Foom a ninsaala, togs pĩnd-n-bãngr goamã, pãb nug-pogse. Bɩ sʋʋgã kɛ naoor a yi, a kɛ naoor a tã. Sʋʋgã yaa sãoong sʋʋga, yaa sãoon-kãseng sʋʋg n gũbg bãmba.

²⁰ Sẽn na n yɩlẽ tɩ bãmb raoodã booge, la sẽn na n yɩlẽ tɩ pãn-komsem wʋsg kẽ-ba. Mam na n diga bãmb ne zabr sʋʋg b rignoyẽ wã fãa, Kayto! B maan-a lame t'a tõe n yãgda. B maan-a-la kʋʋb yĩnga.

²¹ B sẽn na n bool foom zĩig ning fãa, bɩ f kɛ n leb rɩtgo, segl n kɛ n leb goabga!

²² Mam me na n pãba nug-pogse, la m na n basame tɩ m sũ-puugrã maan a tʋʋmd n tãag a tɛka. Mam yaa Sẽn-Ka-Saabo, yaa maam n yeele.› »

B gũbga Zeruzalɛm n deeg-a

²³ Sẽn-Ka-Saab goma ne maam n yeele:

²⁴ «Foom a ninsaala, tuk soay a yiib Babilond dĩmã zabr sʋʋg sẽn na n tũ n wa. Soay a yiibã fãa na n yii tẽng a yembr pʋgẽ. Gʋls bãnd n ning sor fãa sẽn dabd tẽng fãa pʋgẽ sɩngrẽ.

²⁵ Tuk sor zabr sʋʋgã sẽn na n tũ n wa Raba sẽn yaa Amo nebã tẽngẽ wã ne Zʋʋda la Zeruzalɛm sẽn yaa tẽng sẽn gũbg ne lalsã.

²⁶ Bala, Babilond dĩmã tɩ yalsa so-palempaasẽ, a yalsa so-pɩʋʋgẽ n na n bʋg bagre. Yẽnda zugsda a loko, la a sokd a bõn-naandse, la a get rũng sãoorẽ.

²⁷ La bagrã bãnd ning sẽn dag n be a rɩtg nugẽ wã yãka Zeruzalɛm, tɩ b na n yãk zab-teed nins b sẽn tar n tãad rot n lubdẽ wã n tɩ zab ne-a, n kɩt tɩ sãoong zĩndi, tɩ b kaas zabr kaasg a yĩnga. B na n tilga zab-teed nins b sẽn tar n tãad rot n lubdẽ wã n tees a rignoyã, b na n zama tom dʋya, la b tu bok n gũbg-a.

²⁸ Zeruzalɛm dãmbã wẽenegã yĩnga, bãmb tagsdame tɩ bagrã Babilond dĩmã sẽn bʋgã yaa zaalem.» La Babilond dĩmã tẽeg-b-la b kongrã, la rẽnda yĩng n kɩt tɩ b na n tall-b n kẽng yembdã.

²⁹ Bõn-kãng yĩnga, Zu-soab a Sẽn-Ka-Saab yetame: «Yaa yãmb sẽn puk y beegrã, la y yel-manesmã fãa sẽn wilg y yel-wẽnã yĩng n kɩt tɩ b tẽeg y kongrã yelle, bala, tẽeg-kãng na n waa ne sɩbgr yãmb zugu. Yãmb na n lʋɩ Babilond dĩmã nugẽ.

³⁰ Foom a Israyɛll na-wẽng sẽn yaa nin-kʋʋda, fo sɩbgrã daar watame, yaa daar ning kongrã sẽn na n ta a tɛka!»

³¹ Zu-soab a Sẽn-Ka-Saab yetame: «Yãk a zug peen-vindgã, fõk a naam maanfã. Bũmbã fãa na n tekame! Sẽn zẽkã na n paama sikri, la sẽn sikã na n paama zẽkre.

³² Raboogo, raboogo! Yaa raboog bala! Mam na n kɩtame tɩ Zeruzalɛm lebg raboogo. Bũmbã fãa zoe n tekame! La yõwã ka na n zĩndi, hal tɩ soab ning sẽn na n kao-a bʋʋdã wa, tɩ m kõ-a tẽngã.»

Amo nebã sɩbgre

³³ Foom a ninsaala, togs pĩnd-n-bãngr goamã! Yeel tɩ ad Zu-soab a Sẽn-Ka-Saab sẽn gomde, Amo nebã ne b paoogrã wɛɛngẽ. Yeel yaa: ‹Sʋʋgã! B wõoga sʋʋgã, b sõog-a-la kʋʋb yĩnga, b sõog-a-la sãoong yĩnga, b sõog-a lame t'a tõe n yãge!›

³⁴ Yãmb belgr vẽnegrã ne y zĩrẽ bagrã pʋgẽ, b na n kooda yãmb nin-wẽnsã sʋka. B kooda yãmb neb nins daarã sẽn wate, wakat ning kongrã sẽn na n ta a tɛkã.

³⁵ Lebs-y y sʋʋgã a wʋʋgẽ. Bala, mam na n kaoo fo bʋʋd zĩig ning b sẽn naan foomã, tẽng ning fo sẽn yitẽ wã.

³⁶ Mam na n sika m sũ-yikrã yãmb zugu. Mam sũ-puugrã na n dɩɩ yãmb wa bugum. Mam na n basa yãmb nin-toos nusẽ, mam na n basa yãmb neb sẽn mi sãoong nusẽ.

³⁷ Bugum na n dɩɩ yãmba. Y zɩɩm na n daaga y tẽngã pʋgẽ. B ka na n leb n tẽeg yãmb yell yɛs ye. Yaa maam a Zu-soab a Sẽn-Ka-Saab n yeele.