Ezekiyɛl 20 - WẼNNAAM SEBRE 2014

Israyɛll kɩɩsg kibare

¹ Yembdã loogr zugẽ tɩ yʋʋm yopoɛɛlẽ, kiuug a nu soabã rasem piig daare, Israyɛll kãsem-dãmbã sʋk neb kẽer wa n zĩnda mam taoor n na n sok Sẽn-Ka-Saab n bãng b raabo.

² La Sẽn-Ka-Saab goma ne maam n yeele:

³ Ninsaala, gom ne Israyɛll kãsem-dãmbã n yeel-b tɩ maam a Zu-soab a Sẽn-Ka-Saab yetame: Yaa sẽn na n bao mam daab la y sẽn wa wã bɩ? Maam a Sẽn-Ka-Saab sẽn vɩ wã wẽendame n yetẽ tɩ m kõn bas tɩ y sok maam bũmb ye. Maam a Zu-soab a Sẽn-Ka-Saab n yeele.

⁴ Fo ka na n bʋ bãmb bʋʋd sɩda? Ninsaala, fo ka na n bʋ bãmb bʋʋdo? Wilg bãmb yel-beed nins bãmb yaab-rãmbã sẽn maanã!

⁵ Yeel bãmb tɩ Zu-soab a Sẽn-Ka-Saab yetame: Daar ning mam sẽn yãk Israyɛll nebã, mam zẽka m nug n wẽen ne a Zakoob yagensã, la m vẽneg m meng ne bãmb Ezɩpt tẽnga. Mam zẽka m nug n wẽen ne bãmb n yeel tɩ m yaa Sẽn-Ka-Saab sẽn yaa bãmb Wẽnnaam.

⁶ Badaare, mam zẽka m nug n wẽen ne bãmb n yeel tɩ m na n yiisa bãmb Ezɩpt tẽng n tall n kẽng tẽng mam sẽn zoe n yãk n bĩng-ba, tẽng sẽn tar bĩisim ne sɩɩd wʋsgo, tẽng sẽn yaa neer n yɩɩd tẽmsã fãa.

⁷ Mam yeela bãmb yaa: Bɩ yãmb ned kam fãa lob yel-yood nins a sẽn get tɩ noom-a wã! Da rẽgm-y y mens ne Ezɩpt wẽn-naandsã ye! Mam yaa Zu-soab a Sẽn-Ka-Saab sẽn yaa yãmb Wẽnnaam.

⁸ Bãmb tõdgame n ka sak n na n kelg maam ye. Bãmb ned ba a yembr ka bas yel-yood nins a sẽn dag n get tɩ noom-a wã ye. La bãmb ka bas Ezɩpt wẽn-naandsã ye. Mam dag n yeelame tɩ m na n basame tɩ m sũ-kãbrã sig bãmb zug Ezɩpt tẽnga, tɩ m na n kɩtame tɩ m sũ-puugrã rɩ bãmb n tãag a tɛka.

⁹ La baoosgo, mam maana a woto mam yʋʋrã yĩnga, sẽn na yɩl tɩ mam yʋʋrã ra paam paoogr buud nins Israyɛll nebã sẽn dag n beẽ wã ye. Mam dag n vẽnega m meng ne bu-kãens n kɩt tɩ Israyɛll nebã yi Ezɩpt tẽnga.

¹⁰ Mam yiisa bãmb Ezɩpt tẽng n tall-b n kẽng we-raoogã pʋgẽ.

¹¹ Mam kõo bãmb m noyã la m wilg bãmb m no-tũuds nins ninsaal sẽn tog n tũ n paam n vɩɩmdã.

¹² Sẽn paas me, mam kõo bãmb m vʋʋsg rayã tɩ yɩ bãnd maam ne bãmb sʋka, tɩ b tõe n bãng tɩ yaa maam a Zu-soab a Sẽn-Ka-Saab n welg bãmb toore.

¹³ La Israyɛll buudã kɩɩsa maam we-raoogã pʋga. Bãmb ka tũ m noyã ne m no-tũuds nins ninsaal sẽn tog n tũ n paam n vɩɩmdã ye. Bãmb rẽgma mam vʋʋsg rayã hal tɩ loog nugu. Mam yeelame tɩ m na n basame tɩ m sũ-puugrã maan a tʋʋmd ne bãmb we-raoogã pʋga, sẽn na n yɩl n menes-b zãnga.

¹⁴ Baoosg zãnga, mam maana woto m yʋʋrã yĩnga, tɩ m yʋʋrã ra wa paam paoogr bu-zẽms nins sʋk mam sẽn yiis bãmb b nifẽ Ezɩpt tẽngã ye.

¹⁵ La we-raoogã pʋgẽ, mam zẽka m nug n wẽen tɩ m ka na n leb n tall bãmb n taas tẽng ning mam sẽn dag n kãab bãmbã ye. Yaa tẽng sẽn tar bĩisim ne sɩɩd wʋsgo, n yaa neer n yɩɩd tẽms a taabã fãa.

¹⁶ Mam sẽn wẽen woto wã yaa tɩ bãmb kɩɩsa m minindã, la b ka sak m tõodã ye, la b sãama m vʋʋsg rayã, bãmb sũyã sẽn dag n loe ne b wẽn-naandsã yĩnga.

¹⁷ La mam zoee bãmb nimbãaneg n ka sãam bãmb ye, la m ka menes bãmb zãng we-raoogã pʋgẽ ye.

¹⁸ Mam yeela bãmb kambã we-raoogã pʋgẽ yaa: «Ra tũ-y y ba-rãmbã noyã, ra sak-y b no-tũudsã, la y ra rẽgem y mens ne b wẽn-naandsã ye.

¹⁹ Mam yaa Zu-soab a Sẽn-Ka-Saab sẽn yaa yãmb Wẽnnaam. Sak-y m noyã, la y kẽn wa sẽn zems m no-tũudsã.

²⁰ Welg-y mam vʋʋsg rayã toore, tɩ b yɩ bãnd maam ne yãmb sʋka, tɩ nebã tõe n bãng tɩ mam yaa Sẽn-Ka-Saab sẽn yaa yãmb Wẽnnaam.»

²¹ La kambã me yik n kɩɩsa maam. Bãmb ka sak m noyã, la b ka kẽn wa sẽn zems m no-tũuds nins ninsaal sẽn tog n tũ n paam n vɩɩmdã ye. Bãmb dẽgma mam vʋʋsg rayã. Mam yeelame tɩ mam na n basame tɩ m sũ-puugrã maan a tʋʋmd ne bãmb we-raoogã pʋg n tãag a tɛka.

²² Baoosgo, mam yõbga m nugu, n maan a woto m yʋʋrã yĩnga, tɩ m yʋʋrã ra wa paam paoogr bu-zẽms nins sʋk mam sẽn yiis bãmb b nifẽ Ezɩpt tẽngã ye.

²³ We-raoogã pʋgẽ, maam n leb n zẽk m nug n wẽen n yeel bãmb tɩ m na n kɩtame tɩ b sãeeg n kẽ bu-zẽmsã sʋka, la m kɩt tɩ b sãeeg n zĩnd tẽmsã fãa pʋsẽ.

²⁴ Bala, bãmb dag n ka sakd m minindã ye. Bãmb dag n kɩɩsda m tõodã la b sãamd m vʋʋsg rayã, n bas n get b yaab-rãmbã wẽn-naandse.

²⁵ Yaa maam n leb n kõ bãmb tõod sẽn ka sõmbe, la minind b sẽn ka tõe n tũ n paam n vɩɩmd ye.

²⁶ Mam kɩtame tɩ b rẽgem b mens ne b kũunã, bãmb sẽn wa n dɩkd b kom-dẽemsã n yõogd bugmã. Mam bas-b-la woto sẽn na n yɩlẽ tɩ sũ-sãang yõk-ba, tɩ b bãng tɩ mam yaa Sẽn-Ka-Saabo.

Wẽnnaam na n menesa wẽn-naands pʋʋsgã

²⁷ Woto yĩnga, ninsaala, gom ne Israyɛll buudã n yeel-b tɩ maam a Zu-soab a Sẽn-Ka-Saab yetame: «Yãmb yaab-rãmbã rag n leb n maana sẽn kis n paoog maam.

²⁸ Mam talla bãmb n ta tẽng ning mam sẽn dag n zẽk m nug n wẽen tɩ m na n kõo bãmbã pʋga, la bãmb wẽnemd n gesa kunkub nins fãa sẽn zẽkã, la b ges tɩɩg ning sẽn tar maasem wʋsgã. Bãmb maana b maandã beenẽ, la b wa ne b kũun n yik m sũuri. Bãmb waa ne kũun toor-toor sẽn tar yũ-noogo, la b raag b bõn-yũudl kũunã.

²⁹ Mam soka bãmb yaa: Maoong kʋʋb zĩig ning yãmb sẽn kẽngẽ wã yaa bõe? Dẽ, b ket n boonda zĩ-kãens tɩ maoong kʋʋb zĩis hal tɩ ta rũndã.»

³⁰ Woto yĩnga, yeel Israyɛll buudã tɩ Zu-soab a Sẽn-Ka-Saab yetame: «Da maan-y wa y yaab-rãmbã n dẽgem y mens ye. Da maan-y lagem-n-taar ne bãmb yel-yoodã ye.

³¹ Yãmb sẽn wa ne y kũunã, la y sẽn dɩk y kamb n maan maand n yõog bugmã, yãmb dẽgma y mens ne y wẽn-naandsã fãa hal tɩ ta rũndã. Israyɛll buudu, mam na bas tɩ yãmb sok maam bũmbu? Maam a Zu-soab a Sẽn-Ka-Saab sẽn vɩ wã wẽendame n yetẽ tɩ m ka na n bas tɩ y sok maam bũmb ye!

³² Yãmb sẽn tagsd n dat bũmb ningã kõn tol n yɩ ye.» Yãmb yetame: «Tõnd dat n yɩɩ wa buud a taabã, wa buud nins sẽn be tẽms a taab pʋsã. Tõnd datame n waoog tɩɩsã ne kugã.»

³³ Maam a Zu-soab a Sẽn-Ka-Saab sẽn vɩ wã wẽendame n yetẽ, hakɩɩka, mam na n sooga yãmb ne pãnga, la m tẽeg m nugã n sɩbg-y ne sũ-yikri.

³⁴ Mam na n tẽega m nugã sẽn tar pãngã n yiis yãmb tẽms nins yãmb sẽn sãeeg n be b pʋsẽ wã ne sũ-yikri.

³⁵ Mam na n talla yãmb n kẽng bu-zẽmsã we-raoogẽ, la m na n bʋʋ ne yãmb beenẽ neng ne nenga.

³⁶ Mam sẽn bʋ ne y yaab-rãmbã Ezɩpt we-raoogã pʋgã, mam na n bʋʋ ne yãmb me. Maam a Zu-soab a Sẽn-Ka-Saab n yeele.

³⁷ Mam na n kɩtame tɩ yãmb pɩʋʋg mam gʋlgã tẽngre, la mam na n tɛɛ yãmb wa sẽn zems kaoolã.

³⁸ Mam na n yiisa tõatbã ne sẽn kɩɩsd-b maamã yãmb sʋka. Mam na n yiis-b-la tẽng ning pʋg b sẽn be n yaa sãambã, la bãmb ka na n leb Israyɛll tẽngẽ wã ye. Dẽ, yãmb na n bãngame tɩ mam yaa Sẽn-Ka-Saabo.

³⁹ Yãmb a Israyɛll buudu, Zu-soab a Sẽn-Ka-Saab yetame: «Bɩ ned kam fãa kell n waoog a wẽn-naandse! La bãng-y tɩ rẽ zugẽ, yãmb na n kelga maam. Yãmb kõn leb n wa ne kũuni, la y waoog y wẽn-naandsã n sãam m yʋ-sõngã ye.

⁴⁰ Bala, yaa mam tãn-sõngã zugu, Israyɛll tãn-lug-lugã zugu, la Israyɛll buudã fãa, ne neb nins fãa sẽn be tẽngã pʋgẽ wã na n waoog maam. Yaa beenẽ la mam na n deeg bãmb ne sũ-noogo, la m yeel-y tɩ y wa ne y yamleoog kũunã, ne y dẽenem biis kũunã, la bũmb nins fãa yãmb sẽn dat n kõ wã.

⁴¹ Mam sã n wa yiis yãmb buud a taabã sʋka, la m yiis yãmb tẽms nins yãmb sẽn dag n sãeeg n be b pʋsẽ wã n wa tigme, mam na n deeg-y-la wa kũun sẽn tar yũ-noogo. Mam na n tũnuga yãmb n wilg m sõmblmã yãmb sʋka, tɩ buud a taabã fãa yãnde.

⁴² Mam sã n tall yãmb n lebg n leb Israyɛll tẽngẽ wã, tẽng ning mam sẽn dag n zẽk m nug n wẽen n yeel tɩ m na n kõ y yaab-rãmbã, yãmb na yaool n bãng tɩ mam yaa Sẽn-ka-Saabo.

⁴³ Yaa beenẽ la yãmb na n tẽeg y manesmã, ne bũmb nins fãa y sẽn dag n maan n dẽgem y mensã yelle. Yãmb na n kisga y mense, tʋʋm-wẽns nins fãa yãmb sẽn maanã yĩnga.

⁴⁴ Israyɛll buudu, mam sã n wa maan bõn-kãng ne yãmb mam yʋʋrã yĩnga, la ka wa sẽn zems yãmb manesem-wẽngã ne y tʋʋm-kɛgã, yãmb na yaool n bãng tɩ mam yaa Sẽn-Ka-Saabo. Yaa maam a Zu-soab a Sẽn-Ka-Saab n yeele.»