Ezekiyɛl 2 - WẼNNAAM SEBRE 2014

Wẽnnaam tʋma a Ezekɩyɛll Israyɛlle

¹ Koɛɛgã yeela maam yaa: «Ninsaala, yik n yals yĩngr tɩ m gom ne-fo.»

² La a sẽn yeel maam woto wã bal yee, sɩɩg n wa n kẽ maam n kɩt tɩ m yik n yals yĩngri. Dẽ, mam dag n kelgda ned ning sẽn gomd-a ne maamã.

³ A yeela maam yaa: «Ninsaala, yaa maam n tʋmd foom Israyɛll nebã nengẽ, buud ning sẽn yaa tõatã nengẽ, buud ning sẽn kɩɩs-a maamã nengẽ. Bãmb ne b yaab-rãmbã kɩɩsa maam hal n tãag rũndã.

⁴ Mam tʋmda foom nin-bãmbã sẽn yaa sũ-keglem dãmb ne nin-tõtsã nengẽ tɩ f tɩ yeel-b tɩ yaa Zu-soab a Sẽn-Ka-Saab n gomde.

⁵ B kelgɩ woo, b ka kelg woo, b na n bãngame tɩ Wẽnnaam no-rɛɛs n be b sʋka. Bala, bãmb yaa buud sẽn yaa tõata.

⁶ La foom a ninsaala, da zoe bãmb ye, da zoe b goamã rabeem ye. Bala, fo bee ne neb sẽn yaa wa gõose, la wa gõ-payãndse la fo na n zĩnda nams zutu. Da zoe b goamã rabeem ye, la ra bas tɩ b nensã yɛɛs foom ye. Bala, yaa buud sẽn yaa tõata.

⁷ Bãmb kelgɩ foom woo, b ka kelg-f woo, togs-b mam goamã! Bala, b yaa nin-tõtse.

⁸ La foom a ninsaala, kelg mam sẽn yet foomã: ‹Ra yɩ tõat wa nin-bãmbã sẽn yaa buud sẽn yaa tõatã ye! Yaag f noor n deeg mam sẽn na n kõ foomã n wãbe!› »

⁹ Mam gesame, la m yãnda nug sẽn tẽeg n tees maam n zãad seb-pindga.

¹⁰ La b pilga sebrã mam taoore, la a pʋga ne a poorã fãa rag n tara gʋlsem. La goam ning sẽn gʋls be wã yaa wiisgu, yãbr la wõosg goamã.