Ezekiyɛl 19 - WẼNNAAM SEBRE 2014

Wiisg Israyɛll dĩm-dãmbã yĩnga

¹ Foom, pʋd sũ-sãang yɩɩll Israyɛll nanambsã yĩnga.

² Yeel yaa: «Yãmb ma wã rag n yaa bõe? Yẽnda rag n yaa gɩgem-yãanga, yẽnda rag n gãee gɩgmã sʋka. Yaa gɩgem-poalã sʋk la yẽnda wub a kambã.

³ Yẽnda wuba a biig a yembr t'a bɩ n lebg gɩgem-polle, n zãms zendengo, la a wãba ninsaalba.

⁴ Buud a taabã wʋmame tɩ b gomd a yelle, la yẽnda lʋɩ b bokã pʋgẽ tɩ b yõk-a. Bãmb ninga a yõorã bãng n tall-a n kẽng Ezɩpti.

⁵ La gɩgem-yãangã sẽn yã t'a gũubã yaa zaalem, t'a sẽn dag n tẽed bũmb ningã ka na n yɩ wã, a leb n yãka a biig a to a kambã sʋka, n wub t'a lebg gɩgem-polle.

⁶ Yẽnda rag n kẽnda gɩgma wã sʋka, n tol n lebg gɩgem-polle. La a zãmsa zendengo, la a wãba ninsaalba.

⁷ Yẽnda yõga pʋg-kõap n gãand ne pãnga, la a luba b pãng zĩisã n kɩt tɩ b tẽmsã lebg zĩ-vɩɩdo. Yẽnda kɛlengã kɩtame tɩ tẽngã ne bũmb nins fãa sẽn be a pʋgẽ wã sãame.

⁸ Bu-zẽms nins sẽn dag n karg n gũbg yẽnda wã yii zĩig zãng n wa zab ne yẽnda. Bãmb loba yẽnda gãmbr n na n yõke, la yẽnda lʋɩ b bokã pʋgẽ tɩ b yõk-a.

⁹ Bu-zẽmsã gaaga yẽnda ne bãng n ning yʋk pʋga. B talla yẽnda n kẽng Babilond dĩmã nengẽ. B tall-a lame n tɩ pag pãng zĩis pʋga, tɩ b ra leb n tol n wʋm yẽnda koɛɛg Israyɛll tãmsã zut ye.»

Wiisg reezẽ tɩɩgã yĩnga

¹⁰ Fo ma wã rag n wẽnda wa reezẽ tɩɩg wa foom. B rag n sela yẽnda koom noore, t'a rag n womd sõama, n tar wil wʋsgo, koomã sẽn waoogã yĩnga.

¹¹ Yẽnda rag n tara wil sẽn tar pãnga, tɩ b tõe n tall-b n maan naam dasaba. A woglmã rag n zʋʋga tɩɩsã fãa. A sẽn dag n yaa wokã yĩnga, la a wilã sẽn yaa wʋsgã kɩtame tɩ b ne-a.

¹² Bãmb võog-a-la ne sũ-yikr n lub tẽnga, la yaang sob-tʋʋlg n wa n kʋɩɩs a biisã tɩ b sʋʋge. B kʋʋsa a wil nins sẽn tar pãngã n bas-b tɩ b kʋɩ, la bugum dɩ-b lame.

¹³ La moasã, b tɩ sel-a-la we-raoogẽ wã, tẽng sẽn kʋɩ tɩ koom ka be a pʋgẽ ye.

¹⁴ Bugum n yi a wilẽ wã, n dɩ a wil-tobendã ne a biisã. La a ka leb n tar wil sẽn tar pãnga, tɩ b tõe n dɩk n maan naam dasab ye. Woto yaa sũ-sãang yɩɩlle, b yɩɩnd-a-la ne sũ-sãanga.