Ezekiyɛl 17 - WẼNNAAM SEBRE 2014

Pa-nand-tugr ne reezẽ tɩɩg yel-bũndi

¹ Sẽn-Ka-Saab goma ne maam n yeele:

² «Ninsaala, wẽ Israyɛll nebã yel-bũnd n togs-b kibare.»

³ Yeel bãmb tɩ maam a Zu-soab a Sẽn-Ka-Saab yetame: «Pa-nand-tug-kẽengã sẽn tar pɩg-bɛd kõbd sẽn yaa wogdã, t'a kõbgã yaa neerã, yɩkame n ta Libã, n yãk sɛɛdr tɩɩgã wil-gelengɛɛgã.

⁴ Yẽnda kaooga a will ning sẽn sãd n yɩɩd a taabã, n tall n kẽng toandbã tẽngẽ, n tɩ sela lɛɛbdbã tẽngẽ.

⁵ Yẽnda yãka tẽngã tɩ-tobeng a yembre, n tɩ ning tɩɩs bõeeb zĩigẽ. Yẽnda tɩ sel-a-la ko-kãseng noore, a sel-a-la wa yɩlga.

⁶ Tɩ-tobengã yiime n lebg reezẽ tɩ-kẽenga, la a rag n yaa pãare. A wilã rag n tãoome n tees pa-nand-tug-kẽengã sẽnẽ, t'a yẽgã sud n kẽ tẽngã. Tɩ-toabengã lebga reezẽ tɩɩga, n pus n maan wila.

⁷ Pa-nand-tugr a to me n dag n be n yaa bedre, n tar pɩg-bɛd t'a kõbdã yaa wʋsgo. Reezẽ tɩɩgã kɩ a yẽgã ne yão-beed zĩig ning b sẽn dag n sel-a wã n tão a yẽgã n tees pa-nand-tugrã sẽnẽ, la a wilã wẽnemd n tees-a lame n dat t'a kõ-a koom.

⁸ La b rag n sel-a-la zĩ-sõngẽ koom sẽn yaa wʋsg noore, t'a tõe n tão wil n wom biisi, n lebg reezẽ tɩɩg sẽn tar da-sãnde.»

⁹ Yeel bãmb tɩ maam a Zu-soab a Sẽn-Ka-Saab sokdame yaa: «Dẽ yĩnga, tɩ-kãngã na n yẽegame sɩda? Pipi pa-nand-tugrã ka na n võ a yẽgã la a yor a biisã n bas-a t'a kʋɩ, t'a wil-tobendã fãa wãk sɩda? A võogr ka baood pãnga, wall neb wʋsg ye.

¹⁰ B sẽn sel-a wã, a na n yẽegame sɩda? Sob-tʋʋlg sã n yi yaang n wa wẽ-a, a ka na n kʋɩ sɩda? A na n paa zĩig ning a sẽn yiẽ wã n kʋɩ.»

Yel-bũndã bilgri

¹¹ Sẽn-Ka-Saab goma ne maam n yeele:

¹² «Mam kotame tɩ f sok buud ning sẽn yaa tõatã n gese, b wʋmda yel-bũn-kãngã võor bɩ? Yeel-b tɩ Babilond dĩmã kẽnga Zeruzalɛm n tɩ yõk rĩmã ne a nanambsã n tall n kẽng Babilonde.

¹³ La a yãka na-biig a yembr rĩmã pendẽ, n maan kaool ne-a n kɩt t'a wẽene. La a tall tẽngã nin-kãsemsã n looge,

¹⁴ sẽn na n yɩlẽ tɩ rĩungã ra tol n yẽege, la b ra tol n zẽk b zugu, la b sak a kaoolã n tõog n vɩɩmde.

¹⁵ La rĩmã tõdgame n kɩɩs-a, la a tʋm neb Ezɩpt tɩ b tɩ kos wiidi, ne tãb-biis wʋsg n wa kõ-a. Ned ning sẽn maand a woto wã na n tõogame sɩda? A na n tõog n põsame? Yẽnda ka tõe n sãam kaoolã n tõog n põs ye!

¹⁶ Maam a Zu-soab a Sẽn-Ka-Saab sẽn vɩ wã wẽendame n yetẽ: «Hakɩɩka! Yaa rĩm ning sẽn kɩt tɩ yẽnda lebg rĩmã tẽngẽ, soab ning wẽeneg yẽnda sẽn sãbse, n sãam kaoolã, yaa nin-kãng nẽngẽ Babilond la a na n ki.

¹⁷ B sã n wa Zeruzalɛm n wa zam tom-dʋy la b tu bogd n na n menes neb wʋsg zabrã wakate, Faarõ ne a tãb-bi-kʋʋngã la a neb wʋsgã ka na n tõog n zab n sõng-b ye.

¹⁸ Yẽnda sẽn sãam kaoolã, a sãbsa wẽenegã. Yẽnda rag n dɩka sard n maan bõn-kãensã fãa. Yẽnda ka na n põs ye!»

¹⁹ Woto yĩnga, maam a Zu-soab a Sẽn-Ka-Saab sẽn vɩ wã wẽendame n yetẽ: «Hakɩɩka! Yaa mam wẽenegã la Israyɛll dĩmã sẽn sãbsã, yaa mam kaoolã la a sẽn sãamã. Mam na n kɩtame tɩ bõn-kãngã taal zĩnd a zugu.

²⁰ Mam na n loba m gãmbr n tilg-a, la m bẽdgã na n yõk-a lame. Mam na n talla yẽnda n kẽng Babilonde, la beenẽ, mam na n bʋ ne yẽnda sẽn maan sẽn kis n beeg maamã yĩnga.

²¹ Yẽnda tãb-bi-sulã neb nins fãa sẽn zoe wã na n paa tãpẽ. La tãb-biis nins sẽn na n kell-bã na n sãeega zĩig zãnga. Woto la y na n bãng tɩ yaa maam a Sẽn-Ka-Saab n gome.»

²² Ad Zu-soab a Sẽn-Ka-Saab sẽn yeta: «Mam na n yãka sɛɛdr tɩ-wok wil-gelengɛɛg n sele. Mam na n yãka wil-poll yẽnda wil nins sẽn sãdã zut n tɩ sel tãn-lug-lug zug m toore.

²³ Mam na n tɩ sel-a-la Israyɛll tãng ning sẽn lug n yɩɩd a taabã zugu. Yẽnda na n tãoo wil n wom biisi, la yẽnda na n lebga sɛɛdr tɩɩg sẽn tar da-sãnde. Liuuli buud fãa na n zĩnda yẽnda tẽngre, a wilã maasmẽ.

²⁴ Woto, weoogã tɩɩs fãa na n bãngame tɩ yaa maam la Sẽn-Ka-Saabo, la yaa maam n sik tɩɩg ning b sẽn dag n zẽkã, la m zẽk tɩɩg ning b sẽn dag n sikã, la yaa maam n kʋɩɩs tɩ-maasrã, la m kɩt tɩ tɩ-koɛɛngã ning puudu. Yaa maam a Sẽn-Ka-Saab n gome, la m na n maan-a lame.»