Ezekiyɛl 12 - WẼNNAAM SEBRE 2014

Yembd sẽn wat vẽnegre

¹ Sẽn-Ka-Saab goma ne maam n yeele:

² «Ninsaala, fo bee ne buud sẽn yaa tõata. Bãmb tara nin n tog n yã, la b ka rat n yãnd ye, b tara tʋb n tog n kelge, la b ka rat n kelg ye. Bala, bãmb yaa buud sẽn yaa tõata.

³ La foom a ninsaala, sẽb f teed yembd kẽnd yĩnga. Yi n loog yembd wĩnto-sʋk bãmb nifẽ! Yi zĩig ning fo sẽn beẽ wã n kẽng yembd zĩig a to, bãmb nifẽ. Daarninga, b na yãnd tɩ b yaa buud sẽn yaa tõata.

⁴ Fo na n yiisa f teedã wĩnto-sʋk bãmb nifẽ, la fo na n yii zaabr n loog bãmb nifẽ, wa yembsã.

⁵ Poog lalgã bãmb nifẽ, n tũ be n yi ne f teedã.

⁶ Rɩk f teedã n palg f bãok bãmb nifẽ. Yi ne f teedã ne lika. Lud f nengã n da ges tẽngã ye. Bala, mam datame tɩ yɩ bãnd Israyɛll buudã yĩnga.»

⁷ Dẽ, mam maana wa Sẽn-Ka-Saab sẽn dag yeel maamã: Mam yiisa m teedã wĩnto-sʋka, wa ned sẽn dabd yembd teedo. La sẽn ta zaabre, mam pooga lalgã ne m nugu, n yiis m teedã ne lika, n palg-a m bãok bãmb nifẽ.

⁸ La vẽkembeoog yibeoogo, Sẽn-Ka-Saab yeela maam yaa:

⁹ «Ninsaala, dẽ yĩnga, Israyɛll buudã sẽn yaa tõatã ka sok foom n ges yaa bõe la f maand sɩda?»

¹⁰ Yeel bãmb tɩ Zu-soab a Sẽn-Ka-Saab yetame: «Sɩbgr koe-kãngã yaa naab ning sẽn be-a Zeruzalɛmã yĩnga, la Israyɛll buudã sẽn be beenẽ wã yĩnga.

¹¹ Yeel yaa: Ade, mam yaa bãnd yãmb yĩnga. Mam sẽn maan bũmb ningã, yaa bõn-kãng n na n paam pidsg bãmb yĩnga: bãmb na n looga yembdo.

¹² Naab ning sẽn be bãmb sʋkã na n dɩka a teed n palg a bãok ne lik n yi. B na n pooga lalgã n yiis-a beenẽ. Yẽnda na n luda a nengã, sẽn na n yɩlẽ n da ges tẽngã ye.

¹³ Mam na n tẽega m gãmbrã yẽnda zugu, la yẽnda na n lʋɩɩ mam bẽdga pʋga. Mam na n talla yẽnda n kẽng Babilonde, Kalde rãmbã tẽngẽ. La yẽnda nif ka na n yãnd tẽngã ye, a na paa beenẽ n ki.

¹⁴ Mam na n sãeega neb nins fãa sẽn gũbg yẽnda wã, a sõgen-kambã, a gũudbã ne a tãb-biisã fãa zĩig zãnga, n kɩt tɩ b rig bãmb ne zabr sʋʋga.

¹⁵ Mam sã n wa sãeeg bãmb buud toay-toayã sʋka, la tẽmsã fãa pʋse. Woto, bãmb na bãng tɩ mam yaa Sẽn-Ka-Saabo.

¹⁶ La mam na n basa bãmb neb kẽer bãmb sʋkã sẽn na n põs zabr sʋʋg ne kom la bãn-longdsã, tɩ bãmb tõe n togs yel-beed nins bãmb sẽn maan bu-zẽms nins bãmb sẽn na n kẽngã sʋka. Woto, bãmb na bãng tɩ mam yaa Sẽn-Ka-Saabo.»

¹⁷ Sẽn-Ka-Saab goma ne maam n yeele:

¹⁸ «Ninsaala, fo na n dɩta f rɩɩbã la f rigda, la f yũud f koomã ne rabeem la yɛɛsgo,

¹⁹ la fo na n goma ne tẽngã neb n yeel-b yaa: ‹Ade, Zu-soab a Sẽn-Ka-Saab sẽn gomd ne Zeruzalɛm nebã sẽn be Israyɛll soolmã pʋgã n yetẽ: ‹Bãmb na n dɩta b rɩɩbã ne rigbu, n yũud b koomã ne pelen-yɩka. Bala, tẽngã na n sãamame, la b na n yiisa bũmb nins fãa sẽn be-a pʋgẽ wã, wẽng ning neb nins fãa sẽn be beenẽ wã sẽn maanã yĩnga.

²⁰ Tẽms nins neb sẽn be b pʋsẽ wã na n lebga raboodo, la tẽngã na n sãamame. Woto, yãmb na bãng tɩ mam yaa Sẽn-Ka-Saabo.»

Sẽn-Ka-Saab gomdã na n paama pidsgu

²¹ Sẽn-Ka-Saab goma ne maam n yeel yaa:

²² «Ninsaala, yaa bõe yel-bũnd la sẽn gilgd yãmb sʋk Israyɛll tẽngã pʋgẽ wã? Yãmb yetame: ‹Wakatã wogendame tɩ vẽnegr ba a yembr ket n ka paamd pidsg ye!›

²³ Bõn-kãng yĩng bɩ f yeel-b yaa: Ad Zu-soab a Sẽn-Ka-Saab sẽn yeta: ‹Mam na n kɩtame tɩ yel-bũn-kãngã sɛ. B ka na n leb n wẽ-a Israyɛll pʋgẽ ye.› Yeel-b tɩ wakat n wate, tɩ vẽnegr buud fãa na n paam pidsgu.

²⁴ Vẽnegr sẽn yaa belgre, ne zĩrẽ bãngr goam kõn leb n zĩnd Israyɛll soolmã pʋg ye.

²⁵ Bala, mam yaa Sẽn-Ka-Saabo, la mam sẽn na n yeel bũmb ningã, m na n yeel-a lame. Yaa gomd sẽn na n paam pidsg yãmb zamaanã pʋga, n ka leb n kaoos ye. Buud sẽn yaa tõata, mam sẽn na n yeel bũmb ningã, m na n pids-a lame. Maam a Zu-soab a Sẽn-Ka-Saab n yeele.»

²⁶ Sẽn-Ka-Saab goma ne maam n yeel yaa:

²⁷ «Ninsaala, ad Israyɛll buudã sẽn yete: Vẽnegr ning a sẽn tarã yaa wakat sẽn ket n be taoor yĩnga. Yẽnda sẽn togsd pĩnd-n-bãngr goam ninsã yaa wakat sẽn ket n zãr yĩnga.»

²⁸ Woto yĩnga, yeel-b tɩ Zu-soab a Sẽn-Ka-Saab yetame: «Gomd ning fãa mam sẽn na n yeel na n paama pidsg n ka leb n kaoos ye. Maam a Zu-soab a Sẽn-Ka-Saab n yeele.»