Ezekiyɛl 11 - WẼNNAAM SEBRE 2014

B na n kaoo Zeruzalɛm bʋʋdo

¹ Sɩɩg n zẽk maam n tall n kẽng Sẽn-Ka-Saab roogã rignoor ning sẽn tees-a yaang sẽnẽ. Rignoorẽ wã, raop pisi la a nu n dag n be beenẽ. La bãmb sʋkã, mam yãnda a Azʋʋr biig a Yazaniya ne a Benaya biig a Pelatɩya sẽn yaa nebã nanambsã.

² Sɩɩgã yeela maam yaa: «Ninsaala, yaa nin-bãmbã la sẽn set sed-wẽnsã, la b saagd saag-wẽns tẽn-kãngã pʋgã.»

³ Bãmb yetame: «Tõnd ka segl n sɛ tɩ me rot ye. Bala, tẽngã yaa wa rʋko, tɩ tõnd yaa wa nemdo!»

⁴ Woto yĩnga, ninsaala, togs-b pĩnd-n-bãngr goam n mong-b bʋʋm.

⁵ Dẽ, Sẽn-Ka-Saab sɩɩgã waa mam zugu, n yeel maam yaa: Yeel a woto: «Ade, Sẽn-Ka-Saab yetame: ‹Israyɛll buudu! Yaa woto la yãmb gomda! La bũmb nins sẽn be yãmb tagsgẽ wã, mam miime.

⁶ Yãmb kɩtame tɩ yãmb sẽn kʋ neb nins tẽn-kãngã pʋgẽ wã sõor paase. Yãmb pids-a soayã ne kũum.

⁷ Bõn-kãng yĩng kɩtame, tɩ Zu-soab a Sẽn-Ka-Saab yetẽ: «Neb nins yãmb sẽn kʋ n dʋʋg tẽngã pʋgã yaa wa nemdo, la tẽngã yaa wa rʋko, la sã n yaa ne yãmba, b na n diga yãmb n yiis tẽngã pʋga.› »

⁸ Zu-soab a Sẽn-Ka-Saab yetame: «Yãmb zoeta zabr sʋʋga, la mam na n kɩtame tɩ b wa zab ne yãmb ne zabr sʋʋga.»

⁹ Mam na n yiis-a yãmb tẽngã pʋga, mam dɩka yãmb n bas ne bu-zẽmse! La mam na n kaoo yãmb bʋʋdo.

¹⁰ Yãmb na n kii ne zabr sʋʋga, mam na n kaoo yãmb bʋʋd Israyɛll tẽngã toadgẽ, la woto, yãmb na bãng tɩ mam yaa Sẽn-Ka-Saabo.

¹¹ Tẽngã ka na n yɩ wa rʋk yãmb yĩnga, tɩ yãmb yaa wa nemd a pʋgẽ ye: «Yaa Israyɛll toadgã sẽnẽ la m na n kao y bʋʋdo.

¹² Woto, yãmb na n bãngame tɩ mam yaa Sẽn-Ka-Saabo. Bala, yãmb ka sak mam tõodã ne m noyã ye. Yãmb bas n tũu buud a taabã sẽn gũbg yãmbã minindu.»

¹³ Dẽ, mam sẽn ket n togsd pĩnd-n-bãngr goamã wakate, la a Benaya biig a Pelatɩya sẽn be kũumẽ. Mam lʋɩ n fõgna m neng tẽng n kelem n yeele: «Kayto! Zu-soab a Sẽn-Ka-Saabo, yãmb meng n na n baas Israyɛll bu-kellã!»

Wẽnnaam nebã sẽn sãeegã tigingu

¹⁴ Sẽn-Ka-Saab goma ne maam n yeele:

¹⁵ «Ninsaala, yaa fo saam-biisã, ne fo roagdbã, la Israyɛll buudã zãng ne Zeruzalɛm nebã n gomd n yetẽ: ‹Zãag-y y meng ne Sẽn-Ka-Saabo, bala, b kõo tõnd tẽn-kãngã tɩ d sooge.› »

¹⁶ Bõn-kãng yĩnga, bɩ f togs bãmb tɩ Zu-soab a Sẽn-Ka-Saab sẽn yeel la woto: «Baa mam sã n dag n yiisa bãmb n sãeeg-b bu-zẽmsã sʋka, baoosgo, wakat bilf pʋgẽ, mam yɩɩ zĩig sẽn welg toor bãmb yĩng tẽng ning bãmb sẽn kẽngã pʋgẽ.»

¹⁷ Yaa rẽ tɩ Zu-soab a Sẽn-Ka-Saab yetẽ yaa: «Ade, mam na n tigsa yãmb buud a taabã fãa sʋka, mam na n yiisa yãmb tẽms nins yãmb sẽn sãeeg n tɩ beẽ wã, la m leb n kõ yãmb Israyɛll tẽngã.

¹⁸ Bãmb sã n wa ta Israyɛll tẽngẽ wã, b na n menesa yel-yoodã ne yel-beedã fãa sẽn be beenẽ wã.

¹⁹ Mam na n kõo bãmb sũur a yembre, la m kõ yãmb yam-paalga. Mam na n yãka b sũurã sẽn yaa wa kugrã, n lebs n ning sũur sẽn yaa neongo,

²⁰ tɩ b tõe n sak m tõodã ne m minindã, la b tũ-ba. Woto, bãmb na n yɩɩ mam neba, la mam na n yɩɩ bãmb Wẽnnaam.

²¹ La sã n yaa ne neb nins sũyã sẽn noom ne b mens yel-yoodã la yel-beedã, mam na n kɩtame tɩ b yel-manesmã taal lebg n lʋɩ b zugu. Maam a Zu-soab a Sẽn-Ka-Saab n yeele.»

Wẽnnaam ziirã yi n basa Zeruzalɛm

²² Serubẽ-rãmbã sẽn dag n be ne ruzãnt-rãmbã yidga b pɩgsã, la Israyɛll Wẽnnaamã ziir dag n bee yĩngri, bãmb zugẽ.

²³ Sẽn-Ka-Saab ziirã zẽkame n bas tẽngã n tɩ be tãng ning sẽn be tẽngã yaangã zugu.

²⁴ Sɩɩg n zẽk maam vẽnegr pʋgẽ, n tall n kẽng yembsã sẽn be Kalde rãmbã soolem pʋgẽ wã sʋka, ne Wẽnnaam sɩɩgã pãnga. La mam sẽn dag n paam vẽnegr ningã zẽk n loogame n bas maam.

²⁵ Dẽ, mam togsa yembsã koees nins fãa Sẽn-Ka-Saab sẽn vẽneg maamã.