A Ɛstɛɛre 9 - WẼNNAAM SEBRE 2014

Zʋɩf-rãmbã roka b sũur ne b bɛɛba

¹ Kiuug piig la a yiib soabã sẽn yaa Adaar kiuugã rasem piig la a tãab daare, daar ning rĩmã sẽn kõ noore, la a yiis tõog n wilgd nebã sẽn dag n tog n maanã daar sẽn ta, daar ning Zʋɩf-rãmbã bɛɛb sẽn dag n tẽed tɩ bãmb na n tõoga Zʋɩf-rãmbã, yellã wẽnemdame, n lebg tɩ yaa Zʋɩf-rãmbã n tõog b bɛɛbã.

² Bãmb tẽmsã fãa pʋsẽ, rĩm a Asiruus soolem-dãmbã fãa pʋse, Zʋɩf-rãmbã tigma taab n na n zab ne neb nins sẽn dag n dat bãmb ne wẽngã, la ned ba a yembr ka tõog n yals bãmb taoor ye. Bala, Zʋɩf-rãmbã rabeem yõka nebã fãa.

³ Soolem toay-toayã nanambsã fãa, ne b taoor dãmbã, la b Guvɛrneer-dãmbã, ne rĩmã tʋmtʋmdbã fãa sõnga Zʋɩf-rãmbã, a Mardoose rabeem sẽn yõk bãmbã yĩnga.

⁴ Sɩd me, a Mardoose rag n lebga nin-kãseng rĩmã zak pʋga. A Mardoose yʋʋrã rag n saaga soolem-dãmbã fãa pʋse, bala, a rag n paamda pãng n paasdẽ.

⁵ Woto, Zʋɩf-rãmbã kɛɛ b bɛɛbã ne zabr sʋʋs n kʋ, n sãam-ba, la bãmb maana b bɛɛbã wa b sẽn date.

⁶ Suuz na-tẽngã pʋgẽ bal a yeyn-yeyn, Zʋɩf-rãmbã kʋʋ neb kobs-nu n sãam-b zãnga.

⁷ La b kʋ a Parsãndata, ne a Dalfõ, la a Aspata,

⁸ ne a Porata, la a Adaliya, ne a Aridata.

⁹ La a Parmasta, ne a Arizayi, la a Aridayi, ne a Vayizata.

¹⁰ Bãmb yaa a Hamedata biig a Haman sẽn yaa Zʋɩf-rãmbã bɛyã kom-dibli piigã. B sẽn kʋ-bã, b ka sɩɩs b paoongã ye.

¹¹ La badaar bala, b togsa rĩmã neb nins sõor b sẽn kʋ Suuz na-tẽngã pʋgã.

¹² La rĩmã yeela rĩm-poak a Ɛstɛɛr yaa: «Suuz na-tẽngã pʋga, Zʋɩf-rãmbã kʋʋ neb kobs-nu n sãamb-a, n paas ne a Haman kom-dibli piigã me. La rĩm soolem a taabã pʋse, na n yɩɩ a wãna? La fo kosgã yaa bʋgo, kos tɩ f na n paamame. Wilg maam fo sẽn datã, la fo na n paamame.»

¹³ A Ɛstɛɛr yeelame yaa: «Sã n taa rĩmã yam, bɩ b kõ Zʋɩf-rãmbã sẽn be Suuz na-tẽngã noore, tɩ beoogo, bɩ bãmb maan wa b sẽn maan dũndã wã, la b luul a Haman kom-dibli piigã kũum da-lugds zutu.»

¹⁴ La rĩmã yeelame tɩ b maan a woto. B moona noorã b sẽn yãkã Suuz na-tẽngã pʋga, la b luula a Haman kom-dibli wã kũum da-lugds zutu.

¹⁵ Dẽ, Zʋɩf-rãmb nins sẽn be Suuz na-tẽnga pʋgã leb n tigma taab Adaar kiuugã rasem piig la a naasã daare, la b kʋ neb kobs-tã, la b ka sɩɩs b paoongã ye.

¹⁶ La Zʋɩf-rãmb a taab nins sẽn be rĩmã soolem toay-toayã pʋsẽ wã, tigma taab n na n zab n fãag b yõore, la b kogl b meng ne b bɛɛbã. Dẽ, bãmb kʋʋ neb tus-pis-yopoe la a nu, la bãmb ka sɩɩs b pãoongã ye.

¹⁷ Bõn-kãens fãa maana Adaar kiuugã rasem piig la a tãab daarã. La kiuugã rasem piig la a naasã daare, bãmb vʋʋsame. La badaar yɩɩ tigri, la sũ-noog wʋsg daare.

¹⁸ Zʋɩf-rãmb nins sẽn be Suuz na-tẽngã sẽn tigim taab kiuugã rasem piig la a tãab ne a rasem piig la a naas daarã, b vʋʋsa kiuugã rasem piig la a nu wã daare, n kɩt t'a lebg tigr la sũ-noog wʋsg daare.

¹⁹ Yaa rẽ n kɩte, tɩ Zʋɩf-rãmb nins sẽn be-b tẽn-kɩremsẽ wã, tẽms nins sẽn ka gũbg ne lalsã pʋsã, maan Adaar kiuugã rasem piig la a naas daarã tɩ yaa tigri, la sũ-noog wʋsg daare, la daar ned kam fãa sẽn kõt a yak kũuni.

Tẽegr tigr sɩngre

²⁰ A Mardoose gʋlsa bõn-kãens fãa sɛb pʋse, n tʋm Zʋɩf-rãmb nins fãa sẽn be rĩm a Asiruus soolem-dãmbã fãa pʋsẽ wã, sẽn pẽ-ba, la sẽn zãr-ba.

²¹ A Mardoose rag n wilgda Zʋɩf-rãmbã tɩ b rɩk Adaar kiuugã rasem piig la a naas daarã, ne a rasem piig la a nu daarã, tɩ yɩ tigr la sũ-noog wʋsg daar yʋʋmd fãa.

²² Bala, yaa rasem-kãens pʋgẽ, la Zʋɩf-rãmbã fãag b mens b bɛɛbã nugẽ. La yaa kiu-kãng pʋgẽ, la Zʋɩf-rãmbã sũ-sãangã tek n lebga sũ-noogo, tɩ bãmb wiisgã lebg tigri. La a wilg Zʋɩf-rãmbã tɩ b togame n maan ra-kãens tɩ yɩ tigr la sũ-noog daare. La da-kãense, ned kam fãa tog n bao bũmb n kõ a yaka, la a bao kũun n kõ naong rãmba.

²³ Dẽ, Zʋɩf-rãmbã saka a Mardoose sẽn gʋls n yeel bãmb bũmb ningã, n kɩt tɩ lebg mining bãmb yĩnga, n yaa tigri.

²⁴ Bala, Agaag ned a Hamedata biig a Haman sẽn yaa Zʋɩf-rãmbã fãa bɛ wã rag n tagsame n dat n sãam zʋɩf-rãmbã buudu. Yẽnda rag n maana poeere, n dag n dat n sãam Zʋɩf-rãmbã sũyã, n menes-b zãnga.

²⁵ La a Ɛstɛɛr sẽn kẽng rĩmã nengẽ wã, rĩmã gʋlsame n yeele: «Bɩ saag-wẽng ning a Haman sẽn dag n saagd n dat n maan Zʋɩf-rãmbã, lebg n sig a Haman mengã zugu. La bɩ b luul yẽnda ne a kom-dibli wã fãa ra-lugdg zugu.»

²⁶ Woto, Zʋɩf-rãmbã sẽn geelg bũmb nins fãa b sẽn gʋls sebrã pʋgã, ne bũmb nins fãa bãmb sẽn yãndã, la bũmb nins fãa sẽn paam bãmbã, b yãka rasem-kãense, n kɩt tɩ b boondẽ tɩ Purim, sẽn dat n togs tɩ poeere.

²⁷ Dẽ, Zʋɩf-rãmbã vigla mining sẽn ka tõe n teke, bãmb ne b yagensã yĩnga, la neb nins fãa sẽn dat n naag bãmbã yĩnga. La yʋʋmd fãa bãmb na n dɩka ra-kãensã a yiibã tɩ yɩ tigr daare, wa b sẽn gʋlsã.

²⁸ Yaa rẽ n kɩte, tɩ Zamaan fãa pʋgẽ, ne buud fãa pʋgẽ, la soolem fãa pʋgẽ, ne tẽng fãa pʋgẽ, b tog n maana ra-kãens tẽegr tigri. La da-kãens sẽn yaa Purim daarã ka tõe n vaal Zʋɩf-rãmbã buud sʋk ye. Bãmb yagensã ka na n tol n yĩm a yell ye.

²⁹ A Abigayɩll bi-pugl a Ɛstɛɛr sẽn yaa rĩm-poakã, ne a Mardoose rɩka noor ning b sẽn tarã n leb n gʋls sebr naoor a yiibẽ soaba, n na n wilg tɩ Purim tigrã sɩd yaa tõogo.

³⁰ Bãmb tʋma sɛb tɩ b tɩ kõ Zʋɩf-rãmb nins fãa sẽn be rĩm a Asiruus soolem koabg la pisi la a yopoe wã fãa pʋsẽ. Sebrã yetame tɩ b vɩɩmd bãane, la b maan sɩda.

³¹ Bãmb sẽn maanã yaa sẽn na n kɩte, tɩ b vigl ra-kãens tɩ yaa Purim tigr rayã, wa zʋɩf a Mardoose ne rĩm-poak a Ɛstɛɛr sẽn dag n yãke, bãmb mensã ne b yagensã yĩngã, tɩ yaa no-loeere, la wiisg rayã.

³² A Ɛstɛɛr vɩɩmã kibar kɩtame tɩ Purim tigrã lebg miningu. Yaa woto yĩng n kɩt tɩ b gʋls-a seb-kãngã pʋga.