A Ɛstɛɛre 5 - WẼNNAAM SEBRE 2014

A Ɛstɛɛr kẽnga rĩmã nengẽ

¹ La rasem a tãabã daar sẽn ta, a Ɛstɛɛr yeelga a naamã fut n kẽ rĩmã na-yirã pʋgẽ zakã pʋga, n yals na-roogã noore. Wakat-kãnga, rĩmã rag n zao a naamã geer zug na-roogã pʋga, t'a nengã tees rignoorã.

² Wakat ning rĩmã sẽn yãnd rĩm-poak a Ɛstɛɛr sẽn yas na-roogã noorã, a sũurã yɩɩ noog ne a Ɛstɛɛre. Dẽ, rĩmã rɩka a sãnem dasaarã a sẽn zãadã n tees a Ɛstɛɛre, la a Ɛstɛɛr kolgame n sɩɩs dasaarã.

³ Rĩmã soka a Ɛstɛɛr yaa: «Rĩm-poak a Ɛstɛɛre, yaa bõe n tar foom? Fo rata bõe? Kose, baa sã n yaa mam soolmã pʋɩ-sʋka, fo na n paam-a lame.»

⁴ A Ɛstɛɛr leoka rĩmã yaa: «N'na! Sã n taa yãmb yam, bɩ yãmb ne a Haman tũ taab n wa tigr ning mam sẽn segl yãmb yĩng rũndã wã.»

⁵ Dẽ, rĩmã yeelame yaa: «Pẽdg-y-yã a Haman t'a sak n wa a Ɛstɛɛr boolgã.» La rĩmã ne a Haman tũu taab n kẽng tigr ning a Ɛstɛɛr sẽn seglã.

⁶ Bãmb sẽn wa n maand tigrã wakate, rĩmã soka a Ɛstɛɛr yaa: «Fo kosgã yaa bʋgo, kos tɩ f na n paamame. Wilg maam fo sẽn datã, baa sã n yaa mam soolmã pʋɩ-sʋka, fo na n paamame.»

⁷ A Ɛstɛɛr leokame yaa: «Ad mam kosgã ne m datmã:

⁸ Sã n yaa tɩ rĩmã nonga maam, la b sã n na n sɩd leoka mam kosgã, n kõ maam m sẽn datã, bɩ rĩmã ne a Haman tũ taab n wa tigr ning mam sẽn na n segl yãmb yĩng beoogã, la m na yaool n leok rĩmã sokrã.»

A Haman baood n na n luula a Mardoose

⁹ Badaare, a Haman yii rĩm-poak a Ɛstɛɛr zakẽ wã ne kɩdengo, la sũ-noog wʋsgo. Yẽnda sẽn wa n ta rĩm rignoorẽ wã, a yãnda a Mardoose t'a zĩ zãongẽ wã. A Mardoose ka yiki, la a ka serg a zĩigẽ a Haman taoor ye. Dẽ, a Haman sũurã yika wʋsg ne a Mardoose.

¹⁰ La yẽnda tõog a sũurã n kuil a yiri, n kɩt tɩ b tɩ bool a zo-rãmbã ne a pag a Zerɛɛs tɩ b wa.

¹¹ A Haman wilga bãmb yẽnda arzegsã sẽn yaa to-to, la a kambã sõore, la rĩmã sẽn zẽk yẽnda to-to n yɩɩd nanambs a taabã, ne rĩmã zakẽ tʋmtʋmdbã fãa wã.

¹² A Haman yeel-b lame yaa: «Sẽn paase, rĩm-poak a Ɛstɛɛr ka bool ned a to t'a tũ rĩmã n wa tigr ning yẽnda sẽn seglã ye, yaa maam m yembr bala.» La a yeel-b yaa: «Rĩm-poakã leb n boola maam tɩ m leb n tũ rĩmã n wa beoogo.

¹³ La yõwã fãa yaa zaalem mam yĩnga, mam sẽn ket n yãt Zʋɩf a Mardoose t'a zĩ rĩmã zak noorã.»

¹⁴ Dẽ, yẽnda pag a Zerɛɛs ne a zo-rãmbã fãa yeela yẽnda yaa: «Bɩ f kɩt tɩ b maan da-lugdg ta zãntlmã ta kãntɩɩg pis-nu, la beoog yibeoogo, bɩ f kos rĩmã tɩ b kɩt tɩ b luul a Mardoose da-lugdgã zugu. Dẽ, fo tõe n tũu rĩmã n kẽng tigrã ne sũ-noogo.» La gomdã yɩ a Haman noogo, t'a kɩt tɩ b maan da-lugdgã.