A Ɛstɛɛre 4 - WẼNNAAM SEBRE 2014

A Mardoose kosa a Ɛstɛɛr t'a yõk rĩmã sɛɛga

¹ A Mardoose sẽn wʋm bũmb ning fãa sẽn maanã, yẽnda pãrsa a futã n yeelg boto, n yug a meng tompeglem n na n kẽng tẽngã pʋgẽ, la yẽnda rag n zẽka a koɛɛg n wiisd ne sũ-toogo.

² La yẽnda kolga rĩmã rignoor n yalse, bala, ned rag n ka segd n yeelg bot n tũ rĩm rignoorã n kẽ ye.

³ Soolem nins fãa pʋs rĩmã sẽn yãk noor ne bũmb ningã sẽn ta, a yɩɩ sũ-sãan-kãseng Zʋɩf-rãmbã sʋka. B rag n loeta noore, n yãbd n wiisdẽ. Neb wʋsg rag n gãee bot zutu, la tompeglem pʋga.

⁴ A Ɛstɛɛr tʋmtʋmd-pogsã ne a zu-soben-dãmbã wa n togsa yẽnda bõn-kãnga, la rĩm-poak a Ɛstɛɛr sũurã sãama wʋsgo. A Ɛstɛɛr kɩsa fut tɩ b tɩ kõ a Mardoose t'a yeeg a botã la a yeelge, la a Mardoose zãgsame.

⁵ Dẽ, a Ɛstɛɛr kɩtame tɩ b bool a Hatak sẽn yaa zu-soab ning rĩmã sẽn dag n yãk t'a get a Ɛstɛɛr tʋʋmã yellã, n tʋma t'a tɩ sok a Mardoose n gese, yaa bõe yelle, la bõe yĩng tɩ yẽnda maand woto.

⁶ A Hatak yi n kẽnga a Mardoose nengẽ, zĩig ning nebã sẽn segd taab n sõsdã sẽn tees rĩmã rignoorã.

⁷ Dẽ, Mardoose togsa yẽnda bũmb ning fãa sẽn paam yẽnda wã, la ligd ning sõor a Haman sẽn kãab t'a na n waa ne tɩ b ning rĩmã ligd-bĩngr roogẽ wã, Zʋɩf-rãmbã sãoongã yĩngã.

⁸ La yẽnda rɩka rĩmã sẽn yãk noor ning Zʋɩf-rãmbã sãoong wɛɛngẽ wã, b sẽn moon Suuz na-tẽngã pʋgẽ wã sebr n kõ a Hatak t'a tɩ wilg a Ɛstɛɛre, la a togs-a yellã, n yeel-a t'a kẽng rĩmã nengẽ n tɩ yõk rĩmã sɛɛg n bõos-a sõngr a buudã yĩnga.

⁹ A Hatak wa n togsa a Ɛstɛɛr a Mardoose sẽn yeel yẽnda bũmb ningã.

¹⁰ A Ɛstɛɛr yeela a Hatak t'a tɩ togs a Mardoose yaa:

¹¹ «Rĩmã tʋmtʋmdbã ne nebã fãa sẽn be soolem toay-toayã fãa pʋsẽ wã miime tɩ tõog n be, la tõ-kãng yaa ned buud fãa yĩnga, tɩ ned ning fãa sẽn na n kẽng-a rĩmã nengẽ tɩ ka rĩmã n bool a soaba, nin-kãng tog n kiime, sã n yaa raoa wall paga. La yaa ned ning rĩmã sẽn na n dɩk a sãnem dasaarã n teesã n na n vɩɩmde. La sẽn kẽed mam wɛɛngẽ, yaa rasem pis-tã la woto, rĩmã sẽn ka bool maam tɩ m wa b nengẽ ye.»

¹² La b kẽng n tɩ togsa a Mardoose a Ɛstɛɛr sẽn yeel bũmb ningã.

¹³ Dẽ, a Mardoose tʋmame tɩ b tɩ yeel a Ɛstɛɛr yaa: «Ra tags tɩ yaa foom f yembr n na n põs Zʋɩf-rãmbã sʋka, fo sẽn be rĩmã zakẽ wã yĩng ye.

¹⁴ Bala, fo sã n sĩnd f noor yel-kãngã pʋga, Zʋɩf-rãmbã yolsg ne b fãagrã na n yii zĩig a to n wa, la foom ne f ba wã zak-rãmb na n sãama zãnga. Sẽn paase, ãnda n mi sã n ka yell a woto yĩng la fo sẽn lebg rĩm-poakã.»

¹⁵ A Ɛstɛɛr tʋmame tɩ b tɩ yeel a Mardoose yaa:

¹⁶ «Kẽng-y n tigm-y Zʋɩf-rãmb nins fãa sẽn be Suuz na-tẽngã pʋgẽ wã, tɩ y loe noor mam yĩnga, n da rɩ rɩɩbo, la y ra yũ koom, wĩndg la yʋng hal tɩ ta rasem a tãabo. La maam ne m tʋmtʋmd-pogsã me na n loee noor wa yãmba. Dẽ poore, mam na n kẽnga rĩmã nengẽ, baa ne tõogã sẽn gɩdgã. Ba sã n yaa tɩlɛ tɩ mam ki, mam na n kiime.»

¹⁷ Dẽ, a Mardoose kẽngame n tɩ maan bũmbã fãa wa sẽn zems a Ɛstɛɛr sẽn yeelã kɛpɩ-kɛpɩ.