A Ɛstɛɛre 3 - WẼNNAAM SEBRE 2014

A Mardoose ne a Haman beem

¹ Yel-kãens fãa loogr zugẽ, rĩm a Asiruus waooga Agaag ned a Hamedata biig a Haman n zẽk-a ne waoogr n kɩt t'a naamã yɩɩg a nanamb-taasã fãa.

² La rĩmã tʋmtʋmdb nins fãa sẽn dag n be rĩmã zak noorã, rag n yĩgimdidame n wõgemd a Haman taoor n waoogd-a. Rĩmã n dag n kõ noor tɩ ned ning fãa sẽn yãnd a Haman, a tog n wõgemd n waoog-a lame. La a Mardoose ka sak n na n yĩgimdi, wall a wõgemd a Haman taoor ye.

³ Rĩmã zaka tʋmtʋmdbã sẽn dag n zĩ Rĩmã rignoorã yeela a Mardoose yaa: «Bõe yĩng tɩ fo kɩɩsd rĩmã noore?»

⁴ La daar fãa bãmb da gomda ne a Mardoose, la yẽnda ra ka kelgd-b ye. Bala, yẽnda ra yetame t'a yaa Zʋɩfe. La bãmb tɩ togsa a Haman n na n gese, a Mardoose sẽn yeel tɩ yẽnda yaa zʋɩfã, a na n kell n talla a pĩnd yel-manesmã bɩ?

⁵ A Haman sẽn sɩd mik t'a Mardoose ka yĩgimdidã, la a ka wõgemded me n waoog yẽnda wã, a sũurã yika hal wʋsgo.

⁶ La Haman gesame tɩ yẽnda sã n kʋ a Mardoose a yembre, yaa zaalem ne yẽnda. Bala, b rag n wilga yẽnda, a Mardoose sẽn yaa buud ning neda. Dẽ, yẽnda yãka yam n baood n sãam a Mardoose nebã fãa sẽn yaa zʋɩf-rãmbã buudã, sẽn be rĩm a Asiruus soolem-dãmbã fãa pʋsã.

⁷ Rĩm a Asiruus sẽn deeg a naamã tɩ yʋʋm piig la yiiblẽ soabã, pipi kiuugã sẽn yaa Nisã kiuugã pʋgẽ wã, a Haman kɩtame tɩ b maan poeere, daar fãa zugu, sẽn sɩng ne pipi kiuugã n tɩ tãag kiuug piig la yiibẽ soabã sẽn yaa Adaar kiuugã, n dat n bãng daar ninga, wall kiuug ning sẽn zems ne yẽnda sẽn dat n maan bũmb ningã.

A Haman baood n sãamã Zʋɩf-rãmbã

⁸ Dẽ, a Haman yeela rĩm a Asiruus yaa: «N'na! Buud sẽn yaa toor n sãeeg n be yãmb soolem-dãmbã fãa pʋse, la bãmb tõodã welgda bãmb ne buud a taabã, la bãmb ka sakd rĩmã tõog ye.» Dẽ wã, yãmb sã n bas nin-kãensã tɩ b zĩ ne bãane, ka tar yõod ne yãmb ye.

⁹ A sã n taa rĩmã yam, bɩ b yãk tõog n kɩt tɩ b sãam-ba. La mam na n sõda Talã ligd tus-piig n ning rĩmã tʋmtʋmdb nins sẽn n get-b soolmã nugẽ, tɩ b tɩ ning rĩmã laog bĩngr zĩigẽ.

¹⁰ Dẽ, rĩmã pidga a nugbĩngã sẽn yaa nug-tikr bãndã, n kõ Agaag ned a Hamedata biig a Haman sẽn yaa Zʋɩf-rãmbã bɛ wã.

¹¹ Rĩmã yeela a Haman yaa: «Mam basda ligdã ne nebã fãa fo nugẽ. Bɩ f maan bãmb wa fo sẽn date.»

¹² Dẽ, pipi kiuugã rasem piig la tãabã daare, b boola rĩmã sɛb-gʋndbã tɩ b wa. La b gʋlsa a Haman sẽn yãk noor ningã fãa sɛb pʋsẽ, n na n kõ rĩmã kombɛɛmbã, nanambsã, la soolem toay-toayã gʋvɛrneer dãmbã, la buud toay-toayã nanambse. Soolem fãa ne a gʋlsem, la buud fãa me ne a goamã, la b gʋlsa rĩm a Asiruus yʋʋr yĩnga, n ning rĩmã nug-tikr bãnde.

¹³ La b tʋma seb-kɩtbã ne sɛbã, tɩ b saag soolem toay-toayã fãa pʋsẽ n kɩse: sɛbã rag n kõta noor tɩ b sãam Zʋɩf-rãmbã, n kʋ-ba, la b menes-b zãnga. B kom-bɩɩse, b nin-kẽemba, la pagbã ne kambã fãa, la b zɛ b paoongã. Sãoongã tog n yɩɩ daar a yembr pʋgẽ, yaa kiuug piig la yiib soabã sẽn yaa Adaar kiuugã rasem piig la tãabã daare.

¹⁴ La soolem fãa rag n tara noor ning b sẽn yãkã sebre, n tog n moon tɩ nebã fãa wʋm la b segl b mens ra-kãens yĩnga.

¹⁵ Rĩmã kõo sɛb-kɩtbã noor tɩ b yi tao-tao n looge. La b moona noor ning b sẽn yãkã Suuz na-tẽngã pʋga. Dẽ, rĩmã ne a Haman rag n zĩime n yũuda, tɩ Suuz na-tẽngã be sũ-sãang pʋga.