Esdras 3 - WẼNNAAM SEBRE 2014

Israyɛll nebã lebs n vigla pʋʋsgã

¹ Yʋʋmdã kiuug a yopoe soabã sẽn ta, Israyɛll nebã sẽn dag n be b tẽmsã pʋsẽ wã fãa tigma taab Zeruzalɛm, n lebg noor a yembre.

² La maan-kʋʋd a Yosadak biig a Zozoe ne a saam-biisã sẽn yaa maan-kʋʋdbã, ne a Seyaltiyɛll biig a Zorobabɛll ne a saam-biisã yikame n lebs n me Israyɛll Wẽnnaamã tẽn-kugrã, n na n maan maoong sẽn yõogd bugum beenẽ, wa sẽn gʋls Wẽnnaam dao a Moyiis tõogã pʋgẽ wã.

³ Baa ne bãmb sẽn dag n zoet tẽngã nebã sẽn be tẽngã pʋgã, bãmb lebs n mee tẽn-kugrã a pĩnd zĩigẽ wã. La bãmb maana maand sẽn yõogd bugum beenẽ yibeoog ne zaabre, n kõ Sẽn-Ka-Saabo.

⁴ Israyɛll nebã maana zãn tigri, wa sẽn gʋls tõogã sebr pʋgã. La bãmb maana maoong sẽn yõogd bugum daar fãa wa sẽn zems sõor ning tõogã sẽn yeelã.

⁵ La rẽ zugẽ, bãmb kell n maana maoong sẽn yõogd bugum wakat fãa. Yaa ki-paalg tigr maoongo, ne tig nins fãa Sẽn-Ka-Saab sẽn yeel tɩ b maana maando, la yamleoog kũunã b sẽn kõt Sẽn-Ka-saabã.

⁶ La kiuug a yopoe soabã pipi daarã bala, bãmb sɩngame n maan maand sẽn yõogd bugum n kõ Sẽn-Ka-Saabo. La baoosgo, b rag n nan ket n ka sɩng Wẽnnaam doogã meeb ye.

⁷ Rẽ poore, b baoo ligd n kõ kug-pɛɛsdbã ne ra-wãadbã. La b bao koodo, bõn-yũudla, ne kaam n kõ Sɩdõ ne Tɩɩr tẽng nebã, tɩ b tõe n tall Libã tẽngã sɛɛdr tɩɩsã ra-sĩdim n pɩʋʋg ko-kãsengã n wa Zafa, n wa kõ-ba. Bãmb maana wa Pɛrs-rãmbã rĩm a Siruus sẽn kõ noor tɩ b maan to-to wã.

⁸ Bãmb sẽn yi yembdã pʋg n wa Wẽnnaam doogã sẽn be Zeruzalɛm pugẽ wã tɩ yʋʋm yiiblẽ, kiuug a yiibẽ soabã pʋgẽ, a Seyaltiyɛll biig a Zorobabɛll ne a Yosadak biig a Zozoe, ne b saam-biisã sẽn ketã sẽn yaa maan-kʋʋdbã, la Leevi buudã, ne neb nins fãa sẽn yi yembdã weoog n wa wã yikame n sɩng tʋʋmã. Bãmb tũusa Leevi buudã neb nins sẽn tar yʋʋm pisi, la sẽn yɩɩd woto wã, n yeel-b tɩ b ges Sẽn-Ka-Saab roogã meeb yelle.

⁹ Leevi nebã, a Zozoe ne a kambã la a saam-biisã, a Kadmiyɛll ne a kambã sẽn yaa a Zʋʋda yagensã, ne a Henadaad kambã ne b yagensã naaga taab noor a yembr n na n ges tʋmtʋmdb nins sẽn tʋmd Wẽnnaam doogẽ wã yelle.

¹⁰ La tãn-metbã sẽn wa n yẽbg Sẽn-Ka-Saab roogã, b kɩtame tɩ maan-kʋʋdbã yeelg b maan-kʋʋr tʋʋmd futã, n tɩ yals beenẽ ne tãntãado, t'a Azaf yagensã sẽn yaa Leevi buudã zãad kɛma, tɩ b na n pẽg Sẽn-Ka-Saabo, wa Israyɛll dĩm a Davɩɩd sẽn dag n yeelã.

¹¹ Dẽ, bãmb dag n pẽgda Sẽn-Ka-Saabo, la b waoogd-ba, n yɩɩnd n deesd taab n yetẽ yaa: «Ad bãmb sɩd yaa sõngo, bala bãmb nonglmã paada wakat fãa Israyɛll yĩnga!» La nebã fãa kaasa ne pãng n pẽg Sẽn-Ka-Saabo, b sẽn yẽbg Sẽn-Ka-Saab roogã yĩnga.

¹² La maan-kʋʋdbã sʋk neb wʋsgo, ne Leevi buudã sʋk neb wʋsgo, la buudã taoor dãmb sʋk neb wʋsg sẽn yaa nin-kẽembã sẽn dag n yãnd pipi roogã, zẽka b koɛɛg n yãb wakat ning b sẽn wa n yẽbgd Wẽnnaam doogã bãmb nifẽ wã. La neb wʋsg rag n kaasda ne sũ-noogo.

¹³ Dẽ, nebã rag n ka leb n tõe n bãng sũ-noogã kaasgo, ne yãbrã bʋrg n bak ye. Bala, nebã rag n kaasda wʋsgo, tɩ ned tõe n zĩnd zĩ-zãrgẽ n wʋme.