Efɛɛz Rãmba 1 - WẼNNAAM SEBRE 2014

Pʋʋsem

¹ Maam a Poll sẽn yaa a Zeezi Kiris tẽn-tʋmd wa sẽn zems Wẽnnaam tʋlsmã n tʋmd seb-kãngã Wẽnnaam nebã ne neb nins sẽn be Efɛɛs n tũud a Zeezi Kirisã.

² Bɩ tõnd ba a Wẽnnaam ne tõnd Zu-soab a Zeezi Kiris kõ yãmb b barkã la b laafɩ wã.

Sɩɩg-sõng barka, Kiris maasem yĩnga

³ Pẽgr Wẽnnaam sẽn yaa tõnd Zu-soab a Zeezi Kiris ba wã! Bãmb sẽn kõ tõnd Sɩɩg-sõng bark buud fãa sẽn yit yĩngri, Kiris maasem yĩngã.

⁴ Wẽnnaam yãka tõnd Kiris maasem yĩng sẽn deng dũni naanego, tɩ tõnd yɩ neb sẽn yell bãmb taoor ye. Wẽnnaam nonglmã pʋga,

⁵ bãmb da pĩnd n yãka yam tɩ tõnd na n yɩɩ bãmb kamba, a Zeezi maasem yĩnga, a wa sẽn zems bãmb daabo, la sẽn noom bãmba.

⁶ Bõn-kãng yaa tɩ tõnd na zẽk bãmb barkã ziir b sẽn kõ tõnd bãmb Bi-riblã maasem yĩngã.

⁷ Yaa Kiris zɩɩmã maasem yĩng la tõnd paam fãagre, fãagr ning sẽn yaa yel-wẽnã sugr kũuni, sẽn zems Wẽnnaam barkã sẽn waoog wʋsgã,

⁸ bark ning Wẽnnaam sẽn kõ tõnd hal wʋsgo, n paas yam fãa ne bãngrã.

⁹ Wẽnnaam kɩtame tɩ tõnd bãng bãmb datmã yel-solemde, a wa sẽn zems yam-yãkr ning b sẽn da pĩnd n yãk Kiris pʋgẽ wã.

¹⁰ Wakatã sã n pidi, Wẽnnaam na n pidsa b yam-yãk-kãense. Bãmb na n tigsa bũmb nins fãa sẽn be yĩngri la sẽn be tẽng zugã tɩ b sak naab a yembre: Kirisã.

¹¹ Kiris maasem yĩnga, Wẽnnaam yãka tõnd n bĩng toore. Bãmb sẽn maand bũmb fãa wa b yamã sẽn yãke la wa b sẽn datã, bãmb pĩnd n tʋlsa tõndo,

¹² tɩ tõnd sẽn da pĩnd n tẽed Kirisã, tõnd na tʋm n kɩt tɩ nebã bãng bãmb ziirã.

¹³ Kiris maasem yĩnga, yãmb me sẽn wʋm sɩd koɛɛgã, yãmb fãagrã koe-noogã, yãmb tẽe bãmba, la b ning-y la bãnd sẽn yaa Sɩɩg-sõng b sẽn dag n kãabã.

¹⁴ Sɩɩg-sõng yaa kaset sẽn wilgd tɩ tõnd na n paama d pʋɩɩrã, sẽn yaa tɩ Wẽnnaam sẽn da neb ninsã na n dɩɩ naam tɩ yɩ Wẽnnaam ziiri.

Pʋʋsg yam la yam-vẽnegr yĩnga

¹⁵ Yaa woto yĩnga, mam me sẽn wʋm tɩ b gomd yãmb tẽeb ne Zu-soab a Zeezi wã yelle, la nonglem ning yãmb sẽn tar Wẽnnaam nebã fãa yĩngã yelle,

¹⁶ mam pʋʋsda Wẽnnaam bark yãmb yĩng n ka basdẽ ye. Mam tẽegda yãmb yell m pʋʋsg pʋgẽ.

¹⁷ Mam pʋʋsdame n kot tõnd Zu-soab a Zeezi Kiris Wẽnnaamã sẽn yaa Ba sẽn tar ziirã tɩ b na kõ yãmb yam la vẽnegr sɩɩga, n kɩt tɩ y bãng bãmba.

¹⁸ Mam pʋʋsdame tɩ Wẽnnaam na puk yãmb pʋ-tẽer ninã tɩ y bãng bõn-neer ning b sẽn bool yãmb tɩ ka tar paamã, la y bãng bãmb pʋɩɩr ning sẽn yaa arzegs sẽn be ziirã, Wẽnnaam nin-tũusdsã sẽn tarã.

¹⁹ Mam pʋʋsdame tɩ yãmb na bãng bãmb pãn kãsengã sẽn zem to-to, la a sẽn tʋmd tõnd sẽn yaa Kiris tẽedbã pʋsẽ, wa sẽn zems bãmb naamã pãng sẽn tʋmdã.

²⁰ Wẽnnaam wilga b pãn-kãsengã Kiris pʋgẽ, n vʋʋg-b tɩ b yi kũum sʋka, n kɩt tɩ b zĩ bãmb dɩtg Arzãn pʋga.

²¹ Wẽnnaam kɩtame tɩ Kiris yɩɩd rĩm-dãmba fãa la noyã fãa la pãensã fãa la naam fãa, la b yʋʋrã yɩɩda yʋyã fãa sẽn pʋtã, la ka dũndã zamaanã pʋg bal ye, la yaa ne zamaan ning sẽn watã me pʋgẽ.

²² Wẽnnaam kɩtame tɩ Kirisã so bũmb fãa, la b kɩt tɩ bãmb yɩ b tẽedbã fãa Zu-soab ne bũmb fãa.

²³ Kiris tẽedbã yaa Kirisã yĩnga. Kiris yalẽ wã fãa bee b nebã pʋgẽ, la b pida bũmb fãa ned fãa pʋgẽ.