Ebre rãmba 8 - WẼNNAAM SEBRE 2014

Sɛk ro-paalga, la kaool-paalga

¹ Ade, tõnd koɛɛgã d sẽn gomdã yẽgr la woto: Tõnd tara maan-kʋʋd kãsem sẽn zĩnd Wẽnnaam rĩungã geer dɩtgo, saasẽ.

² Bãmb la zĩ-sõngã sẽn yaa sɛk roog sɩd-sɩdã tʋmtʋmda. Yaa Zu-soabã n ti ro-kãngã, ka ninsaal ye.

³ Sɩd me, ned ning fãa b sẽn yãk t'a lebg maan-kʋʋd kãsma, yaa sẽn na n deeg kũunã ne maandã n kõ Wẽnnaam. Dẽ, yaa tɩlɛ t'a paam bũmb sẽn na kõ.

⁴ La bãmb sã n dag n beẽ tẽng zugu, b da pʋs n kõn yɩ maan-kʋʋd me wee! Bala neb a taab n be n kɩt Wẽnnaam kũunã wa sẽn zems tõogã sẽn yetã.

⁵ Kaorengã bãmb sẽn maandã yaa bũmb ning sẽn maand arzãnã wẽnego, la a mamsgo, wa Wẽnnaam sẽn pĩnd n wilg a Moyiis wakat ning a sẽn dag n dat n ti sɛk roogã. Wẽnnaam yeel-a lame yaa: Gese, fo na n maana bũmb fãa tɩ yɩ wa b sẽn wilg foom tãngã zug tɩ f ges n maanã.

⁶ Moasã wã, a Zeezi deega tʋʋmd sẽn yaa kãseng n yɩɩd rẽnda, hal n lebg kaool sẽn yaa-a sõama n yɩɩd pĩnd soabã sɛ-yõakda, la kaool‑kãng yẽbga kãabg sẽn ya sõmb n yɩɩd pĩnd dãmbã zutu.

⁷ Sã n da mikame tɩ pipi kaoolã zemsa zãng fasɩ, da ka yɩtẽ tɩlɛ tɩ b bao kaool a yiib soab ye.

⁸ Wẽnnaam goamã wilgame tɩ b lenga b nebã. B yeelame yaa: Sɩd me, Zu-soabã yetame tɩ day n wate, tɩ bãmb na n maan kaool-paalg ne Israyɛll buudã la ne Zʋʋda buudã.

⁹ Ka na n yɩ wa kaool ning mam sẽn dag n maan ne b ba-rãmbã, daar ning bãmb sẽn gãd b nus n tall-b n yiis Ezɩptã ye. Zu-soabã yeelame yaa: Bãmb mensã sẽn ka modg ne mam kaoolã, mam me ka ges b yell ye.

¹⁰ Zu-soabã yeelame yaa: Ad kaool ning mam sẽn na n maan ne Israyɛll buudã da-kãsemsã loogr zugẽ: Mam na n ninga m tõodã b yamẽ wã, mam na n gʋls-b-la b sũyẽ wã. Mam na n yɩɩ bãmb Wẽnnaam, la bãmb na n yɩɩ mam nebã.

¹¹ Tẽngã pʋgẽ, ned ba a yembr ka na n leb n zãms a to ye, la ned kõn zãms a ba-biiga, n yeel-a t'a bãng Zu-soabã ye. Sɩda, b fãa na n bãnga maam, sẽn sɩng ne sẽn yaa-a bilfu, n yɩɩd bãmb sʋkã, tɩ ta sẽn yaa-a kãseng n yɩɩdã.

¹² Bala, mam na n basa b ka-tɩrlmã taale, la mam ka na n leb n tẽeg b yel-wẽnã yell ye.

¹³ Wẽnnaam sẽn gomd kaool‑paalg yellã, b kɩtame tɩ dẽenem soabã lebg kʋdre. La bũmb sẽn yaa kʋdr kʋʋlame, n dat n meneme.