Ebre rãmba 2 - WẼNNAAM SEBRE 2014

Fãag-kãsenga

¹ Rẽndã n kɩt tɩ tõnd tog n tags bũmb ning d sẽn wʋmã yell neer n yɩɩda, tɩ d da wa bʋdg ye.

² Bala, sã n yaa tɩ gomd ning malegsã sẽn yeelã maana a tʋʋmde, la beegr fãa ne kɩɩsg fãa sã n paama sɩbgr wa sẽn zemse,

³ tõnd na n yɩ a wãn n põse, tõnd sã n maan yaal-yaal n ka ges fãagr sẽn yaa kãseng a woto wã yelle? Zu-soabã meng n deng n gom fãag-kãng yell a sɩngrã wakate, tɩ neb nins sẽn wʋm fãagrã yellã wilg tõnd t'a yaa sɩda.

⁴ Bala Wẽnnaam mengã maana bãnã la bõn-yɛɛsdse, la bõn-bãn toay-toaya, la ne koees Sɩɩg-sõng sẽn kõt wa Wẽnnaam sẽn datã, n wilg tɩ sẽn gomd-bã kaset yaa sɩda.

⁵ Bala, ka malegsã la Wẽnnaam kõ dũni ning sẽn wat tɩ tõnd gomd a yellã tɩ b soog ye.

⁶ La zĩig a yembre, ned n kɩs kaset n yeele: Ninsaal yaa bõe tɩ yãmb tẽr a yelle? La ninsaal biig yaa bõe tɩ yãmb get a yelle?

⁷ Wakat bilf yĩnga, yãmb kɩtame t'a ka ta malegsã ye, la y kõ-a-la ziir la waoogre, [n kɩt t'a soog bũmb nins yãmb nusã sẽn naanã.]

⁸ Yãmb kɩtame tɩ bũmbã fãa sakd-a. Wẽnnaam sẽn kɩt tɩ bũmbã fãa sakd-a wã, Wẽnnaam ka bas bũmb baa a yembr t'a ka sakd ninsaal ye. Baoosgo, moas-moasã wã tõnd ka ne tɩ bũmbã fãa sakda bãmb ye.

⁹ A Zeezi, soab ning Wẽnnaam sẽn kɩt tɩ wakat bilf pʋgẽ b ka ta malegsã, tõnd geta bãmb ne yamleoogo, bãmb sẽn paam ziir la waoogre, kũum ning b sẽn nams n ki wã yĩnga. Woto, Wẽnnaam nimbãan-zoeerã yĩnga, a Zeezi lemba kũum tõnd fãa sõngr yĩnga.

¹⁰ Sɩd me, a taa Soab ning sẽn naan-a bũmb fãa n kɩt tɩ b beẽ b meng yĩnga, Soab ning sẽn tall-a kom-dibli wʋsg n wa n kẽes ziir pʋgẽ wã yam tɩ kɩt t'a Zeezi, sẽn wa-a ne nebã fãagrã tũnug namsg n paam zemsg zãnga.

¹¹ Bala, soab ning sẽn maneg nebã tɩ b yɩ sõama wã, la b rãmb nins b sẽn maneg tɩ b lebg sõama wã yaa ba a yembre. Rẽndã n kɩt tɩ yãnd ka tar a Zeezi tɩ bool bãmb tɩ b ba-biis

¹² wakat ning b sẽn yeel tɩ: Mam na n togsa m ba-biisã yãmb yʋʋrã, mam na n pẽga yãmb nebã sẽn tigmã sʋka.

¹³ B leb n yeelame yaa: Mam na n maana yard ne Wẽnnaam, n leb n paase: «Ad maam ne kamb nins Wẽnnaam sẽn kõ maamã.»

¹⁴ Woto yĩnga, kambã sẽn yaa zɩɩm a ye la neong a ye ne b ba wã yĩnga, woto me, a Zeezi me yaa a woto, sẽn na yɩlg tɩ ne bãmb kũumã, bɩ b sãam soab ning sẽn da tar-a pãng tɩ kʋ wã, sẽn dat n togs tɩ sʋtãanã,

¹⁵ la b yols b rãmb sẽn dag n be yembd pʋgẽ b vɩɩmã tɛka, b sẽn zoet kũumã yĩngã.

¹⁶ Bala, vẽeneg fasɩ wã, ka malegsã la bãmb sõngd ye, la yaa a Abrahaam yagensã la bãmb sõngda.

¹⁷ Rẽnda n kɩt tɩ bãmb da tog n wẽneg b ba-biisã bũmb fãa pʋgẽ, n tõog n lebg maan-kʋʋd kãsem sẽn pid ne nimbãan-zoeere, la sẽn maand sɩd ne Wẽnnaam tʋʋmdã, n tõog n yiis nebã yel-wẽnã.

¹⁸ Bala, bãmb mengã sẽn nams wakat ning b sẽn paam makrã, bãmb tõe n sõnga neb nins sẽn paamd makrã.