Ebre rãmba 11 - WẼNNAAM SEBRE 2014

Tẽebo

¹ La tẽeb yaa pɛl-kɛgeng ned sẽn tar ne bũmb nins a sẽn tẽed t'a na paamame, la a yaa bũmb nins ned sẽn ka ne wã wilgri.

² Yaa tẽebã yĩng la kʋdem-dãmbã paam kaset-sõngo.

³ Yaa ne tẽeb la tõnd wʋmd tɩ yaa Wẽnnaam noor gomd n naan dũni, tɩ bũmb nins tõnd sẽn ne wã ka yi bũmb nins sẽn tõe n yãndã wã pʋgẽ ye.

⁴ Yaa ne tẽeb la a Abɛll maan maoong sẽn be yõod n yɩɩd a Kaẽ rẽndã n kõ Wẽnnaam. Tẽebã yĩnga, Wẽnnaam yeelame t'a Abɛll yaa nin-tɩrga. Bãmb mengã kɩsa yẽnda kũum kaseto, la tẽebã yĩnga, baa ne a Abɛll sẽn ki wã, a ket n gomdame.

⁵ Yaa ne tẽeb la a Henok paam tɩ b zẽk-a, t'a ka ki ye. Nebã ka leb n yãnd-a ye, tɩ bõe Wẽnnaam zẽk-a lame. Sẽn deng a zẽkre, a paama kaset t'a taa Wẽnnaam yam.

⁶ La tẽeb sã n kaẽ, ned ka tõe n ta Wẽnnaam yam ye. Ned ning sẽn wat Wẽnnaam nengẽ tog n tẽeme tɩ b beeme, la tɩ b ronda neb nins sẽn baood bãmbã.

⁷ Yaa ne tẽeb la a Nowe, wakat ning Wẽnnaam sẽn wilg-a bũmb nins neb sẽn dag n nan zɩ n yã wã, a zoee Wẽnnaam dabeem, n ka koom-kogl-bedre, n na n fãag a yirã rãmba. Yaa tẽebã yĩng la a wilg tɩ dũni ka bʋʋm ye, la a paam tɩrlem sẽn paamd ne tẽebã.

⁸ Yaa ne tẽeb la a Abrahaam sak Wẽnd boolle, n yi n tees tẽng ning Wẽnnaam sẽn na n kõ-a t'a soogã. La a yiime n da ka mi a sẽn dabdẽ ye.

⁹ Yɩɩ ne tẽeb la a kẽng n tɩ zĩnd tẽng ning Wẽnnaam sẽn kãab-a wã, wa tẽn-sãanga, n zĩnd fu-rot pʋse, ne a Izak la a Zakoob sẽn na n soog bũmb ning sẽn kãabã.

¹⁰ Bala, a dag n gũuda tẽng sẽn tar yẽbgr sẽn yaa kãenkãe, Wẽnnaam meng sẽn yaa a meebã magda la a meta.

¹¹ Yaa ne tẽeb la a Saara menga, baa ne a sẽn kʋʋl wʋsgã, Wẽnnaam kɩtame t'a tõog n dog biiga, bala, a maana tẽeb tɩ soab ning sẽn kãab-a wã pidsda a sẽn kãabe.

¹² Dẽ n kɩt tɩ ned a yembr pʋgẽ, dao a yembr sẽn da zoe n yaa kũum, yagens wʋsg n yi be, tɩ b sõorã ta ãdsã sẽn be yĩngrã, la bĩisrã sẽn be ko-kãsengã noor tɩ ned ka tõe n sõd n sa wã.

¹³ Bãmb fãa kii ne b tẽebã, n ka paam bũmb nins b sẽn da kãab bãmbã ye. La b tool n gesa bõn-kãens yɩɩg n beel-ba, n wilg tɩ bãmb mensã yaa sãamb la kaoos-wet tẽng zug ka.

¹⁴ Neb nins sẽn gomd a woto wã wilgda vẽeneg tɩ b baooda ba-yiri.

¹⁵ La ba-yir ning b sẽn yi n basã yamleoog sã n dag n tar-b lame, b rag n na n paama sor n leb n leb be.

¹⁶ La sɩd-sɩdã, b rat n paama ba-yir sẽn yaa sõama n yɩɩd pĩnd soabã, sẽn be yĩngri. Dẽnda n kɩt tɩ yãnd ka tar Wẽnnaam, nebã sã n yet tɩ Wẽnnaam yaa bãmb Wẽnnaam ye. Bala, Wẽnnaam segla tẽng b yĩnga.

¹⁷ Yaa ne tẽeb la wakat ning a Abrahaam sẽn paam makre, a rɩka a biig a Izak n kõ Wẽnnaam. Yaa a bi-ribl‑yend la a rɩk n kõ Wẽnnaam, tɩ yaool n yaa yẽnda la Wẽnnaam kãab bũmb toay-toayã,

¹⁸ la yaa yẽnda yell la Wẽnnaam da gom n yeele: Yaa ne a Izak la fo na n paam yagense, sẽn na n tall fo yʋʋrã.

¹⁹ A ra maanda tẽeb tɩ Wẽnnaam tara pãnga, hal baa sẽn na kɩt tɩ ned vʋʋg n bas kũum. Rẽnda n kɩt tɩ Wẽnnaam lebs-a a biiga. Mamsg n be yel-kãngã pʋgẽ.

²⁰ Yaa ne tẽeb la a Izak ning a Zakoob ne a Ezayu bark nindaar beoog yĩnga.

²¹ Yɩɩ ne tẽeb la a Zakoob sẽn wa n na n ki wã, a ninga a Zozɛf kambã zut barka, la a tik a dasaarã n wõgemde.

²² Yaa ne tẽeb la a Zozɛf sẽn wa n kolg kũum, a goma a Israyɛll kambã yikr yelle, la a yeel b sẽn na n maan yẽnda kõabã to-to.

²³ Yɩɩ ne tẽeb la a Moyiis ba-rãmba solg-a a dogem wakate, kiis a tãabo. Bala, b yãame tɩ biigã dag n bee neere, la b ka zoe rĩmã yam-yãkrã ye.

²⁴ Yɩɩ ne tẽeb la a Moyiis sẽn wa n bɩ, n tõdg tɩ b kõn bool-a tɩ Faarõ bi-puglã biigã.

²⁵ Bala, sẽn noom yẽnda n yɩɩd yaa tɩ naag ne Wẽnnaam nebã n paam namsgo, la ka tɩ paam sũ-noog ning yel-wẽnã sẽn kõt wakat bilf yĩngã ye.

²⁶ Sɩda, a dag n getame tɩ yẽndã sã n paam yãnd ning Kirisã sẽn na n paamã yaa arzɛk n yɩɩd Ezɩpt arzegsã. Bala, a long n geta keoorã sẽn be yɩɩgã.

²⁷ Yɩɩ ne tẽeb la a yi Ezɩpt n ka zoe rĩmã sũ-puugr ye. A yalsa kãenkãe, wa ned sẽn ne bũmb nins neb sẽn ka tõe n yã.

²⁸ Yɩɩ ne tẽeb la a maan Pakã, la a mes zɩɩm, tɩ sãamdã da wa sɩɩs Israyɛll nebã kom-dẽemsã ye.

²⁹ Yɩɩ ne tẽeb la b pɩʋʋg mog-miuugã wa tẽn-koɛɛnga, la Ezɩpt nebã sẽn mak n na n pɩʋʋgã, koomã rɩ-b lame.

³⁰ Yɩɩ ne tẽeb la Zeriko lalsã lʋɩ yã, nebã sẽn gilg-a dasem a yopoe wã poore.

³¹ Yɩɩ ne tẽeb la pʋg-yoodr a Rahaab ka naag ne ka-tẽebã rãmb n sãam ye, bala, a reega tẽn-gũusdbã ne laafɩ.

³² La m na n leb n yeelame tɩ bõe? Bala weerã ka na n sek maam tɩ m gom a Zedeyõ la a Barake, la a Samsõ, la a Zɛfte, la a Davɩɩde, la a Sãmwɛlle, la Wẽnnaam no-rɛɛsdbã yelle,

³³ sẽn tall-b tẽeb n tõog soolem dãmba, la b tʋm tɩrlem tʋʋmã, la b paam kãabdo, la b mum gɩgmã noyã,

³⁴ la b sãam bugum pãnga, la b põs zabr sʋʋs noyã, la b sãoog n paam pãnga, la b yɩ gãndaad zabr zĩigẽ, la b sãeeg tẽms a taab sodaasã yell ye.

³⁵ Pagb kẽer paamame tɩ b neb sẽn ki leb n vʋʋge. Neb namsa neb a taaba, la sẽn namsdbã ka sak tɩ b yols-b ye, sẽn na yɩlg n paam vʋʋgr sẽn yaa sõama n yɩɩda.

³⁶ Kẽer deega yaalgo, la kalwaase, la hal baa bãens sẽbre, la bi-bees roogo.

³⁷ B lob-b-la kuga, n nams-ba, n wã-b ne ra-wãad‑sʋʋse. B kʋʋ kẽer ne zabr sʋʋga, n yeelg kẽer piis la bʋʋs gãndo, n dig-b tɩ b yi n yeebdẽ, n ka tar baa fɩ ye, tɩ neb maand-b pãnga, n maan-b wẽnga.

³⁸ Bãmb dag n ka zems ne dũni wã ye. B dag n yeebda wetẽ, la tãmsẽ, la tãms bogdẽ, la bogd sẽn tu tẽnga.

³⁹ La nin-bãmbã fãa sẽn paam kaset-sõng b tẽebã yĩngã ka tõog n paam bũmb nins b sẽn kãab-bã ye.

⁴⁰ Bala, Wẽnnaam dag n nee bũmb sẽn yaa sõama n yɩɩd tõnd yĩnga, tɩ nin-kãens da wa n zems zãng tɩ tõnd ka naag ye.