Ebre rãmba 10 - WẼNNAAM SEBRE 2014

¹ Sɩda, bũmb nins sẽn be tõogã pʋgẽ wã yaa arzãn yɛlã mamsg bala, la ka b wẽneg kɛpɩ ye. Rẽ n kɩt tɩ ne maand nins b sẽn maand n ka basdẽ, yʋʋmd fãa tɩ b fãa wẽnd taabã, tõogã yɛlã ka tõe tɩ neb nins sẽn tũud so-kãng n kolgd Wẽnnaamã zems zãng ye.

² Sã n kaẽ dẽ, b dag n kõn bas maoongã maaneg sɩda? Bala, neb nins sẽn maand karen‑kãngã rag n na n paamẽ‑la yɩlgr vugr bal wakat fãa yĩnga, la b sũ-bãngrã dag n ka na n leb n tẽegẽ bãmb b yel-wẽnã ye.

³ La ne maan-kãens b sẽn maandã, b tẽegda yel-wẽnã yʋʋmd fãa.

⁴ Bala, lolsã ne boeesã zɩɩm ka tõe n yiis yel-wẽn lae-lae.

⁵ Rẽndã kɩt tɩ Kirisã sẽn wa n wat dũni wã, b yeelame yaa: Yãmb dag n ka rat maoong wall kũun ye, la yãmb maana yĩng n kõ maam.

⁶ Yãmb ka reeg maoong sẽn yõogd bugum tẽn-kugr zugu, wall maoong yel-wẽnã yĩng ye.

⁷ Dẽ, mam yeelame yaa: «Wẽnnaam, ad mam watame n na n maan y raabo. Seb-pindgã pʋgẽ, b gʋlsame n gom mam yelle.»

⁸ Bãmb deng n yeelame yaa: «Yãmb dag n ka rata, la y ka reeg maando, wall kũuni, wall maand sẽn yõogd bugum ye.» Tɩ b yaool n maand bõn-kãens wa tõogã sẽn yetã.

⁹ La b yeelame yɛs tɩ: «Ad mam watame n na n maan y raabo.» Dat n togs tɩ bãmb menesda pipi manesmã n na n wa ne manesem a yiib soabã.

¹⁰ Yaa Wẽnnaam daab‑kãng maasem yĩng la tõnd paam welgr n lebg toore, a Zeezi Kiris sẽn kõ b meng vugr tãa wakat fãa yĩngã yĩnga.

¹¹ Maan-kʋʋd fãa kẽngda a tʋʋmd zĩigẽ, n tɩ maan a tʋʋmde, tɩ naoor wʋsgo, b maanda maoon-yɛngã bala, maand sẽn ka tol n tõe n yiis yel-wẽnã.

¹² La a Zeezi sẽn maan maoong a yembr tãa yel-wẽnã yĩng n sa wã, b zĩnda Wẽnnaam dɩtgo, wakat sẽn ka saab yĩnga.

¹³ La moasã, b gũudame n na n paam b bɛɛbã n tab n zĩẽ.

¹⁴ Bala, ne kũun a yembr tãa bala, b kɩtame tɩ neb nins sẽn welg toorã zems zãnga.

¹⁵ Sɩɩg-sõng kɩta tõnd bõn-kãng kaset me. Bala bãmb sẽn yeel tɩ:

¹⁶ «Zu-soabã yetame yaa: Ad kaool ning mam sẽn na n maan ne bãmb ra-kãens loogr zugẽ. Mam na n ninga m tõodã b sũyẽ wã, la m na n gʋls-b-la b yamẽ wã.» B paasa gomd n yeele:

¹⁷ «La mam ka na n leb n tẽeg b yel-wẽnã wall b tʋʋm wẽnsã yell ye.»

¹⁸ La zĩig ning yel-wẽnã sugr sẽn paame, maoong ka leb n maand yel-wẽnd yĩng ye.

¹⁹ Woto yĩnga m ba-biisi, tõnd mii hakɩɩk tɩ d tara noor tɩ kẽ manegr doogẽ wã, a Zeezi zɩɩmã maasem yĩnga.

²⁰ A Zeezi meng n yɩ pipi n kẽ be n tuk sor tõnd yĩnga, wa so-paalg sẽn vɩ n pɩʋʋgd fu-lilldgã, sẽn dat n togs tɩ bãmb mengã yĩngã.

²¹ La tõnd tara maan-kʋʋd kãsem sẽn so Wẽnnaam yirã.

²² Woto yĩnga, bɩ d kolg bãmb ne sũur sẽn yaa sɩda, ne tẽeb zãnga, ne sũur sẽn yɩlge tɩ d sũur ka kaood d bʋʋd ye, la ne yĩng sẽn paam soob ne ko-yɩlgemde.

²³ Bɩ d wilg d tẽebã n da sãmb ye, bala soab ning sẽn kãab-a tõndã pidsda b kãabgo.

²⁴ Bɩ d ges taab yelle, tɩ d tõe n nek taab ratem tɩ nong taaba la maan tʋʋm-sõamyã.

²⁵ Bɩ d da bas d wẽnd doogã wa neb kẽer sẽn minim n maandẽ wã ye. Bɩ d sagl taaba, n sagl taab n yɩɩda, yãmb sẽn ne tɩ daarã kolgdame wã yĩnga.

Saglgo, tɩ da maan yel-wẽnã ne yamleoog ye

²⁶ Bala, tõnd sã n bãng sɩdã n yaool n maan yel-wẽn ne yamleoogo, maoong ka leb n ket yel-wẽnã yĩng ye.

²⁷ La bũmb ning sẽn keta, yaa tɩ gũ bʋʋdo la bugum sẽn segl n na n dɩ kɩɩsdbã, la rẽ bee rabeem.

²⁸ Ned sã n kɩɩs a Moyiis tõogã, b kʋʋda a soabã, neb a yiib bɩ a tãab sã n kɩs kaset t'a beegame, tɩ nimbãan-zoeer kaẽ ye.

²⁹ La yãmb ka tagsd tɩ ned sã n tab Wẽnnaam Bi-riblã ne a naoã, la a ges kaoolã zɩɩm ning sẽn kɩt tɩ yẽ lebg toor Wẽnnaam yĩngã wa bõn-zaalga, la a paoog Sɩɩg ning sẽn wat ne sugrã, a na n paama sɩbgr sẽn yaa toog n yɩɩd sɩda?

³⁰ Bala, tõnd mii soab ning sẽn yeel-a tɩ: Sũ-dokr yaa bãmb n so la bãmb n na n keo wã. B leb n yeelame tɩ: Zu-soabã na n bʋʋ b nebã bʋʋdo.

³¹ Tɩ lʋɩ Wẽnnaam sẽn vɩ wã nugẽ yaa yell meng-menga!

³² Tẽeg-y sɩngr wakatã yelle, wakat ning y sẽn paam namsg wʋsg tɩ yɩ maoor meng-menga, y sẽn paam vẽenemã zugẽ.

³³ B ninga yãmb yãnde, n nams yãmb nebã taoor tɩ b ges-yã, la yãmb paama yam a yembr me ne neb nins b sẽn namsd a woto wã.

³⁴ Sɩda, yãmb zoee bi-beesã nimbãanega, la yãmb saka ne sũ-noog tɩ b wʋk bũmb nins yãmb sẽn tarã, yãmb sẽn mi tɩ y tara paoong sẽn yaa sõama n yɩɩda, la sẽn ka loogdã yĩnga.

³⁵ Woto yĩnga, bɩ y ra bas pɛl-kɛgeng ning yãmb sẽn tarã la sẽn wat ne keoor sẽn yaa kãsengã ye.

³⁶ Yãmb sɩd tog n nanga pãnga, tɩ yãmb sẽn maan Wẽnnaam daabã, y na reeg bũmb ning b sẽn kãab yãmbã.

³⁷ Bala, keta bilfu, bilf bala! La sẽn tog n wa-a wã na n waame, b ka na n kaoos n wa ye.

³⁸ La mam nin-tɩrg na n vɩɩ ne tẽebo, la a sã n leb poorẽ, mam sũur ka noom ne-a ye.

³⁹ La tõndo, tõnd ka be b rãmb sẽn foogd b mens n na n sãamã sʋk ye, tõnd bee b rãmb sẽn tẽed n na n põsã sʋka.