Bʋ-kaoodba 9 - WẼNNAAM SEBRE 2014

A Abimelɛk lebga Sɩkɛm rĩma

¹ A Zeruball biig a Abimelɛk kẽnga Sɩkɛm n tɩ gom ne a yɛs-rãmbã, la ne a ma wã buudã fãa n yeele:

² «Sok-y Sɩkɛm tẽngã taoor-dãmbã n gese, a Zeruball kambã pis-yopoe wã sẽn na n soog-b n são bɩ? Bɩ nin-yend sẽn na n soog bãmb n são? La y ra yĩm tɩ mam yaa yãmb roagd ye.»

³ Yẽnda yɛs-rãmbã togsa Sɩkɛm tẽngã taoor-dãmbã fãa goam nins fãa yẽnda sẽn gomã, la bãmb fãa yamã wẽnemd n kẽe a Abimelɛke, bala, b yeelame tɩ yẽnda yaa b roagda.

⁴ Bãmb yãka b wẽn-naandg a Baall-Berit roogã wanzuri ligd pis-yopoe n kõ a Abimelɛke. La a Abimelɛk rɩka ligdã n da nin-saan-yaalse, la bi-bees tɩ b pʋgd-a.

⁵ A Abimelɛk kẽnga Ofra, a ba wã zakẽ, n tɩ kʋ a ba a Zeruball kom-dibli pis-yopoe wã fãa sẽn yaa yẽnda ba-biisã kugr a yembr zugu. Yaa a Zeruball bi-yao a Zotam bal n põse, bala, yẽnda rag n zoe n tɩ soondame.

⁶ Dẽ, Sɩkɛm tẽngã taoor-dãmbã fãa ne Milo nebã fãa tigma taaba, n na n kẽng kugr ning b sẽn vigl tɩ pẽ ne Sɩkɛm tɩ-kẽengã, n na n kõ a Abimelɛk naam beenẽ.

⁷ B rɩka yellã n tɩ togs a Zotam. La yẽnda kẽng n tɩ rʋʋ Garizim tãngã zugu, n zẽk a koɛɛg n yeel yaa: «Sɩkɛm taoor-dãmba, kelg-y maam neere, la bɩ Wẽnnaam kelg yãmba!

⁸ Daar a yembre, tɩɩsã yiime, n na n tɩ yãk b rĩm t'a soog-ba. Bãmb yeela oliiv tɩɩg yaa: wa yɩ tõnd dĩma.

⁹ La oliiv tɩɩgã yeelame: Mam bas m kaamã b sẽn yãkd n waoogd wẽnnaam-dãmbã, la b tar n waoogd ninsaalbã, n tɩ yɩ tɩɩs rĩma?

¹⁰ La tɩɩsã yeela kankang yaa: Sã n yaa woto, bɩ fo yɩ tõnd dĩma.

¹¹ La kankang leoka bãmb yaa: Mam tõe n bas m bi-noodã, m biisã sẽn noom wʋsgã wombo, n kẽng n tɩ yɩ tɩɩs rĩma?

¹² Dẽ, tɩɩsã yeela reezẽ tɩɩg yaa: Bɩ fo wa yɩ tõnd dĩma.

¹³ La reezẽ tɩɩgã yeelame yaa: Mam bas m reezẽ rãamã sẽn noogd wẽnnaam-dãmb sũurã, la a noogd ninsaalbã sũurã, n lebg tɩɩs rĩma?

¹⁴ Dẽ, tɩɩsã fãa yeela gõaag yaa: Bɩ fo wa lebg tõnd dĩma.

¹⁵ Tɩ gõaag leok-b yaa: Yãmb sã n sɩd data ne y sũur fãa, n yãk maam tɩ m lebg y rĩma, n soog-yã, bɩ y wa zĩnd mam maasmẽ wã. Yãmb sã n ka maan woto, bɩ bugum yi m gõosẽ wã, n dɩ hal baa Libã sɛɛdr tɩɩsã.»

¹⁶ A Zotam kẽnga taoor n yeel yaa: «Rẽ yĩnga, yãmb sẽn yãk a Abimelɛk t'a lebg y rĩma, yaa ne sɩd la burkĩndlim bɩ? Yãmb maana a Zeruball ne a yirã rãmb neer n lebs-a wa a sẽn maan yãmbã sɩda?

¹⁷ Bala, mam ba wã zaba yãmb yĩnga, bãmb gẽnega b yõor zabrã zĩigẽ n fãag yãmb Madiyã nebã nusẽ.

¹⁸ La baa ne rẽ fãa, yãmb yika rũndã n zabd ne mam ba wã yir dãmba. Yãmb kʋʋ bãmb kamb pis-yopoe wã kugr a yembr zugu, la y yãk m baaba yem-poakã biig a Abimelɛk t'a yɩ Sɩkɛm taoor-dãmbã naaba, a sẽn yaa yãmb roagdã yĩnga.

¹⁹ Sã n mikame tɩ yãmb sẽn maan a Zeruball ne a yirã rãmb rũndã wã yaa ne sɩd la burkĩndlim, bɩ y maan sẽn noom a Abimelɛke, tɩ yẽnda me maan sẽn noom yãmba.

²⁰ La sã n mikame me tɩ ka woto, bɩ bugum yi a Abimelɛk nengẽ n dɩ Sɩkɛm ne Bɛt-Milo tẽngã taoor-dãmbã, tɩ bugum yi Sɩkɛm ne Bɛt-Milo tẽngã taoor-dãmb nengẽ n dɩ a Abimelɛke.»

²¹ A Zotam sẽn gom woto n sɛ, a yii be n zoe n kẽng Beer n zãag ne a ba-biig a Abimelɛke.

Sɩkɛm nebã zãgsa a Abimelɛke

²² A Abimelɛk sooga Israyɛll nebã yʋʋm a tãabo.

²³ Wẽnnaam kɩtame tɩ welgr kẽ a Abimelɛk ne Sɩkɛm nebã sʋka, la Sɩkɛm nebã zãmba a Abimelɛke.

²⁴ Yɩɩ woto tɩ wẽng ning fãa a Abimelɛk sẽn dag n maanã leb-a. A Abimelɛk sẽn kʋ a ba-biis pis-yopoe wã sẽn yaa a Zeruball kom-dibli wã zɩɩm lʋɩɩ yẽnda zugu. Sɩkɛm tẽngã taoor-dãmb me paama taale, bãmb sẽn sõng yẽnda t'a kʋ a ba-biisã yĩnga.

²⁵ Sɩkɛm tẽngã taoor-dãmb baoo neb n kɩt tɩ b tɩ soond tãmsã zutu, n fãad so-loaadbã sẽn tũud be n loogdẽ wã. La b tɩ togsa a Abimelɛk bõn-kãense.

²⁶ A Ebɛɛd biig a Gaal ne a ba-biisã rag n pɩʋʋgda Sɩkɛm tẽngã n loogdẽ. La Sɩkɛm tẽngã taoor-dãmb kɩsa sɩd ne a Gaale.

²⁷ Sɩkɛm tẽngã neb yi n kẽnga b pʋtẽ, n tɩ wob b reezẽ n wẽk a koomã, la b maan tigri, n kẽng b wẽnnaamã roogẽ n tɩ rɩtẽ la b yũuda, la b kãabd a Abimelɛk kãab-wẽnga.

²⁸ Dẽ, a Ebɛɛd biig a Gaal sokame: «A Abimelɛk yaa yɛ neda? Sɩkɛm dãmba yaa yɛ nebã? Bõe yĩng tɩ tõnd na n bas t'a Abimelɛk soog tõndo? Yẽnda ka a Zeruball biig bal la? Ka a Zebull n yaa yẽnda tʋʋmã yel-gɛt bal la? Kelg-y-yã, wa-y tɩ d bas t'a Hamoor yagensã sẽn yaa Sɩkɛm nebã soog-do. Bõe yĩng meng tɩ tõnd na n sak a Abimelɛke?

²⁹ Sɩkɛm nebã sã n dag n sakẽ n yãkẽ maam tɩ m lebg b naaba, mam na n sikẽ-la a Abimelɛke. Mam dag n na yeel-a: Abimelɛke, paas f tãb-biisã sõor n wa tɩ d zabe.»

³⁰ A Zebull sẽn yaa tẽngã komber sẽn wʋm a Ebɛɛd biig a Gaal goamã, a sũurã puugame.

³¹ Dẽ, a Zebull soos n tʋma neb a Abimelɛk nengẽ tɩ b tɩ yeel-a yaa: «Ade, a Ebɛɛd biig a Gaal ne a ba-biisã waa Sɩkɛm tẽngã pʋga, la b pirsda nebã n yetẽ tɩ b ra sak yãmb ye.

³² Sẽn yaa woto wã, yʋngã, bɩ y peeg neb nins sẽn be-b ne yãmbã tɩ y kẽng n tɩ soond pʋtã pʋse.

³³ Beoogã sã n vẽege, tɩ sõorã puki, bɩ y kẽng n tɩ ling tẽngã nebã. Dẽ, a Gaal ne a nebã sã n yi n na n zab ne yãmba, bɩ y maan yẽnda wa sẽn segde.»

³⁴ A Abimelɛk ne neb nins sẽn be ne yẽnda wã yika ne yʋngo, n welg taab sul a naase, n kẽng n tɩ soond Sɩkɛm tẽngã noore.

³⁵ A Ebɛɛd biig a Gaal yiime n tɩ yas tẽngã noore. Woto, a Abimelɛk ne neb nins sẽn be ne yẽnda wã yii b soondgã zĩigẽ.

³⁶ A Gaal sẽn yã nebã, a yeela a Zebull yaa: «Gese, mam nee neb sẽn sigd tãngã zugu.» A Zebull yeela yẽnda tɩ yaa tãmsã maasem la yẽnda yã n tẽed tɩ yaa nebã.

³⁷ A Gaal kell n yeelame: «Ges neere, yaa neb la sẽn sigd tãngã sẽn be sʋkã zugã. La sull a yembr n sigd n tũud bagbã tɩɩg sẽnẽ.»

³⁸ A Zebull yeela yẽnda yaa: «Yãmb gom-minimã bee yɛɛnẽ? Ka yãmb n dag n tãoosd raood n yetẽ t'a Abimelɛk yaa yɛ neda, tɩ tõnd na n sak-a wã la? Bãmb ka neb nins yãmb sẽn dag n paoogdã wɛ? Moasã, bɩ y yik n kẽng n tɩ zab ne-ba.»

³⁹ A Gaal boola Sɩkɛm tẽngã taoor dãmba, n lʋɩ b taoor tɩ b na n tɩ zab ne a Abimelɛke.

⁴⁰ A Abimelɛk riga a Gaal t'a zoe, la neb wʋsg pogla wʋsgo, la b zoeeme n ta tẽngã noor n lʋɩ n ki.

⁴¹ A Abimelɛk sẽn ta Aruma, a yalsa beenẽ. La a Zebull riga a Gaal ne a ba-biisã, n ka bas-b tɩ leb n zĩnd Sɩkɛm tẽngã ye.

⁴² Vẽkembeoogo, Sɩkɛm nebã yiime n na n kẽng b pʋtẽ. La b tɩ togsa a Abimelɛk bõn-kãnga.

⁴³ A Abimelɛk peega a nebã, n pʋɩ-b zĩis a tãabo, n kẽng n tɩ soond pʋtã pʋse. Yẽnda sẽn yã nebã sẽn yi tẽngã pʋg n watẽ, bãmb yiime n seg-b n zab ne-ba.

⁴⁴ A Abimelɛk ne neb nins sẽn dag n be ne yẽnda wã wudgame n tɩ gɩd tẽngã noore. Yẽnda nebã sul a yiib kẽng n tɩ linga Sɩkɛm nebã sẽn dag n be pʋtẽ wã n tɩ kʋ.

⁴⁵ Badaare, a Abimelɛk zaba ne Sɩkɛm tẽngã neb daarã tõre. Yẽnda tõog n deega tẽngã, la a kʋ neb nins sẽn dag n be beenẽ wã. A Abimelɛk wãa tẽngã, n bao yamsem n fẽrg a tẽn-gãongã.

⁴⁶ Neb nins sẽn be Sɩkɛm gãs-bedrã pʋgẽ wã sẽn wʋm yel-kãnga, bãmb zoeeme n tɩ kẽ b Wẽnnaam a Baall-Berit roogã zĩ-soalgdgẽ.

⁴⁷ B kẽng n tɩ togsa a Abimelɛk tɩ neb nins fãa sẽn dag n be Sɩkɛm gãs-bedrã pʋgẽ wã tigma taaba.

⁴⁸ Dẽ, a Abimelɛk ne a nebã fãa kẽng n tɩ rʋʋ Salmon tãngã zugu. La a Abimelɛk rɩka a lare, n kɛɛg tɩɩg will n palg a bãoko, la a yeel neb nins sẽn be ne yẽnda wã yaa: «Bɩ yãmb ned kam fãa maan wa mam sẽn maan tao-tao.»

⁴⁹ Woto, bãmb ned kam fãa kɛɛga tɩɩg will n palg a bãoko, la b fãa tũu a Abimelɛke. Bãmb rɩka wilã n pag Baall-Berit roogã zĩ-soalgdgã noore n ning-a bugum tɩ sẽn be-b be wã fãa ki. Yɩɩ woto la neb nins fãa sẽn dag n be Sɩkɛm gãs-bedrã pʋgẽ wã ki yã. La rag n yaa raop ne pagb sõor sẽn kolg tusri.

A Abimelɛk kũum

⁵⁰ Dẽ zugẽ, a Abimelɛk kẽng n tɩ zaba ne Tibɛɛs tẽngã. Yẽnda ne a nebã tɩ gũbga tẽngã n zab n deeg-a.

⁵¹ Tẽngã sʋka, gãs-bedr sẽn tar pãng n dag n be beenẽ, la tẽngã pagbã ne a raopã ne a taoor dãmbã fãa zoe n tɩ kẽe beenẽ n pag b mense. La bãmb dʋʋ gãsgã bɛoong zugu.

⁵² A Abimelɛk kẽnga gãsgẽ wã n tɩ zab ne bãmba, hal n kolg n ning a noorã bugum.

⁵³ Dẽ, pag n zĩnd be n dɩk ne-biig n lobg a Abimelɛk zugã n wã.

⁵⁴ La zĩig pʋgẽ, a Abimelɛk boola a rakõor ning sẽn zãad-a yẽnda zab-teedã n yeel-a: «Wõog f zabr sʋʋgã n kʋ-m n baase, tɩ b ra wa yeel tɩ yaa pag n kʋ maam ye.» La bi-bɩɩgã kõs-a lame t'a ki.

⁵⁵ Israyɛll nebã sẽn mik t'a Abimelɛk kiime, bãmb ned kam fãa lebg n kuila a yiri.

⁵⁶ Yɩ a woto la Wẽnnaam lebs a Abimelɛk wẽng ning yẽnda sẽn dag n maan a ba wã. Yẽnda rag n kʋ a ba wã kom-dibli pis-yopoe sẽn yaa yẽnda ba-biisã.

⁵⁷ La yɩɩ woto me la Wẽnnaam lebs Sɩkɛm nebã wẽng ning fãa bãmb sẽn dag n maanã. La kell n yɩɩ woto, tɩ kãab-wẽng ning a Zeruball biig a Zotam sẽn dag n kãab Sɩkɛm nebã paam pidsgu.