Bʋ-kaoodba 8 - WẼNNAAM SEBRE 2014

Efrayiim nebã wilga b sũ-pa-noaanga

¹ Efrayiim nebã yeela a Zedyõ: «Yaa bõe la yãmb sẽn maan tõnd woto wã? Yãmb sẽn wa n na n kẽng n tɩ zab ne Madiyã nebã, bõe yĩng tɩ yãmb ka bool tõndo?» La bãmb goma a Zedyõ hal wʋsgo.

² A Zedyõ leok-b lame n yeele: «Rẽ yĩnga, mam sẽn tʋmã tõe n dɩk n maka ne yãmb sẽn tʋmã sɩda? Efrayiim buudã sẽn maan bũmb ningã, baa ne a sẽn yaa bilfã, a ka yɩɩd Abiyezɛɛr doogã sẽn maanã sɩda?

³ Wẽnnaam kɩtame tɩ yãmb tõog Madiyã nanambsã: a Orɛɛb ne a Zeebe. Rẽ wã, bõe la mam maan n yɩɩd yãmb sẽn maanã?» A Zedyõ sẽn gom woto wã, Efrayiim nebã sũyã sigame.

A Zedyõ ne a nebã rʋʋga Zʋrdẽ kʋɩlgã

⁴ A Zedyõ ne a neb kobs-tã wã taa Zʋrdẽ kʋɩlgã, la b rʋʋg-a lame. La baa ne bãmb sẽn dag n yɛ wʋsgã, b rag n ket n digda b bɛɛbã.

⁵ A Zedyõ yeela Sukot nebã yaa: «Mam kota yãmb tɩ y bao rɩɩb n kõ neb nins sẽn tũud maamã tɩ b rɩ, bala, b yɛɛ wʋsgo, la tõnd yaool n digda Madiyã nanambsã: a Zeba ne a Salmuna.»

⁶ Sukot nanambsã leoka a Zedyõ yaa: «Tõnd na n yɩ a wãn n kõ yãmb tãb-biisã rɩɩbo, tɩ yãmb yaool n nan ka tõog a Zeba ne a Salmuna?»

⁷ A Zedyõ yeela bãmb yaa: «Beneere! Sẽn-Ka-Saab sã n sõng maam tɩ m tõog a Zeba ne a Salmuna, mam na n lebg n waame n wa yor yãmb yĩnsã ne gõose, la ne gõpayãndga.»

⁸ A Zedyõ yii beenẽ n kẽng Penuwɛll n tɩ kos bãmb wa poorẽ wã, la Penuwɛll nebã me leoka yẽnda wa Sukot nebã sẽn dag n leok yẽnda to-to wã.

⁹ A Zedyõ keooga Penuwɛll nebã me n yeele: «Mam sã n kẽng n tɩ tõog m bɛɛbã n lebg n wa, mam na n luba yãmb tẽngã gãs-bedrã.»

¹⁰ A Zeba ne a Salmuna rag n bee Karkoor ne b tãb-bi-sulã. La tãb-bi-kãens fãa sõor dag n ka leb n yɩɩd tus-piig la a nu ye. Bala, tãb-biis nins sẽn zabd ne sʋʋsã sõor sẽn tat tus koabg la pisi n pa zabrã pʋgẽ. Tãb-bi-kãens fãa yaa neb sẽn yit yaanga.

¹¹ A Zedyõ rɩka kẽn-kẽndbã sor sẽn be Noba ne Yogbowa yaangã, la yẽnda tɩ linga bɛɛbã tãb-sikã n tõog-ba.

¹² A Zeba ne a Salmuna sẽn yaa Madiyã nanambs a yiibã yiime n na n zoe, la a Zedyõ pʋgl-b lame n tɩ yõg-ba, la a kɩt tɩ b tãb-biisã fãa sãeege.

¹³ A Zoaas biig a Zedyõ yii zabrã zĩigẽ n lebgdẽ, la yẽnda gilg n tũu sor ning sẽn tees Herɛɛs tãngã rʋʋdgẽ wã.

¹⁴ A Zedyõ yõka Sukot tẽngã bi-bɩɩg a yembre, n sok-a Sukot nanambsã ne b kãsem-dãmbã yelle. La bi-bɩɩgã gʋlsa tẽngã nanambsã ne b kãsem-dãmbã yʋy n kõ yẽnda. La b sõorã yaa bãmb pis-yopoe.

¹⁵ Dẽ, a Zedyõ lebg n waa Sukot nebã nengẽ n yeel-b yaa: «Yãmb dag n ka yaand maam a Zeba ne a Salmuna poorẽ, n yetẽ tɩ y ka tõe n kõ mam tãb-biisã sẽn yɛ wã rɩɩbo, tɩ b yaool n nan ka tõog a Zeba ne a Salmuna sɩda?» Ade, bãmb la woto!

¹⁶ Dẽ, a Zedyõ rɩka gõos ne gõpayãndse, n sɩbg Sukot tẽngã nebã.

¹⁷ La a luba Penuwɛll tẽngã gãs-bedrã, la a kʋ tẽngã nebã.

¹⁸ Rẽ poore, a Zedyõ soka a Zeba ne a Salmuna yaa: «Neb nins yãmb sẽn kʋ Taboorã rag n yaa wãn-wãna?» La bãmb leokame yaa: «Bãmb ra wẽnda foom a Zedyõ, la b ned kam fãa rag n yaa wa na-biiga.»

¹⁹ Dẽ, a Zedyõ yeelame: «Bãmb yaa mam ma-biisi. Mam wẽenda ne Sẽn-Ka-Saab sẽn vɩ wã yʋʋre, tɩ yãmb sã n dag n ka kʋẽ nin-bãmbã, mam dag n ka na n kʋ yãmb me ye.»

²⁰ La a Zedyõ yeela a bi-ribl-kãseng a Yetɛɛr yaa: «Yik n kʋ-ba!» La bi-bɩɩgã ka sak n wõog a sʋʋgã ye. A rag n yɛɛsdame, bala, a rag n ket n yaa biig nanda.

²¹ A Zeba ne a Salmuna yeelame yaa: «Zedyõ, fo meng yik n kʋ-do! Bala, f sã n ta rao zĩigẽ, f tʋmda raood tʋʋmde.» Dẽ, a Zedyõ yikame n kʋ a Zeba ne a Salmuna. La yẽnda wʋka b fan-teedã sẽn dag n be b yʋgma wã yubliẽ wã.

A Zedyõ tʋʋm a taaba, la a kũum

²² Israyɛll nebã yeela a Zedyõ yaa: «Bɩ y sak n yɩ tõnd soaala, tɩ yãmb biigã me ne yãmb yagensã wa soog tõndo, bala, yãmb fãaga tõnd Madiyã nebã nusẽ.»

²³ A Zedyõ yeela bãmb yaa: «Mam ka na n yɩ yãmb naaba, la mam biig me ka na n soog yãmb me ye. Yaa Sẽn-Ka-Saab n na n yɩ yãmb soaala.»

²⁴ A Zedyõ yeela bãmb yaa: «Mam tara m kosg n dat n kos yãmba: bɩ yãmb ned kam fãa yãk tʋb-long a yembr a te-zɛɛdmã sʋk n kõ maam.» Sɩd me, Israyɛll bɛɛbã rag n tara sãnem tʋblond wʋsgo, bãmb sẽn yaa a Ismayɛll yagensã yĩnga.

²⁵ Israyɛll nebã yeelame yaa: «Beneere, tõnd na n kõ-y lame.» La b yɛdga fu-goabga, tɩ ned kam fãa yãk tʋb-long a te-zɛɛdmẽ, n kolg n lob fuugã zugu.

²⁶ Sãnem tʋblondã a Zedyõ sẽn kos tɩ b kõ-a wã fãa zɩslem kolga kɩlo pisi, fan-teedã ne tʋblondã, la fu-neebã sẽn yaa miidã Madiyã nanambsã sẽn dag n yerã toor sẽn ka naage, la fan-teed nins sẽn dag n be b yʋgma wã yubliẽ wã me toor sẽn ka naage.

²⁷ A Zedyõ talla sãnemã n maan bõn-naandg n tɩ ning a meng tẽngã pʋgẽ Ofra, la Israyɛll nebã fãa rag n kẽnda beenẽ n waoogd bõn-naandgã. Dẽ, bõn-naan-kãng lebga bẽdg Israyɛll nebã fãa yĩnga, la a Zedyõ ne a yirã rãmb me yĩnga.

²⁸ Israyɛll nebã tõoga Madiyã rãmbã n ning-b yãnde, tɩ b ka leb n tõe n zẽk b zug ye. La a Zedyõ vɩɩmã tɛka, tẽngã zĩnda bãan yʋʋm pis-naase.

²⁹ A Zoaas biig a Zeruball lebg n kuila a yir n tɩ zĩndi.

³⁰ A Zedyõ roga kom-dibli pis-yopoe. Bala, yẽnda rag n tara pagb wʋsgo.

³¹ A Zedyõ pʋg-rɩkdg ning sẽn dag n be Sɩkɛmã roga bi-ribl n kõ-a, t'a pʋd a yʋʋr t'a Abimelɛke.

³² A Zoaas biig a Zedyõ kʋʋla wʋsg n yaool n ki. La b tɩ mum-a-la a ba a Zoaas yaoogẽ, Ofra tẽnga sẽn yaa a Abiyezɛɛr buudã soolmã pʋga.

³³ A Zedyõ kũumã zugẽ, Israyɛll nebã leb n basa Sẽn-Ka-Saabo, n leb n sɩng Baall wẽn-naandsã pʋʋsgo. La bãmb dɩka Baall-Berit n maan b wẽnnaam.

³⁴ Israyɛll nebã yĩma Sẽn-Ka-Saab sẽn yaa bãmb Wẽnnaamã, Wẽnnaam ning sẽn fãag-a bãmb ne b bɛɛbã fãa sẽn dag n gũbg bãmbã yelle.

³⁵ Baa ne maan-neer nins fãa a Zedyõ b sẽn boond t'a Zerubaallã sẽn maan Israyɛll nebã yĩngã, Israyɛll nebã ka maan a Zedyõ yirã rãmb neer ye.