Bʋ-kaoodba 6 - WẼNNAAM SEBRE 2014

Buud a taabã namsa Israyɛll nebã

¹ Israyɛll nebã leb n maana sẽn yaa wẽng Sẽn-Ka-Saab nifẽ. La Sẽn-Ka-Saab basame tɩ Madiyã nebã tõog-ba, n soog-b hal yʋʋm a yopoe.

² Madiyã nebã maana Israyɛll nebã pãng wʋsgo. Rẽ kɩtame tɩ Israyɛll nebã tɩ soond tãmsã pẽgsẽ, tãmsã bogdẽ, la tãmsã zug tẽn-sʋgse.

³ Israyɛll nebã sã n dag n bʋd n sɛ, Madiyã-rãmbã ne Amalɛk-rãmbã ne neb nins sẽn yit-b yaangã wat n zabda ne-ba.

⁴ Nin-kãens rag n kẽngd n tɩ tilga b tãb-sikã Israyɛll tẽngã sɛɛgẽ. Dẽ, bãmb dag n sãamda Israyɛll nebã tẽngã koodã, hal n tall n tɩ tãag Gaaza. Bãmb dag n ka basd Israyɛll nebã bũmb baa a yembr ye: koodã, piisã, niigã, la ne b bõensã fãa.

⁵ Sɩd me, nin-bãmb rag n kẽnda ne b rũmsã fãa, ne b fu-rotã, la b sã n kẽnd n watẽ, wẽnda wa sʋy sẽn yɛdg n pid tẽn-gãongã, la ned dag n ka tõe n bãng bãmb ne b yʋgma wã sõor ye. Bãmb sã n wa tẽngã pʋgẽ, b sãamd-a-la zãnga.

⁶ Woto, Madiyã nebã kẽesa Israyɛll nebã pɛt la nimbãaneg pʋga, la bãmb kelem n boola Sẽn-Ka-Saabo.

⁷ Israyɛll nebã sẽn kelem n bool Sẽn-Ka-Saabã t'a fãag-b Madiyã-rãmbã nugẽ wã,

⁸ Sẽn-Ka-Saab tʋma b no-rɛɛs t'a tɩ yeel Israyɛll nebã yaa: «Sẽn-Ka-Saab sẽn yaa Israyɛll Wẽnnaamã yetame: Mam kɩtame tɩ yãmb yi Ezɩpt tẽngã, mam yiisa yãmb y yembdã pʋga.

⁹ Mam fãaga yãmb Ezɩpt nebã nugẽ, la m fãag yãmb neb nins fãa sẽn dag n namsd yãmbã nusẽ. Mam dig-b lame n kõ yãmba, la m kõ yãmb b tẽmsã tɩ y sooge.

¹⁰ Mam yeela yãmb tɩ mam yaa Sẽn-Ka-Saabo, n yaa yãmb Wẽnnaam. La m yeel-y tɩ y ra waoog Amoor-dãmba sẽn be tẽng ning yãmb sẽn be wã wẽnnaam-dãmbã ye. La yãmb ka kelg mam goamã ye.»

Sẽn-Ka-Saab yãka a Zedyõ

¹¹ Sẽn-Ka-Saab malɛɛk n wa n zĩnda a Abiyezɛɛr buudã ned a Zoaas tɩɩgã sẽn be Ofra wã tẽngre. A Zoaas biig a Zedyõ dag n soos n bee tɩɩgã tẽngr n pãbd a Oorz reezẽ rãam wẽkr koglg pʋga, a sẽn dag n zoet Madiyã nebã yĩnga.

¹² Sẽn-Ka-Saab malɛɛkã puka a meng ne a Zedyõ n yeel-a yaa: «Fo yaa tãb-bi gãndaoog halaale, Sẽn-Ka-Saab bee ne foom.»

¹³ La a Zedyõ leokame yaa: «Y kabre m soaala, Sẽn-Ka-Saab sã n bee ne tõndo, bõe yĩng tɩ yel-bãmbã fãa paamd tõndo? La bãmb sẽn dag n maan bõn-bãn nins fãa tɩ tõnd yaab-rãmbã togsd tõndã bee yɛɛnẽ? Tõnd yaab-rãmb yeela tõnd tɩ yaa Sẽn-Ka-Saab n yiis tõnd Ezɩpt tẽnga.» La maana a wãn moasã, tɩ Sẽn-Ka-Saab bas tõnd tɩ Madiyã nebã soog tõndo?

¹⁴ Sẽn-Ka-Saab wẽnegame n ges yẽnda n yeel-a yaa: «Kẽng ne pãng ning fo sẽn tarã, la f na n tõog n fãaga Israyɛll nebã Madiyã nebã nugẽ. Kẽng tɩ yaa maam n tʋmd-fo!»

¹⁵ A Zedyõ yeela malɛɛkã yaa: «Y kabre m soaala, mam na n maana a wãn n tõog n fãag Israyɛll nebã? Ade, Manaase buudã fãa pʋgẽ, yaa tõnd doogã n tɩ yaa naong rãmba. Sẽn paase, mam ba wã zak pʋga, maam n yaa b fãa yao-zʋʋga.»

¹⁶ Sẽn-Ka-Saab yeel-a lame: «Mam mengã na n zĩnda ne foom, la fo na n tõoga Madiyã nebã fãa, wa f sẽn tõog nin-yende.»

¹⁷ Dẽ, a Zedyõ yeelame: «Yãmb sũur sã n sɩd yaa noog ne maam, bɩ y kõ maam bãnd sẽn wilgd tɩ sɩd yaa yãmb a Wẽnnaam n gom ne maam.

¹⁸ La m kotame tɩ y ra yi zĩ-kãngã, hal tɩ m kẽng n tɩ tall kũun n wa kõ-yã.» Sẽn-Ka-Saab yeela a Zedyõ tɩ b na n yalsame hal t'a tɩ tall n wa.

¹⁹ A Zedyõ kẽng n tɩ kʋʋ bulla, n dɩk zom kɩlo pis-tã n maan bur sẽn ka rã-bɩlle. A Zedyõ ninga nemdã tɛɛgẽ, la a sɩlg bɩɩmã n ning sĩn-bil pʋga, n tall fãa n kẽng tɩ-kãsengã tẽngr n tɩ kõ Sẽn-Ka-Saab malɛɛkã.

²⁰ Wẽnnaam malɛɛkã yeela a Zedyõ yaa: «Rɩk nemdã ne bur sẽn ka rã-bɩllã n dʋʋg kug-kangã zugu, la f rɩk bɩɩmã n walg a zugu.» La a Zedyõ maana a woto.

²¹ Sẽn-Ka-Saab malɛɛkã rɩka a rasaarã a sẽn dag n zãadã n sɩɩs nemdã ne bur sẽn ka ning rã-bɩllã, la bugum n yi kugrẽ wã n dɩ nemdã ne bur sẽn ka ning rã-bɩllã. La Sẽn-Ka-Saab malɛɛkã menema zĩig pʋgẽ yẽnda taoore.

²² Dẽ, a Zedyõ bãngame tɩ yaa Sẽn-Ka-Saab malɛɛka, la a yeelame: «Kayto! Wẽnnaam Sẽn-Ka-Saabo, mam ki yã! Bala, mam yãnda Sẽn-Ka-Saab malɛɛkã neng ne nenga.»

²³ La Sẽn-Ka-Saab yeela a Zedyõ yaa: «Gãneg f yam, la f ra yɛɛs ye. Fo ka na n ki ye.»

²⁴ Dẽ, a Zedyõ mee tẽn-kugr beenẽ Sẽn-Ka-Saab yĩnga, n pʋd a yʋʋr tɩ: «Sẽn-Ka-Saab n kõt vɩ-bãane.» Tẽn-kug-kãng ket n bee a Abiyezɛɛr doogã tẽngẽ Ofra hal tɩ ta rũndã.

A Zedyõ n wã Baall tẽn-kugrã

²⁵ Badaar yʋngo, Sẽn-Ka-Saab yeela a Zedyõ yaa: «Yõk f baaba loalgã, la f bao yʋʋm a yopoe loalg n paase. La f kẽng n wã Baall tẽn-kugrã f ba wã sẽn pʋʋsdã, la f kɛ Aseera ra-lugdgã sẽn be a sɛɛgẽ wã.

²⁶ Rẽ poore, bɩ f rʋ kunkubrã zug n me tẽn-kugr n maneg-a sõama Sẽn-Ka-Saab sẽn yaa fo Wẽnnaamã yĩnga. La f rɩk loalg a yiibẽ soabã, n maan maoong n yõog-a bugum ne Aseera raoog ningã fo sẽn kɛ n kʋrgã.»

²⁷ A Zedyõ yãka neb piig a tʋmtʋmdbã sʋka, n kẽng n tɩ maan wa Sẽn-Ka-Saab sẽn yeel yẽnda wã. La a Zedyõ sẽn dag n yɛɛsd a ba wã yirã rãmbã, la a zoet tẽngã nebã yĩnga, a ka maan bõn-kãng wĩntoog ye, a maan-a-la ne yʋngo.

²⁸ Beoogã sẽn vẽege, bõe la wã? Tẽngã nebã yi n mikame tɩ b wãa Baall tẽn-kugrã la b kɛ Aseera ra-lugdgã sẽn dag n be a sɛɛgẽ wã, la b mik tɩ b kʋʋ loalg a yiibẽ soabã n maan maoong sẽn yõogd bugum tẽn-kugr ning sẽn nan me wã zugu.

²⁹ Dẽ, nebã soka taab tɩ yaa ãnda n maan bõn-kãnga? Bãmb sogsa neb a taaba, la b bao n na n bãng sẽn yaa ned ninga. B togsa bãmb tɩ yaa a Zoaas biig a Zedyõ n maan bõn-kãnga.

³⁰ Woto, tẽngã neb tɩ yeela a Zoaas t'a yiis a biig a Zedyõ n wa ne tɩ b kʋ, tɩ bala, a wãa tẽn-kugrã la a kɛ Aseera ra-lugdgã sẽn dag n be Baall tẽn-kugrã sɛɛgẽ wã.

³¹ Dẽ, a Zoaas yeela neb nins sẽn wa-b yẽnda nengẽ wã yaa: «Rẽ yĩnga, bee ne yãmb tɩ y zab n sõng Baall sɩda? Yãmb tõe y zab n fãaga Baall sɩda? Ned ning sẽn na n zab-a n sõng Baall na n kiime tɩ beoogã ka vẽeg ye. Baall sã n yaa wẽnde, bɩ a zab n sõng a menga, b sẽn sãam yẽnda tẽn-kugrã yĩnga.»

³² Badaare, a Zedyõ sẽn sãam Baall tẽn-kugrã yĩnga, b pʋda a yʋʋr t'a Zeruballe, sẽn dat n togs tɩ ‹Baall zab n sõng a menga.› A Zedyõ kota bãnde.

³³ Madiyã nebã fãa ne Amalɛk nebã, ne neb nins sẽn yit-b yaangã tigma taab n dʋʋg Zʋrdẽ kʋɩlgã, n kẽng n tɩ ti b tãb-sikã Zizreyɛll tẽn-nabdrẽ wã pʋga.

³⁴ Sẽn-Ka-Saab Sɩɩgã kẽ a Zedyõ, la a peeba baorg n bool a Abiyezɛɛr roogã neb fãa tɩ b wa yãag-a.

³⁵ A Zedyõ tʋma neb tɩ b taas Manaase buudã fãa koɛɛgã, la a boola bãmb fãa tɩ b wa yãag-a. La a tʋm neb tɩ b tɩ togs Asɛɛr buudã, Zabulõ buudã ne Neftali buudã. La b fãa yiime n na n seg a Zedyõ rãmba.

³⁶ A Zedyõ yeela Wẽnnaam yaa: «Yãmb sã n dat n talla maam n fãag Israyɛll nebã wa yãmb sẽn dag n yeelã,

³⁷ ade, mam na n dɩka pe-kõbd n yɛdg zɛɛgẽ wã. Yãmb sã n kɩt tɩ meenem madg pe-kõbdã bala, tɩ zĩigã fãa sẽn gilg pe-kõbdã yaool n ket n yaa koɛɛnga, na n yɩɩ bãnd sẽn wilgd tɩ yãmb sɩd na n talla maam n fãag Israyɛll nebã wa yãmb sẽn dag n yeelã.»

³⁸ La bũmba fãa kell n yɩɩ wa a Zedyõ sẽn kosã. Vẽkembeoogo, a Zedyõ yika yibeoog pĩnda, n dɩk pe-kõbdã n wẽke, tɩ meenemã rʋʋg n pid wũmbla.

³⁹ A Zedyõ yeela Wẽnnaam yaa: «M kotame tɩ y ra yik y sũur ne-m ye. Bala, mam sã n gom woto, m ka na n leb gom ye. Mam dat n leb n paama bãnd a to ne pe-kõbdã n paase. Bɩ y kɩt tɩ pe-kõbdã yɩ koɛɛnga, tɩ zɛɛgã zĩiga fãa madge.»

⁴⁰ La badaar yʋngo, Wẽnnaam kɩtame tɩ yɩ a woto bala. Pe-kõbdã rag n yaa koɛɛnga, tɩ zɛɛgã zĩigã fãa yaa meenem.