Bʋ-kaoodba 3 - WẼNNAAM SEBRE 2014

¹ Sẽn-Ka-Saab basa buud kẽer tẽngã pʋgẽ, n na n mak Israyɛll neb nins fãa sẽn dag n ka zĩnd-b Kana zabrã wakatã.

² Sẽn-Ka-Saab rag n datame bala, n kɩt tɩ Israyɛll yagens nins sẽn ka mi zabrã tõog n zãms zabre, la b bãng zabr sẽn yaa bũmb ninga.

³ Bãmb sẽn bas buud nins tẽngẽ wã la woto, yaa Filistẽ-dãmbã soolem nanambs a nu wã, ne Kana-rãmba fãa, la Sɩdõ nebã, ne Hevi-rãmbã sẽn dag n be Libã tãmsã sʋkã, sẽn sɩng ne Baall-Hɛrmo tãngã n tɩ tãag Lebo-Hamate.

⁴ Bãmb sẽn bas bu-bãmb beenẽ wã, yaa sẽn na n yɩl n mak Israyɛll nebã, n ges b sã n na n saka Sẽn-Ka-Saab tõodã b sẽn dag n kõ a Moyiis t'a kõ b yaab-rãmbã.

⁵ Woto, Israyɛll nebã zĩnda Kana-rãmbã ne Hɛt-rãmbã, la Amoor-dãmbã ne Perɛɛz-rãmbã la Hevi-rãmbã ne Zebuus-rãmbã sʋka.

⁶ Israyɛll nebã peega bu-bãmb kom-pugli wã n maan b pagba, la b rɩgs b kom-pugli n kõ bu-bãmb kom-dibli wã tɩ b maan b pagba, la b pʋʋs bu-bãmb wẽn-naandsã.

A Otiniyɛll kibare

⁷ Israyɛll nebã maana sẽn yaa wẽng Sẽn-Ka-Saab nifẽ. Bãmb yĩma Sẽn-Ka-Saab sẽn yaa bãmb Wẽnnaamã yelle, n waoog Baall wẽn-naands ne Aseera wẽn-naandse.

⁸ Sẽn-Ka-Saab sũur puuga ne Israyɛll nebã, tɩ b kɩt tɩ Mezopotami rĩm a Kusã-Risatayim tõog-ba. La yẽnda sooga Israyɛll nebã yʋʋm a nii.

⁹ La Israyɛll nebã kelem n boola Sẽn-Ka-Saab n kos tɩ b sõng-ba, la Sẽn-Ka-Saab yãka fãagd n kõ Israyɛlle. Yaa a Kalɛɛb yao a Kenaaz biig a Otiniyɛlle.

¹⁰ Sẽn-Ka-Saab Sɩɩgã siga a Otiniyɛll zugu, la a lebga Israyɛll bʋ-kaooda, la yẽnda kẽngame n tɩ zabe. La Sẽn-Ka-Saab kɩtame t'a Otiniyɛll tõog a Kusã-Risatayim sẽn yaa Mezopotami rĩmã, la yɩɩ ne tõog-kãsenga.

¹¹ Dẽ, tẽngã zĩnda bãan yʋʋm pis-naase. La a Kenaaz biig a Otiniyɛll kiime.

A Ewuud kibare

¹² Israyɛll nebã leb n maana sẽn yaa wẽng Sẽn-Ka-Saab nifẽ. Dẽ, Sẽn-Ka-Saab kõo Moaab rĩm a Eglõ pãng t'a tõog Israyɛll nebã, bãmb sẽn maan tʋʋm-beed Sẽn-Ka-Saab nifẽ wã yĩnga.

¹³ Rĩm a Eglõ kɩtame tɩ Amo nebã ne Amalɛk rãmbã wa naag yẽnda tɩ b tɩ zab ne Israyɛll nebã n tõog n deeg komsã tẽngã.

¹⁴ Woto, Moaab rĩm a Eglõ sooga Israyɛll nebã yʋʋm piig la a nii.

¹⁵ Israyɛll nebã leb n kelem n boola Sẽn-Ka-Saabo, la Sẽn-Ka-Saab yãka fãagd n kõ-ba, yaa Benzame buudã ned a Geera biig a Ewuudi. La a Ewuud dag n yaa gobre. Israyɛll nebã kɩsa a Ewuud yaood t'a tɩ kõ Moaab rĩm a Eglõ.

¹⁶ A Ewuud maana zabr sʋʋg sẽn tar noy a yiibu, t'a woglmã tat kãntɩɩga. Yẽnda sẽbga sʋʋgã a rɩtg gere, a futã tẽngre.

¹⁷ A Ewuud rɩka yaoodã n kõ Moaab rĩm a Eglõ. La a Eglõ yaool n dag n yaa ned sẽn nob wʋsgo.

¹⁸ A Ewuud sẽn kɩs rĩmã yaoodã n sɛ, a talla neb nins sẽn tʋk yaoodã tɩ b yi n looge.

¹⁹ La a Ewuud sẽn wa n ta kug wẽn-naandsã zĩig sẽn be Gilgallã, a lebg n waa rĩm a Eglõ nengẽ n yeel-a yaa: «N-na! Ad-y mam tara m koɛɛg n dat n togs yãmb y yembr bala.» La rĩmã kɩtame tɩ neb nins fãa sẽn dag n be-b be wã yi yɩnga.

²⁰ Rĩmã rag n be a yĩngr doogã pʋg a yembr n zĩ n kokd pemsem. Dẽ, a Ewuud kolga rĩmã n yeele: «Koɛɛg ning Wẽnnaam sẽn kõ maam tɩ m wa taas-yã la woto.» A Eglõ yika a zaoogẽ wã.

²¹ Dẽ, a Ewuud wõoga zabr sʋʋgã sẽn dag n be a rɩtg gerẽ wã ne a goabga, n kõs a Eglõ pʋgã.

²² Sʋʋgã ne a gãtgã fãa kẽeme, tɩ kaamã lebg n lud sʋʋgã, la a Ewuud basa sʋʋgã n ka feoog ye, la sʋʋgã sãag n yi a poorã zugu.

²³ A Ewuud lebsa yĩngr doogã noy n pag ne kʋɩlen-bila, n yaool n tũ no-bilẽ n yi n looge.

²⁴ A Ewuud sẽn yi n loogã poore, rĩmã tʋmtʋmdb waa n mikame tɩ yĩngr doogã paga ne kʋɩlen-bila. Dẽ, bãmb yeelame: «Naab tog n maanda we-kɛɛnga.»

²⁵ Tʋmtʋmdbã yasa yɩng n gũudẽ, la b sẽn mik tɩ rĩmã kaoosdame n ka pakd yĩngr doogã kʋɩlengã, bãmb rɩka kʋɩlen-bil n pak n na n gese, la bõe la wã? B soaalã ki n dɩga tẽnga.

²⁶ Tʋmtʋmdbã sẽn wa n yas roogã noor n gũudẽ wã, rẽ t'a Ewuud paama n zoe n zãagame. A Ewuud zoeeme n loog kug wẽn-naandsã zĩig n tees Seyɩɩrã sẽnẽ n põse.

²⁷ Yẽnda sẽn ta beenẽ, yẽnda peeba baorg Efrayiim soolem ning sẽn be tãmsã sʋka. La Israyɛll nebã yi n babsa yẽnda tãngã zug n tũ-a n sigi, la yẽnda rag n bee b taoore.

²⁸ A Ewuud yeela Israyɛll nebã yaa: «Pʋg-y maam, bala, Sẽn-Ka-Saab ninga Moaab nebã sẽn yaa y bɛɛbã y nugẽ.» Dẽ, bãmb tũu yẽnda n sig n gɩd Zʋrdẽ kʋɩlgã zĩ-rʋʋgdgã sẽn dabd Moaab sẽnẽ wã, la b ka bas ned ba a yembr tɩ rʋʋg kʋɩlgã ye.

²⁹ Wakat-kãnga, Israyɛll nebã sẽn kʋ Moaab nebã sõor kolga tus piiga. Moaab tãb-biisã rag n yaa pãens rãmba, la b yaa gãndaado, la bãmb ned ba a ye ka põs ye.

³⁰ Badaare, Israyɛll nebã tõoga Moaab nebã n ning-b yãnde. La sẽn sɩng ne wakat-kãnga, tẽngã zĩnda bãan yʋʋm pis-nii.

A Samgaar kibare

³¹ A Ewuud loogr zugẽ, yaa a Anat biig a Samgaar n pʋgle. A Samgaar talla niig rasaar n tõog n kʋ Filistẽ-dãmbã neb kobs-yoobe. A Samgaar me yɩɩ ned sẽn fãag Israyɛll nebã.