Bʋ-kaoodba 21 - WẼNNAAM SEBRE 2014

B baoo pagb n leb n kõ Benzame buudã

¹ Israyɛll nebã rag n wẽena Mispa, n yeel tɩ bãmb ned ba a yembr ka na n dɩk a biiga, n kõ Benzame buudã ned t'a maan a pag ye.

² La Israyɛll nebã lebg n leba Betɛlle, la b paa Sẽn-Ka-Saab taoor beenẽ n tãag zaabre. La bãmb zẽka b koees n yãbd wʋsgo,

³ la b yet Sẽn-Ka-Saab yaa: «Sẽn-Ka-Saab sẽn yaa Israyɛll Wẽnnaam, maana a wãna, tɩ yell a woto paam Israyɛlle? Maana a wãn tɩ Israyɛll buud a yembr sɛ zãnga?»

⁴ Vẽkembeoog yibeoog pĩnda, nebã yikame n me tẽn-kugr beenẽ, la b maan maand sẽn yõogd bugum ne zems-n-taar maando.

⁵ Israyɛll nebã sokame yaa: «Israyɛll buudã fãa sʋka, yaa bu-bʋg n ka tũ nebã n kẽng Sẽn-Ka-Saab taoor Mispa? Bala, tõnd dag n wẽename n yeel tɩ ned ning fãa sẽn ka tũ-a n kẽng Sẽn-Ka-Saab taoor Mispa, bɩ b kʋ a soaba.»

⁶ Benzame buudã sẽn yaa Israyɛll nebã saam-biisã nimbãaneg yõka bãmb tɩ b rag n yetẽ yaa: «Ade, Israyɛll buudã sʋka, buud a yembr n sɛ zãnga.

⁷ Tõnd na n maana a wãn n sõng b neb nins sẽn ketã tɩ b paam pagba? Bala, tõnd dag n wẽena ne Sẽn-Ka-Saab yʋʋr n yeel tɩ tõnd ka na n dɩk d kom-pugli wã n kõ-b tɩ b maan b pagb ye.»

⁸ Dẽ, Israyɛll nebã sokame yaa: «Rẽ yĩnga, buud bee Israyɛll buudã sʋk n ka tũ n kẽng Sẽn-Ka-Saab taoor Mispa bɩ?» La b mikame tɩ Galaad-Yabɛɛs ned ba a yembr ka wa tiging sẽn zĩnd tãb-sikẽ wã ye.

⁹ Dẽ, b kɩtame tɩ b sõd nebã, la b ka tol n yãnd Galaad-Yabɛɛs tẽngã ned ba a yembr be ye.

¹⁰ Dẽ, Israyɛll nebã tʋma gãndaad tus piig la a yiib n yeel-b yaa: «Kẽng-y n tɩ kʋ-y Galaad-Yabɛɛs nebã. Kʋ-y pagbã ne kambã.

¹¹ Ad yãmb sẽn na n maan bũmb ninga: Kʋ-y raopã fãa, ne pagb nins fãa sẽn zoe n mi raoã.»

¹² Dẽ, bãmb yãnda Galaad-Yabɛɛs kom-pugli kobs-naas sẽn nan ka tol n bãng raoa, n peeg-b n kẽng tãb-sikẽ wã Sɩlo sẽn be Kana soolmẽ wã.

¹³ Israyɛll nebã fãa naaga taab n tʋm neb tɩ b kẽng Benzame buudã sẽn be Rimo pĩigã sẽnẽ wã nengẽ n tɩ yeel-b tɩ zabr ka leb n be Israyɛll nebã ne Benzame nebã sʋk ye.

¹⁴ Wakat-kãnga, Benzame nebã lebg n waame. Dẽ, b rɩka Galaad-Yabɛɛs kom-pugli nins b sẽn bas n ka kʋ wã n kõ Benzame nebã tɩ b maan b pagba, la pagbã sõor ka sek tɩ ta bãmb fãa ye.

¹⁵ Benzame nebã nimbãaneg yõka Israyɛll nebã, bala, Sẽn-Ka-Saab kɩtame tɩ Israyɛll buud a yembr sɛ.

¹⁶ Israyɛll nebã kãsem-dãmbã sokame: «Tõnd na n maana a wãn tɩ neb nins sẽn kell-bã paam pagba? Bala, pagb la sẽn ka leb n ket Benzame buudã pʋgẽ la.»

¹⁷ Dẽ, kãsem-dãmbã kell n yeelame yaa: «A yaa neere, tɩ Benzame buudã sẽn põsã kell n paam kamba, tɩ Israyɛll buudã buud a yembr tõr da menem zãng ye.

¹⁸ Tõnd yaool n ka tõe n dɩk d mens kamb n kõ-b tɩ b maan b pagb ye. Bala, Israyɛll nebã rag n wẽename n yeel tɩ Israyɛll ned sã n dɩk a biig n kõ Benzame buudã ned t'a maan a paga, bɩ kãab-wẽng zĩnd a soab zugu.»

¹⁹ Israyɛll nebã leb n yeelame: «Ade, yʋʋmd fãa, b maanda tigr Sɩlo n waoogd Sẽn-Ka-Saabo.» Sɩlo bee Betɛll rɩtgo, n kell n be sor ning sẽn yit Betɛll n dabd Sɩkɛmã yaang sẽnẽ, n be Lebona goabga.

²⁰ Woto, bãmb yeela Benzame nebã yaa: «Kẽng-y n tɩ soond-y reezẽ tɩɩs pʋtã pʋs n gũusdẽ.

²¹ La yãmb sã n wa n yãnd Sɩlo pʋg-sadbã sẽn yi n na n sao, bɩ y yi tɩ yãmb ned kam fãa wudg n yõk pʋg-sad a yembr n tall n kuil a yir Benzame nebã soolmẽ n tɩ maan a paga.

²² Sã n mik tɩ bãmb ba-rãmbã bɩ b tãopã rat n wa zaba ne tõndo, tõnd na n yeel-b lame tɩ b maan Benzame buudã sugri, tɩ bala, Yabɛɛs zabrã wakate, tõnd ka paam pagb n kõ bãmb ned kam fãa ye. Sẽn ka yãmb mens n dɩk y kom-pugli wã n kõ-bã, taal ka na n zĩnd yãmb zut ye.»

²³ Dẽ, Benzame nebã maana a woto. Bãmb ned kam fãa yõka pʋg-sad a yembr pʋg-sadb nins sẽn yi n na n sao wã sʋk n tall n kuil a yiri. Bãmb lebg n tɩ lebs n mee tẽmsã n kẽ.

²⁴ Badaar bala, Israyɛll nebã fãa loogame, tɩ ned kam fãa leb a soolmẽ, a buudẽ, la a roogẽ.

²⁵ Wakat-kãnga, Israyɛll nebã rag n ka tar dĩm ye. La ned kam fãa rag n maanda a sẽn tagsd tɩ zemsame.