Bʋ-kaoodba 2 - WẼNNAAM SEBRE 2014

Sẽn-Ka-Saab malɛɛkã kẽnga Bokim

¹ Sẽn-Ka-Saab malɛɛk yii Gilgall n kẽng Bokim n tɩ yeel Israyɛll nebã yaa: «Mam yiisa yãmb Ezɩpt tẽnga, n tall yãmb n kẽng tẽng ning mam sẽn dag n wẽen n yeel tɩ m na n kõ y yaab-rãmbã. La mam yeelame: Mam ka na n tol n leb n sãam kaool ning mam sẽn maan ne yãmbã ye.

² Bɩ yãmb da wa saag n maan kaool ne tẽn-kãngã nebã ye. La bɩ y wã bãmb tẽn-kugã. La yãmb ka kelg mam koɛɛgã ye. Yaa bõe tɩ yãmb maan woto?

³ Dẽ, mam yeelame yaa: Mam ka na n leb n dig y bɛɛbã n kõ-y ye. Bãmb na n bee ne yãmba, tɩ bãmb wẽnnaam-dãmbã lebg bẽdg yãmb yĩnga.»

⁴ Malɛɛkã sẽn gom ne Israyɛll nebã a woto n sɛ, Israyɛll nebã zẽka b koees n yãbe.

⁵ La bãmb pʋda zĩigã yʋʋr tɩ Bokim sẽn dat n togs tɩ ‹yãbdba›, la bãmb maana maoong beenẽ n kõ Sẽn-Ka-Saabo.

A Zozoe kũum

⁶ A Zozoe kuilsa Israyɛll nebã, la Israyɛll buud fãa kẽng n tɩ kẽ n sooga tẽng ning b sẽn pʋɩ n kõ-a wã.

⁷ A Zozoe vɩɩmã tɛka, nebã saka Sẽn-Ka-Saabo, la yẽnda kũumã zugẽ, kãsem-dãmb nins sẽn yãnd tʋʋm-kãsems nins fãa Sẽn-Ka-Saab sẽn maan n kõ Israyɛllã vɩɩm tɛka, nebã kell n saka Sẽn-Ka-Saabo.

⁸ Sẽn-Ka-Saab tʋmtʋmd a Zozoe sẽn yaa a Nun biigã kii a yʋʋm koabg la piiga.

⁹ B muma a Zozoe soolem ning sẽn yaa yẽnda soolmã pʋgẽ, Timnat-Herɛɛs sẽn be Efrayiim soolem ning sẽn be tãmsã sʋka, Gaas tãngã rɩtgo.

¹⁰ Zamaan-kãng nebã fãa me kiime n sak b saam-dãmba, la zamaan a to n pʋgl bãmb n wa, n dag n ka mi Sẽn-Ka-Saabo, la b ka mi tʋʋm-kãsems nins Sẽn-Ka-Saab sẽn maan n kõ Israyɛll nebã me ye.

Israyɛll nebã kɩɩsgo, la b sɩbgre

¹¹ Israyɛll nebã maana sẽn yaa wẽng Sẽn-Ka-Saab nifẽ. Bãmb pʋʋsa Baall wẽn-naandse.

¹² Bãmb basa Sẽn-Ka-Saab sẽn yaa b yaab-rãmbã Wẽnnaamã sẽn yiis bãmb Ezɩpt tẽngã, n kẽng n tɩ tũud buud nins sẽn gũbg bãmbã wẽn-naandse. Bãmb wõgemda wẽn-naandsã taoor n pʋʋs-ba, n kɩt tɩ Sẽn-Ka-Saab sũur puugi.

¹³ Bãmb basa Sẽn-Ka-Saab pʋʋsg n tɩ pʋʋsd Baall ne Astarte rãmba.

¹⁴ Sẽn-Ka-Saab sũur puuga ne Israyɛll nebã, la b basame tɩ fãadb fã-ba. Sẽn-Ka-Saab basame tɩ Israyɛll nebã lʋɩ b bɛɛbã sẽn gũbg bãmbã nusẽ, la bãmb dag n ka leb n tar pãng n na n tõog n zab ne b bɛɛbã ye.

¹⁵ Rẽ, wakat fãa, Israyɛll nebã sã n kẽng n na n tɩ zabe, Sẽn-Ka-Saab sũurã sẽn ket n puud ne bãmbã yĩnga, b bɛɛbã tõogd-b-la wa Sẽn-Ka-Saab sẽn dag n yeel bãmbã, la wa b sẽn dag n wẽen ne bãmbã. Rẽ kɩtame tɩ yellã pak Israyɛll nebã wʋsgo.

¹⁶ Dẽ, Sẽn-Ka-Saab yãka bʋ-kaoodb n lʋɩɩs Israyɛll nebã taoore, tɩ b zabd n fãagd bãmb b fãadbã nusẽ.

¹⁷ La Israyɛll nebã kell n ka sak b bʋ-kaoodbã me ye. Bala, Israyɛll nebã basa Sẽn-Ka-Saabo, n koos b mens ne wẽnnaam-dãmb a taab n wõgemd b taoore. Bãmb wẽnemda tao-tao n bas b yaab-rãmbã sẽn dag n tũud sor ning n sakd Sẽn-Ka-Saab tõodã. Bãmb ka sak Sẽn-Ka-Saab tõodã wa b yaab-rãmbã sẽn dag n maanã ye.

¹⁸ Sẽn-Ka-Saab sã n dag n yãk bʋ-kaood n kõ Israyɛll nebã, Sẽn-Ka-Saab meng n dag n be ne bʋ-kaoodã a vɩɩm tɛka, n sõngd-a t'a tõogd n fãagd Israyɛll nebã ne b bɛɛbã. Bala, bãmb wõosgã pʋga, la neb nins sẽn maand bãmb pãng n namsd-bã yĩnga, Sẽn-Ka-Saab zoeta bãmb nimbãanega.

¹⁹ La bʋ-kaoodã sã n wa n ki, bãmb lebd n wẽnemdame n maan wẽngã n yɩɩg b ba-rãmbã sẽn dag n maanã, n tũud wẽnnaam-dãmb a taaba, la b pʋʋsd-ba, n wõgemded bãmb taoore. La b ka basd b tʋʋm-beedã ne b sũ-keglmã ye.

²⁰ La Sẽn-Ka-Saab sũur puuga ne Israyɛll nebã tɩ b yeele: «Bu-kãngã sẽn sãam mam kaoolã mam sẽn dag n gʋls n kõ b yaab-rãmbã, la b sẽn ka kelg mam goamã yĩnga,

²¹ mam me ka na n kɩt tɩ b tõog n zab n deeg a Zozoe sẽn ki n bas tẽms ninsã baa a yembr ye.

²² Bõn-kãens na n yɩɩ makr maam a Sẽn-Ka-Saab sẽn na n mak Israyɛll nebã n gese, b na n sak n tũu mam sorã wa b yaab-rãmbã sẽn dag n tũ wã bɩ, bɩ b ka na n tũ.»

²³ Dẽ, Sẽn-Ka-Saab basa bu-kãens tɩ b vʋʋse, n ka rig-b tao-tao ye. Sẽn-Ka-Saab rag n ka kɩt t'a Zozoe rig bãmb ye.