Bʋ-kaoodba 19 - WẼNNAAM SEBRE 2014

Leevi ned a yembr ne a pag kibare

¹ Wakat-kãnga, Israyɛll nebã rag n ka tar dĩm ye. Leevi ned a yembr n dag n tɩ kẽed Efrayiim soolem ning sẽn be tãms sʋkã yaanga, n tar pʋg-rɩkdg sẽn yaa Betlehɛm sẽn be Zʋʋda wã bi-pugla.

² Leevi nedã pʋg-rɩkdgã zaba ne yẽnda n zoe n kuil a ba-yir Betlehɛm, n tɩ zĩnd be kiis a naase.

³ Leevi nedã yikame n peeg a rakõore, la a tall a bõens a yiib n kẽng a pʋg-rɩkdgã nengẽ n na n tɩ bels-a n tall n wa. Pagã talla a sɩdã n kẽ a ba wã zakẽ, la a ba wã sẽn yãnd a biigã sɩdã, a reeg-a-la ne sũ-noogo.

⁴ Pagã baaba kosa a rɛɛmbã t'a pa ne bãmba, la Leevi nedã paa a pagã baaba zakẽ n gãand rasem a tãabo, tɩ b rɩtẽ la b yũuda.

⁵ La rasem a naasã daare, bãmb yika yibeoog pĩnda, tɩ Leevi nedã yeel t'a na n kuilame. La pagã baaba yeela yẽnda yaa: «Yaas-y tɩ b maan dɩɩb tɩ y rɩ n paam pãng n yaool n dɩk sore.»

⁶ Dẽ, bãmb b yiibã zĩndame n naag taab n dɩ la b yũ. La pagã baaba yeela pagã sɩd yaa: «M kot-f lame, tɩ f kell n pa n gãand ka yʋngã n noog f sũuri.»

⁷ Pagã sɩdã yikame t'a na n looge, la a rɛɛmbã sẽn pẽdg-a wã yĩnga, a leb n paa be n gãand badaar yʋngo.

⁸ Rasem a nu wã daare, Leevi nedã leb n yika yibeoog pĩnd t'a na n kuili. La a pagã baaba yeel-a lame yaa: «Yãmb ka na n dɩ la y yals tɩ zĩigã maag tɩ y yaool n looge?» Dẽ, bãmb b yiibã naaga taab n dɩ.

⁹ La Leevi nedã yika ne a pagã, la a rakõorã n na n looge, la a rɛɛmbã yeel-a lame yaa: «Yãmb ka ne tɩ zĩiga maagame tɩ rat n lebg yʋngo? Dẽ wã, pa-y ka n gãand n noog y sũuri, tɩ y na yik beoog yibeoog pĩnd n dɩk sor n kuili.»

¹⁰ La pagã sɩdã rag n ka leb n dat n gãand beenẽ ye. Dẽ, a yikame n looge. Woto, yẽnda ne a bõens a yiibã sẽn zɩt zɩɩbo, n paas a pʋg-rɩkdgã kẽn n tɩ taa Zebuus tẽngã b sẽn boond tɩ Zeruzalɛmã.

¹¹ Bãmb sẽn kolg Zebuusã, rẽ tɩ wĩndgã kẽe wʋsgo. Rakõorã yeela a soaalã yaa: «Wa-y tɩ d bʋdg n kẽng Zebuus-rãmbã tẽng sẽn tondã n tɩ gãande.»

¹² La a soaalã leok-a lame: «Tõnd ka na n bʋdg n kẽng bu-zẽms tẽngẽ, Israyɛll neb sẽn ka beẽ ye. Tõnd na n kẽng n tɩ gãanda Gɩbeya.»

¹³ Pagã sɩdã leb n yeela a rakõorã yaa: «D modg n ta Gɩbeya bɩ Rama n gãand be.»

¹⁴ La bãmb kell n tara kẽna, la zĩigã sẽn wa na n sobgã tɩ bãmb kolga Gɩbeya sẽn yaa Benzame buudã soolmã.

¹⁵ Dẽ, bãmb bʋdgame n na n tũ Gɩbeya n gãande. La bãmb sẽn ta tẽngã pʋgẽ, bãmb kẽnga raagẽ wã n tɩ zĩndi, la tẽngã ned ba a yembr ka reeg bãmb gãag sobend a yir yʋn-kãng ye.

¹⁶ La zĩ-sobd wakate, nin-kẽem a yembr n tɩ tʋm a pʋʋgẽ n lebg n kuiisẽ. Rao-kãng rag n yaa Efrayiim soolem ning sẽn be tãms sʋkã neda, n dag n tɩ kẽed Gɩbeya tẽngã, la tẽngã nebã yaa Benzame buudu.

¹⁷ Nin-kẽemã zẽka a neng n yãnd sãanã t'a zĩ tẽngã raag pʋga. La nin-kẽemã soka sãanã a sẽn yitẽ, la a sẽn dabdẽ.

¹⁸ Dẽ, sãanã leokame: «Tõnd yii Betlehɛm sẽn be Zʋʋda soolmã n dabd Efrayiim soolem ning sẽn be tãms sʋkã yaanga, tɩ bala m yaa be neda. Mam dag n kẽnga Betlehɛm sẽn be Zʋʋda soolmẽ wã. Dẽ, mam lebg n lebda Sẽn-Ka-Saab roogẽ wã, la ned baa a yembr ka reeg maam sãand a yir ye.

¹⁹ La tõnd yaool n tara moodo, la yamd d bõensã yĩnga, la d tar dɩɩbo, ne reezẽ rãam maam ne m pagã la m rakõorã sẽn tũud maamã yĩnga. Bũmb ka paoog tõnd ye.»

²⁰ Nin-kẽemã yeelame yaa: «Bɩ y gãneg y yam. Mam na n deega yãmb m yiri, la m ges y yell ne bũmb fãa. Bɩ y ra gãand raagẽ wã ye.»

²¹ Dẽ, nin-kẽemã talla bãmb n kuil a yiri, n kõ yẽnda bõensã yamdo. La sãambã waasa b nao, la b rɩɩme la b yũ.

²² Dẽ, wakat ning bãmb sẽn maand sũ-noogã, ade, nin-yood n yi tẽnga pʋgẽ n wa gũbg nin-kẽemã yirã. Nin-bãmb dag n pãbda kʋɩlengã, la b yet nin-kẽemã sẽn yaa yirã soabã yaa: «Yiis rao ning sẽn kẽ fo roogẽ wã n kõ tõnd tɩ d gãand-a.»

²³ La yirã soab yiime n yeel-b yaa: «Ayo! M saam-biisi, mam kot-y lame tɩ y ra maan wẽng ye. Bala, yaa mam zakẽ la raoã sẽn sigã. Dẽ wã, bɩ y ra maan yel-beed a woto ye.

²⁴ Ade, mam tara bi-pugl sẽn nan ka mi rao ye, n paas raoã pʋg-rɩkdgã. Bas-y tɩ m yiis bãmb n kõ-yã, tɩ y maan y sẽn dat ne-ba, la y ra maan yel-beed a woto ne rao-kãngã ye.»

²⁵ La nin-kãensã ka kelg yirã soab goam ye. Dẽ, raoã taka a pʋg-rɩkdgã n yiis n kõ-ba. Bãmb gãanda pagã n nams-a yʋngã tõre, hal tɩ beoogã vẽege. Dẽ, zĩigã sẽn sɩng yẽegre, bãmb basa pagã t'a looge.

²⁶ Zĩ-yẽegr wakate, pagã lebg n waa nin-kẽemã yiri, zĩig ning a sɩdã sẽn be wã. La a vik n lʋɩɩ roogã noore, n pa be hal tɩ beoogã vẽege.

²⁷ La yibeoogo, Leevi nedã yik n paka roogã noor n yi n na n looge, la a mikame t'a pʋg-rɩkdgã lʋɩ n dɩg roogã noore, t'a nusã palg rigno-koakã.

²⁸ Raoã yeela a pagã t'a yik tɩ b looge. La pagã ka leok tɩ bũmb ye. Dẽ, raoã rɩk-a lame n palg a bõang n loog n kuil a yiri.

²⁹ Leevi nedã sẽn ta a yiri, a rɩka a sʋʋg n pas a pagã zĩis piig la a yiibu, n tʋm Israyɛll buud piig la a yiibã soolem-dãmbã fãa pʋse.

³⁰ Neb nins fãa sẽn yãnd bõn-kãngã wã yeelame: «Israyɛll nebã sẽn yi Ezɩpt tẽngã hal tɩ ta rũndã, bũmb a woto nan zɩ n zĩnd ye. Tags-y n ges-y-yã, la y yẽs ne taab n bãng y sẽn na n maanega.»