Bʋ-kaoodba 18 - WẼNNAAM SEBRE 2014

A Mika ne Dan buudã

¹ Wakat-kãnga, Israyɛll nebã rag n ka tar dĩm ye. La wakat-kãng me tɩ Dan buudã rag n baooda tẽng n na n kẽ. Bala, hal tɩ ta sasa-kãnga, Dan buudã rag n nan ka paam zĩig ba a ye Israyɛll buudã sʋka, n na n maan b tẽng ye.

² Dẽ, Dan buudã yãka gãndaad a nu bãmb sʋkã, n na n tʋm-b tɩ b yi Soreya ne Ɛstaoll n kẽng n tɩ gilg n ges tẽngã, n bãng a sẽn yaa to-to. Bãmb yeela neb a nu wã yaa: «Kẽng-y n tɩ gilg-y n ges-y tẽngã.» Dẽ, bãmb taa Efrayiim soolem ning sẽn be tãms sʋkã, a Mika yirã sẽn be zĩig ningã, la bãmb gãanda beenẽ yʋn-kãnga.

³ Bãmb sẽn dag n ka zãr ne a Mika zakã yĩnga, bãmb dag n wʋmda koe-sãang sẽn yit be, la rag n yaa Leevi bi-bɩɩgã koɛɛga. La bãmb lebg n kẽngame n tɩ sok-a yaa: «Ãnda n wa ne foom ka? Fo wa n bee zĩ-kãngã n maand bõe? Bõe tʋʋmd la fo tʋmd kaanẽ?»

⁴ Bi-bɩɩgã leoka bãmb n yeel t'a Mika gesa yẽnda yelle, n dɩk-a t'a lebg a maan-kʋʋda, la a yaood-a ligdi.

⁵ Bãmb yeela bi-bɩɩgã yaa: «D kotame tɩ f sok Wẽnnaam n ges tõnd so-toakã sã n na n yɩɩ neere.»

⁶ La maan-kʋʋdã yeel-b lame tɩ b kẽng ne laafɩ, tɩ Sẽn-Ka-Saab na n zĩnda ne-b b so-toakã pʋgẽ.

⁷ Dẽ, neb a nu wã kẽng n tɩ taa Lakiis, la bãmb mikame tɩ tẽngã neb vɩɩ ne laafɩ la bãane, wa Sɩdõ tẽngã nebã sẽn vɩ to-to wã, tɩ rabeem ka tar-b ye. La soolmã pʋga, tẽms nins sẽn yaa bãmb yagsã ba a ye rag n ka tar yell ne bãmba, la ned me rag n ka be tẽngã pʋg n weoogd bãmb ye. Bãmb dag n zãra ne Sɩdõ tẽngã, la b rag n ka baood lagem-n-taar ne ned ye.

⁸ Dẽ, neb a nu wã lebg n leba b saam-biisã sẽn be Soreya ne Ɛstaollã nengẽ. La bãmb saam-biisã sok-b lame yaa: «Yãmb kẽngame tɩ yaa a wãna?»

⁹ La neb a nu wã leokame: «Yik-y tɩ d kẽng n tɩ zab ne-ba, bala, tõnd yãame tɩ tẽngã yaa sõama wʋsgo. Yãmb na n zĩi ka zaalem bala? Da maan-y kʋɩʋʋng ye. Yik-y tɩ d kẽng n tɩ reeg tẽngã.

¹⁰ Yãmb sã n ta, y na n mikame tɩ yaa neb sẽn zĩ ne laafɩ la bãane. Tẽngã yaa yalenga, la Wẽnnaam dɩk-a lame n ning yãmb nusẽ. Bũmb ka be dũniyã zug n ka be beenẽ ye.»

¹¹ Dẽ, Dan buudã neb kobs-yoob boba b zab-teedo, n sũ tãpo, n yi Soreya ne Ɛstaoll n na n tɩ zabe.

¹² Bãmb kẽngame, n tɩ tilg b tãb-sikã Kiryat-Yayerim sẽn be Zʋʋda soolmẽ wã. Yaa woto n kɩt tɩ b ket n boond zĩig ning sẽn be Kiryat-Yayerim Nin-taoorã tɩ Mahane-Dan sẽn dat n togs tɩ ‹Dan tãb-sika› hal tɩ ta rũndã.

¹³ Bãmb yii beenẽ n pɩʋʋg Efrayiim soolem ning sẽn be tãms sʋkã, n ta a Mika yirã.

¹⁴ Dẽ, neb a nu wã sẽn dag n kẽng n tɩ gilg n ges Layiis tẽngã yeela b saam-biisã yaa: «Rẽ yĩnga, yãmb miime tɩ ro-bãmbã sẽn tondã, maan-kʋʋr fuugu, ne wẽn-naandse, la wẽn-naandga, n paas wẽn-naandg b sẽn bolg ne wanzuri n be beenẽ sɩda? Bee ne yãmb tɩ y bãng y sẽn na n maaneg moasã.»

¹⁵ Bãmb bʋdgame n tɩ kẽ Leevi bi-bɩɩgã zakã sẽn be a Mika yirã n pʋʋs-a n sok a keelem.

¹⁶ Wakat-kãng tɩ Dan buudã neb kobs-yoobã rag n boba zab-teedã n yas zakã noore.

¹⁷ Dẽ, neb a nu wã sẽn dag n kẽng n tɩ gilg n ges tẽngã kẽngame n tɩ kẽ roogẽ wã n dɩk wẽn-naandgã, la b rɩk maan-kʋʋr fuugã, la b wʋk wẽn-naandsã ne wẽn-naandgã b sẽn bolg ne wanzuri wã. La wakat-kãng tɩ maan-kʋʋdã rag n yasa zakã noor ne neb kobs-yoobã sẽn bob b zab-teedã.

¹⁸ La maan-kʋʋdã sẽn yãnd b sẽn wʋkd te-bãmbã, a sok-b lame yaa: «Yaa bõe la yãmb sẽn maandã?»

¹⁹ La bãmb leoka yẽnda yaa: «Sĩnd f noor la f wa tũ tõnd n tɩ lebg tõnd ba la d maan-kʋʋda. Rẽ yĩnga, fo sẽn yaa nin-yɛng zak maan-kʋʋd n yaa sõama bɩ? Bɩ fo sẽn na n lebg Israyɛll buud a yembr maan-kʋʋd n yaa sõama?»

²⁰ La maan-kʋʋdã sũur yɩɩ noogo, t'a rɩk maan-kʋʋr fuugã, ne wẽn-naandsã, la wẽn-naandgã n wa yals n naag nebã.

²¹ Dẽ, bãmb lebgame n dɩk b sor n loogdẽ. Bãmb dɩka neb nins sẽn ka tõe n zab-b zabrã, ne rũmsã, la teedã n lʋɩɩs taoore.

²² Dan buudã neb sẽn wa n zãag ne a Mika yirã, neb nins fãa sẽn dag n yaa a Mika yagsã sũu taab n na n babs Dan buudã.

²³ Bãmb dag n sũu taab n pʋgd Dan buudã. Dẽ, Dan buudã neb wẽnemdame n sok a Mika yaa: «Yaa bõe n tar foom, bõe yĩng la nebã sẽn sũ taab n pʋgd tõnd woto?»

²⁴ La a Mika leokame yaa: «Yãmb sẽn wʋk mam wẽn-naandsã m sẽn dag n maanã fãa la y peeg m maan-kʋʋd n tar n loogdẽ wã, y bas-m-la ne bõe, n leb n be be n sokdẽ tɩ yaa bõe n tar-ma?»

²⁵ Dan nebã yeela a Mika yaa: «D ka rat n leb n wʋm f sẽn yaag f noorã ye! Ka rẽ, neb kẽer sũur na n yikame tɩ b wẽnemd n kẽ-fo, n kʋ-f ne f yirã rãmba.»

²⁶ Woto, Dan nebã kell n dɩka b sor n looge. A Mika sẽn yã tɩ Dan nebã pãng yɩɩda yẽnda wã, a lebg n kuila a yiri.

²⁷ Dan nebã kell n talla wẽn-naands nins a Mika sẽn dag n maanã, ne yẽnda maan-kʋʋdã n looge. Dan nebã kẽng n tɩ zaba ne Layiis nebã sẽn dag n zĩ ne laafɩ la bãanã, n kʋ-b ne zabr sʋʋga, la b yõog b tẽngã bugum.

²⁸ Ned rag n ka be n na n fãag Layiis nebã ye. Bala, bãmb tẽngã rag n zãra ne Sɩdõ tẽngã, la bãmb dag n ka tar lagem-n-taar ne tẽng ba a yembr ye. Layiis tẽngã rag bee Bɛt-Reoob tãn-longã pʋgẽ. Dan nebã lebs n mee tẽngã n kẽ.

²⁹ Dẽ, bãmb pʋda tẽngã yʋʋr tɩ Dan wa a Zakoob biig a Dan sẽn yaa bãmb yaabã yʋʋre. La tẽngã pipi yʋʋrã yaool n dag n boondame tɩ Layiisi.

³⁰ Dan nebã vigla a Mika wẽn-naandgã n waoogd-a. Dẽ, a Moyiis yageng a Gersom yageng a Zonatã ne a kambã n kell n yɩ Dan buudã maan-kʋʋdba, hal tɩ ta wakat ning b sẽn tall tẽngã nebã n tɩ kẽes yembd pʋgã.

³¹ Dan nebã vigla wẽn-naandgã a Mika sẽn dag n maanã, la a kell n paa beenẽ wakat ning fãa Sɩlo Wẽnnaam doogã sẽn zĩndã.