Bʋ-kaoodba 16 - WẼNNAAM SEBRE 2014

A Samsõ vika Gaaza tẽngã noor kʋɩlenga

¹ Daar a yembre, a Samsõ kẽnga Gaaza. La a tɩ yãnda pʋg-yoodr beenẽ, n kẽ ne-a.

² B yeela Gaaza nebã t'a Samsõ waa tẽngẽ be. La Gaaza nebã tɩ gũbgame n sor yʋngã tõre, n gũud a Samsõ yiibu. La yʋngã tõre, bãmb ka maan bũmb ye. B rag n yetame tɩ beoogã sã n vẽege, bãmb n na n kʋ a Samsõ.

³ A Samsõ kell n paa be n gãand tɩ ta yʋn-sʋka, la yẽnda yikame n kẽng n tɩ gãd tẽngã noor kʋɩlemsã ne b ra-lugds a yiibã n tak-b n vik ne b kʋɩlen-kuyã fãa n palg a bãok n tall n kẽng tãng ning sẽn be Ebrõ neng taoorã zugu.

A Samsõ ne a Dalɩla

⁴ Rẽ fãa loogr zugẽ, a Samsõ yãnda pag a yembr Sorɛk ko-soogẽ wã, n nongẽ. Pagã yʋʋr la a Dalɩla.

⁵ Filistẽ-dãmbã nanambs kẽnga a Dalɩla nengẽ n tɩ yeel-a yaa: «Belg a Samsõ t'a wilg foom yẽnda pãn-kãsengã sẽn yitẽ, la tõnd sẽn na n maan to-to n tõog n sãam a pãngã, n paam-a n yõk n sẽb t'a ka tõog n fãag ye. Woto, tõnd ned kam fãa na n kõo foom wanzuri ligd-koeems tusr la koabga.»

⁶ Dẽ, a Dalɩla kẽng n tɩ yeela a Samsõ yaa: «M kot-y lame tɩ y wilg maam yãmb pãn-kãsengã sẽn yitẽ, la b sẽn tõe n tall bũmb ning n sẽb yãmb tɩ y ka tõog n fãag ye.»

⁷ A Samsõ yeela yẽnda yaa: «B sã n sẽb maam ne wĩ-maas a yopoe sẽn nan ka kʋɩ, mam pãngã na n sɛɛme tɩ mam lebg wa neb a taabã bala.»

⁸ Filistẽ-dãmbã nanambsã talla wĩ-maas a yopoe sẽn nan ka kʋɩ n wa kɩs a Dalɩla. La a Dalɩla rɩka wĩ-bãmb n sẽb a Samsõ.

⁹ La mikame tɩ pagã rag n kɩtame tɩ neb soond roogã pʋg n gũudẽ. La pagã yeelame: «Samsõ! Filistẽ-dãmbã wat n na n yõk-y lame!» La a Samsõ kaoo wĩyã wa bugum sẽn dɩt gĩsi. Dẽ, bãmb kell n ka bãng a Samsõ pãngã sẽn yitẽ ye.

¹⁰ A Dalɩla yeela a Samsõ yaa: «Yãmb belga maam, n ka togs maam sɩd ye. Mam kot-y lame moasã, tɩ y togs maam b sẽn tõe n tall bũmb ning n sẽb yãmba.»

¹¹ A Samsõ yeel-a lame yaa: «B sã n sẽb maam ne wĩ-paal b sẽn nan ka tall n sẽb bũmbu, mam pãngã na n sɛɛme tɩ mam lebg wa neb a taabã bala.»

¹² Woto, a Dalɩla rɩka wĩ-paala, n sẽb a Samsõ, la a kelem n yeel yaa: «Samsõ, Filistẽ-dãmbã wat n na n yõk-y lame!» Neb n yaool n dag n solg roogã pʋga. La a Samsõ kaoo wĩyã wa b sẽn dag n sẽb yẽnda nusã wa gĩsi.

¹³ La a Dalɩla leb n yeela a Samsõ yaa: «Hal tɩ ta moasã, yãmb yaga maam zĩrẽ, n ka togs maam sɩd ye. Togs-y maam b sẽn tõe n tall bũmb ning n sẽb yãmba.» A Samsõ yeela yẽnda yaa: «Fo sã n dɩk mam gɛm a yopoe wã n tui koɛɛrã pʋgẽ, n naag ne koeer-wamd n sẽbe, mam pãngã na n sɛɛme la mam na n lebga wa neb a taabã bala.»

¹⁴ A Dalɩla kɩtame t'a Samsõ gũsi, la a rɩka a Samsõ gɛmã n tui koɛɛrã pʋga, n sẽb ne koeer wamdã la a yeel a Samsõ yaa: «Samsõ, Samsõ! Filistẽ-dãmbã wat n na n yõka yãmba!» A Samsõ nekame n tak koɛɛrã ne a gɛmã n gʋsge.

¹⁵ A Dalɩla yeela a Samsõ yaa: «Woto la yãmb yet tɩ y nonga maam, n yaool ka kɩs sɩd ne maam? Ade, yaa naoor a tãab la woto moasã yãmb sẽn belg maam, n ka sak n wilg maam yãmb pãn-kãsengã sẽn yitẽ ye.»

¹⁶ La pagã rag n pẽdgda a Samsõ daar fãa n namsd-a, hal t'a Samsõ yamã wa yaa n yi.

¹⁷ Dẽ, a Samsõ pelga a pʋg ne pagã n yeel yaa: «Mam sẽn dogã tɛka, barg nan ka pɩʋʋg mam zugẽ wã ye. Bala, yaa Wẽnnaam n so maam tɩ m nan ket m ma pʋgẽ! Mam sã n põng m zugã, mam pãngã na n loog n basa maam, la mam na n lebga wa neb a taabã bala.»

¹⁸ A Dalɩla sẽn bãng t'a Samsõ pelga a pʋg ne yẽnda wã, a tʋmame tɩ b bool Filistẽ-dãmbã nanambsã n yeel-b yaa: «Wa-y tɩ moasã wã yẽ, a Samsõ pelga a pʋg ne maam.» Dẽ, Filistẽ-dãmba nanambsã talla wanzuri wã n kẽng a Dalɩla nengẽ.

¹⁹ A Dalɩla kɩtame t'a Samsõ gãand yẽnda naoẽ wã n gũsi, la a boola ned a yembr t'a kolg n põng a Samsõ zugã n wõrs a gɛm a yopoe wã. Pagã sɩngame n tõogd a Samsõ. La a Samsõ pãngã yi n bas-a lame.

²⁰ La pagã yeela a Samsõ yaa: «Samsõ! Samsõ! Filistẽ-dãmbã wat n na n yõka yãmba!» A Samsõ sẽn neke, a tagsame tɩ yẽnda na n tõog n fãaga a meng wa raasenkamã. Yẽnda rag n ka mi tɩ Sẽn-Ka-Saab bas-a lame ye.

²¹ Filistẽ-dãmbã yõka a Samsõ n kɩɩd a ninã, n tall-a n kẽng Gaaza. Beenẽ, b balga yẽnda ne zũud sogle, n kɩt tɩ yẽnda werd koodã bi-bees roogã pʋga.

A Samsõ roka a sũur n yaool n ki

²² La rẽ fãa zugẽ, b sẽn da põng a Samsõ zugã, a zoobdã leb n sɩngame n yita.

²³ Daar a yembre, Filistẽ-dãmbã nanambs tigma taab n na n maan maoon-kãseng n kõ b wẽn-naandg a Dagõ, la b maan sũ-noogo. Bãmb yeelame yaa: «Tõnd wẽnnaamã yõka d bɛ a Samsõ n kõ-do.»

²⁴ La nebã sẽn yãnd a Samsõ wã, b kaasame n pẽg b wẽn-naandgã n yeele: «Tõnd wẽnnaamã yõka tõnd bɛ wã n kõ-do. B yõka ned ning sẽn dag n sãamd tõnd tẽngã, la a kʋʋd tõnd neb wʋsgã n kõ-do.»

²⁵ Bãmb sũyã sẽn dag n nooma yĩnga, b yeelame: «Bool-y-yã a Samsõ t'a wa maan tɩ d la!» Bãmb boola a Samsõ t'a yi bi-bees roogẽ wã n wa yals bãmb taoore. A saoome tɩ b gese. B talla a Samsõ t'a tɩ yals roogã ra-lugds nins sẽn tebend roogã sʋka.

²⁶ La a Samsõ yeela bi-bɩɩg ning sẽn dag n gãd-a yẽnda n tatẽ wã yaa: «Sõng-m tɩ m tik ra-lugds nins sẽn tebend roogã n paam n delle.»

²⁷ Pagb ne raop n dag n pid roogã. Filistẽ-dãmbã nanambsã fãa rag n bee be. La neb sõor sẽn kolg tus a tã n dag n be roogã bɛoong zugu. Yaa pagb la raopa. La b rag n geta a Samsõ sẽn saoodã.

²⁸ La a Samsõ pʋʋsa Sẽn-Ka-Saab n yeele: «Wẽnnaam Sẽn-Ka-Saabo, m kot-y lame tɩ y tẽeg m yelle. Mam Wẽnnaam, leb-y n kõ-y maam pãng wakat-kãngã yĩng bala, tɩ m tõog n dok m sũur vugr ne Filistẽ-dãmbã, mam nin a yiibã kɩɩdg yĩnga.»

²⁹ Dẽ, a Samsõ tika roogã tẽn-sʋk ra-lugds a yiibã. A tika a yembr ne a rɩtgo, la a tik a ye ne a goabga.

³⁰ A Samsõ yeelame yaa: «Bas-y-m tɩ m naag Filistẽ-dãmbã n ki.» Dẽ, a tusa ra-lugdsã ne pãnga, la roogã lʋɩ n zãba Filistẽ-dãmbã nanambsã ne neb nins fãa sẽn dag n be beenẽ wã. A Samsõ sẽn kʋ neb nins a kũumã wakatã sõor yɩɩda yẽnda sẽn dag n kʋ neb nins a vɩɩmã wakatã.

³¹ A Samsõ saam-biisã ne a ba-yirã rãmb fãa kẽng n tɩ rɩk-a lame n looge. Bãmb sẽn ta yiri, b tɩ mum-a-la Soreya ne Ɛstaoll sʋka, a ba a Manoak yaoogẽ. A Samsõ yɩɩ Israyɛll bʋ-kaood yʋʋm pisi.