Bʋ-kaoodba 15 - WẼNNAAM SEBRE 2014

A Samsõ sũ-rokre

¹ Rasem bilf sẽn paase, bɩle wã tigsg wakate, a Samsõ talla bull n kẽng n na n tɩ ges a pagã. Dẽ, a Samsõ kosame n na n kẽ a pagã roogẽ, la pagã ba ka sak t'a kẽ ye.

² Pagã baaba yeela a Samsõ yaa: «Mam tagsame tɩ fo ka leb n nong f pagã ye. Dẽ, mam dɩk-a lame n kõ fo zoa ning sẽn sõng-a foom f kãadmã wakatã. A yao wã neerem ka yɩɩd yẽnda sɩda? Peeg-a t'a ledg a kẽemã zĩigẽ.»

³ A Samsõ yeel-b lame: «Moasã wã yẽ, mam sã n maan Filistẽ-dãmbã wẽnga, ned kõn ning maam taal ye.»

⁴ A Samsõ bas n loogame. La a kẽng n tɩ yõga we-baas kobs-tã n naag b zʋyã ne taab yiib-yiib n ning vɩlems sʋk n loe.

⁵ A Samsõ yõgna vɩlemsã bugum, n bas we-baasã tɩ b kẽ Filistẽ-dãmbã pʋtã, tɩ bugmã rɩ koodã sẽn kẽeb n dʋʋgã ne sẽn nan ka kẽebã, la reezẽ tɩɩsã ne oliiv tɩɩsã fãa b sẽn selã.

⁶ Woto, Filistẽ-dãmbã sokame tɩ yaa ãnda soab n maan yel-kãngã. La b leokame tɩ yaa Timna raoã rɛɛmb a Samsõ. Tɩ bala Timna raoã rɩka a Samsõ pagã n kõ a Samsõ zoa. Woto, Filistẽ-dãmbã kẽngame n tɩ yõog pagã ne a ba wã bugum.

⁷ Dẽ, a Samsõ yeelame: «Yãmb sẽn maan a woto wã yĩnga, mam kõn tol n bas yãmb n ka rok m sũur ne yãmb ye.»

⁸ A Samsõ zaba ne Filistẽ-dãmbã n tõog-b ne tõog-kãsenga, la a lebg n kẽng n tɩ kẽ Etam tãngã bokẽ.

A Samsõ tõoga Filistẽ-dãmba Leyi

⁹ Filistẽ-dãmbã kẽng n tɩ tilga b tãb-sikã Zʋʋda soolmẽ wã, n teedg b tãb-biisã n tɩ tãag Leyi n na n zab ne Zʋʋda nebã.

¹⁰ Dẽ, Zʋʋda nebã sok-b lame yaa: «Bõe yĩng tɩ yãmb wa n dat n zab ne tõndo?» La Filistẽ-dãmbã leokame yaa: «Tõnd waame n dat n sẽb a Samsõ n tall-a n tɩ maan wa yẽnda sẽn maan tõndã.»

¹¹ Woto, Zʋʋda neb tus a tãab kẽnga Etam tãngã bokẽ n tɩ yeel a Samsõ yaa: «Fo ka mi tɩ yaa Filistẽ-dãmbã n so tõnd la? Yaa bõe la fo sẽn maan tõnd woto wã?» A Samsõ leokame: «Yaa Filistẽ-dãmbã sẽn maan maam bũmb ningã yĩnga, la mam sẽn maan bãmb me a woto wã.»

¹² Zʋʋda nebã yeela a Samsõ yaa: «Tõnd waame n na n sẽb foom n kɩs Filistẽ-dãmbã.» La a Samsõ yeela bãmb yaa: «Bɩ y wẽen tɩ yãmb ka na n kʋ maam ye.»

¹³ Bãmb leoka a Samsõ n yeel yaa: «Ayo, tõnd dat n sẽba foom bal n tɩ kɩs-ba, la tõnd ka na n kʋ foom ye.» Dẽ, bãmb sẽba a Samsõ ne wĩ-paala, n tʋk-a n yiis tãngã bok pʋga.

¹⁴ A Samsõ sẽn wa n ta Leyi, Filistẽ-dãmbã kelmame n seg yẽnda. La Sẽn-Ka-Saab sɩɩg kẽ a Samsõ. La wĩyã b sẽn dag n sẽb yẽnda kamsã ne a nusã kaoome n dʋʋg wa bugum sẽn dɩ gĩsi.

¹⁵ A Samsõ yãnda bõang b sẽn nan kʋ paalem yeer kõbre, la a rɩk-a lame, n tall kʋ neb tusri.

¹⁶ Dẽ, a Samsõ yeelame: «Mam dɩka bõang yeere, bõang yeer bal la m tall yã, la ne bõangã yeere, mam kʋʋ neb tusri.»

¹⁷ A Samsõ sẽn gom woto n sɛ, a rɩka bõangã yeer kõbr n lobe. La b pʋda zĩ-kãng yʋʋr tɩ Rama-Leyi.

¹⁸ Ko-yũud namsa a Samsõ wʋsgo, la a pʋʋsa Sẽn-Ka-Saab n yeel yaa: «Yaa yãmb n kõ y tʋmtʋmdã tõog-kãseng a woto. La moasã, yãmb na n sak n basa maam tɩ ko-yũud wʋm maam tɩ nin-bãmbã sẽn ka kẽ bãongã wa paam maam n yõke?»

¹⁹ Wẽnnaam kɩtame tɩ Leyi pĩigã pusg tɩ koom yi beenẽ. A Samsõ sẽn yũ koomã n sɛ, a pãngã leb n waame, la a nengã yẽegame. La b pʋda ko-bund-kãng yʋʋr tɩ Ɛn-Hakoore. La a ket n bee Leyi hal tɩ ta rũndã.

²⁰ Wakat ning Filistẽ-dãmbã sẽn dag n so Israyɛll nebã, a Samsõ yɩɩ Israyɛll bʋ-kaood yʋʋm pisi.