Bʋ-kaoodba 12 - WẼNNAAM SEBRE 2014

A Zefte ne Efrayiim nebã zaba ne taaba

¹ Efrayiim nebã tigma taab n dʋʋg Zʋrdẽ kʋɩlgã n kẽng Safon n tɩ yeel a Zefte yaa: «Yaa bõe tɩ yãmb kẽng n tɩ zab ne Amo-rãmbã n ka bool tõnd tɩ d wa sõng-yã? Tõnd na n naaga foom ne f roogã n yõog bugum.»

² A Zefte leoka bãmb yaa: «Maam ne m nebã rag n bee zab-kãseng pʋga, n zabd ne Amo nebã. La mam boola yãmb tɩ y wa fãag-do, la yãmb ka wa fãag tõnd bãmb nusẽ ye.

³ Mam sẽn mik tɩ y ka wat n na n fãag tõndã, mam gẽnega m yõore, n pɩʋʋg n kẽng n tɩ zab ne Amo nebã, la Sẽn-Ka-Saab sõngame tɩ m tõog-ba. La moasã, yaa bõe yĩng tɩ y wat n dat n zab ne-ma?»

⁴ Dẽ, a Zefte tigma Galaad nebã fãa n zab ne Efrayiim nebã. La Galaad nebã tõoga Efrayiim nebã. Dẽ, Efrayiim nebã dag n yetame: «Galaad nebã, yãmb yaa Efrayiim neb sẽn zoe n tɩ nok Manaase buudã bala.»

⁵ Dẽ, Galaad nebã kẽng n tɩ gɩda Zʋrdẽ kʋɩlgã zĩ-rʋʋgdsã sẽn be Efrayiim kɩrengã. Woto, b sã n yãnd Efrayiim ned sẽn zoet n wat n na n dʋʋg kʋɩlgã, Galaad nebã sokd-a lame: «Fo yaa Efrayiim ned bɩ?» La a leokdame tɩ ayo.

⁶ Dẽ, bãmb yet-a lame yaa: «Beneere, bɩ f yeel tɩ Sɩbolɛte.» La a yetame tɩ fɩbolɛte, bala, yẽnda ka tõe n yeel tɩ zems ye. Dẽ, b yõkda yẽnda n kʋ Zʋrdẽ kʋɩlgã zĩ-rʋʋgdgẽ wã. Wakat-kãnga, b kʋʋ Efrayiim neb tus pis-naas la a yiibu.

⁷ Galaad dao a Zefte yɩɩ Israyɛll nebã bʋ-kaood yʋʋm a yoobe. Dẽ poore, a kiime tɩ b mum-a Galaad tẽngã pʋga.

A Ibsan, a Elõ, a Abdõ yɩɩ bʋ-kaoodba

⁸ A Zefte loogr zugẽ, a Ibsan sẽn yit Betlehɛmã n lebg Israyɛll bʋ-kaooda.

⁹ Yẽnda paama kom-dibli pis-tã la kom-pugli pis-tã n kuils-b sɩdb ne yɩng nebã, la a kẽng n tɩ bao yɩng neb kom-pugli pis-tã n wa kõ a kom-dibli wã tɩ b kẽ kãadem. La yẽnda yɩɩ Israyɛll nebã bʋ-kaood yʋʋm a yopoe.

¹⁰ Dẽ poore, a Ibsan kiime tɩ b mum-a Betlehɛm.

¹¹ A Ibsan loogr zugẽ, Zabulõ buudã ned a Elõ n lebg Israyɛll bʋ-kaooda. Yẽnda yɩɩ Israyɛll bʋ-kaood yʋʋm piiga.

¹² Rẽ poore, a kiime, la b tɩ mum-a-la Zabulõ soolmã tẽng a yembr sẽn boond tɩ Ayalõ.

¹³ A Elon loogr zugẽ, yaa Piraton tẽng rao a Ilɛll biig a Abdõ n lebg Israyɛll bʋ-kaooda.

¹⁴ A Abdõ paama kom-dibli pis-naase la yagens pis-tã, la bãmb zaoo bõens pis-yopoe n kẽnda. A Abdõ yɩɩ Israyɛll bʋ-kaood yʋʋm a nii.

¹⁵ Dẽ poore, Piraton ned a Ilɛll biig a Abdõ kiime tɩ mum-a Piraton sẽn be Efrayiim soolmẽ wã, Amalɛk nebã tãng zugu.