Bʋ-kaoodba 10 - WẼNNAAM SEBRE 2014

A Tola ne a Yayɩɩr sooga Israyɛll nebã

¹ A Abimelɛk kũumã zugẽ, a Tola sẽn yaa Isakaar buudã nedã yikame n na n fãag Israyɛll nebã. Yẽnda rag n yaa a Dodo biig a Puya biiga, t'a yir be Samiir tẽnga, Efrayiim soolem ning sẽn be tãms sʋkã pʋga.

² A Tola yɩɩ Israyɛll bʋ-kaood yʋʋm pisi la a tãabo. La a kiime tɩ b tɩ mum-a Samiir tẽnga.

³ A Tola loogr zugẽ, yaa Galaad buudã ned a Yayɩɩr n yɩ Israyɛll bʋ-kaood yʋʋm pisi la a yiibu.

⁴ Yẽnda rag n tara kom-dibli pis-tã tɩ b tar bõens pis-tã n zao n kẽnda. La bãmb dag n soo tẽms pis-tã, la b ket n boonda tẽn-bãmb tɩ Yayɩɩr tẽn-bãooneg sẽn be Galaad soolem, hal tɩ ta rũndã.

⁵ La a Yayɩɩr kiime tɩ b tɩ mum-a Kamon tẽngã pʋga.

Amo nebã zaba ne Israyɛll nebã

⁶ Israyɛll nebã leb n maana sẽn yaa wẽng Sẽn-Ka-Saab nifẽ. Bala, bãmb waooga Baall ne Astarte wẽn-naandse, la Siiri ne Sɩdõ, ne Moaab-rãmba la Amo-rãmba, ne Filistẽ-dãmbã wẽn-naandse. Bãmb basa Sẽn-Ka-Saab n ka leb n sakd-b ye.

⁷ Sẽn-Ka-Saab sũur puuga ne Israyɛll nebã, tɩ b bas-b Filistẽ-dãmbã ne Amo nebã nugẽ.

⁸ Yʋʋm-kãnga, bu-bãmb namsa Israyɛll nebã wʋsgo. Bãmb namsa Israyɛll nebã sẽn dag n be Zʋrdẽ kʋɩlgã rʋʋndã sẽn yaa Amo nebã tẽng sẽn be Galaadã, n kaoos yʋʋm piig la nii.

⁹ Amo nebã pɩʋʋga Zʋrdẽ kʋɩlgã n na n tɩ zab ne Zʋʋda buudã la Benzame buudã, la ne Efrayiim buudã nebã. La Israyɛll nebã rag n ka leb n mi b sẽn kẽedẽ ye.

¹⁰ Dẽ, Israyɛll nebã kelem n boola Sẽn-Ka-Saab n yeel yaa: «Sẽn-Ka-Saabo, tõnd beega yãmba, tõnd basa yãmb sẽn yaa tõnd Wẽnnaamã, n tɩ waoog Baall wẽn-naandsã.»

¹¹ Sẽn-Ka-Saab yeela Israyɛll nebã yaa: «Wakat n zĩndi, tɩ Ezɩpt nebã, ne Amoor-dãmbã, la Amo-rãmbã, ne Filistẽ-dãmbã nams yãmba.

¹² Sɩdõ nebã, ne Amalɛk-rãmbã, la Mawõ-rãmbã me sẽn wa n namsd yãmbã, tɩ yãmb kelem n bool maamã, mam ka fãag yãmb b nusẽ sɩda.

¹³ La baa ne rẽ fãa, yãmb basa maam n waoog wẽnnaam-dãmb a taaba. Yaa rẽnda yĩng n kɩt tɩ m ka na n leb n fãag yãmb ye.

¹⁴ Lebg-y n tɩ kos-y wẽnnaam-dãmb nins yãmb sẽn yãk yam n tũudẽ wã tɩ b sõng-yã. Kelem-y n bool-y bãmb tɩ b wa fãag yãmb y yel-pakrã pʋga!»

¹⁵ Israyɛll nebã yeela Sẽn-Ka-Saab yaa: «Yaa sɩda, tõnd beega yãmba, maan-y yãmb sẽn dat ne-do. D sẽn kot-y bala, yaa tɩ y fãag-d rũndã!»

¹⁶ Dẽ, Israyɛll nebã yiisa wẽn-sãamsã sẽn da be b sʋkã, la b waoog Sẽn-Ka-Saabo. La b sẽn dag n namsd Israyɛll nebã sãama Sẽn-Ka-Saab sũuri.

¹⁷ Amo-rãmbã sũu tãpo, n kẽng n tɩ tilg b tãb-sikã Galaade, tɩ Israyɛll nebã me sũ tãp n kẽng n tɩ tilg b tãb-sik Mispa.

¹⁸ Galaad nebã ne b nanambsã yẽsa ne taaba, n sok tɩ yaa ãnda soab n na n kẽng n tɩ zab ne Amo-rãmbã. La b yeel tɩ ned ning sẽn na n yɩ-a pipi n yik n zab ne Amo-rãmbã, yẽnda soab n na n lebg Galaad nebã fãa naaba.