A. Zoobe 6 - WẼNNAAM SEBRE 2014

A Zoob leoka a Zo-rãmbã

¹ A Zoob leokame n yeele:

² «Kayto! B sã n dag n tõe n makẽ-la mam toogã, b sã n dag n tõe n ningẽ-la mam sũ-sãangã zãng zɩslem makdg zugu,

³ a zɩslmã rag n na n yɩɩgẽ-la ko-kãsengã bĩisr zɩslem. Yaa rẽ n kɩt tɩ goam lebg toog ne maam.

⁴ Bala, Pãng-Soabã pɛɛm kõsa maam n sãage, tɩ mam sɩɩgã pid ne b zẽnmã. Wẽnnaam sẽn wat ne yɛɛsg ninsã n seg maam.

⁵ We-bõang paamda yam-noog n leb n yãbd la? Naaf na yas a yamd sɛɛg n leb n yãbda?

⁶ Ned tõe n dɩɩ rɩ-sãbsg tɩ b ka ning yamsem sɩda? Gell ko-pɛɛlg tara noosem sɩda?

⁷ Mam sẽn dag n zãgsd n ka rat n sɩɩs bũmb ningã, bõn-kãng n lebg mam dɩɩbo, ba ne a sẽn põogã!»

⁸ Kayto! M datẽ-la m kosgã leokre. M datẽ lame tɩ Wẽnnaam pids m sẽn gũudã!

⁹ Bɩ Wẽnnaam tolg n yãk yam n neem maam, bɩ b tẽeg b nugã n baas-ma!

¹⁰ Woto, mam dag n na n paamẽ-la belsgo, la mam dag n na n kɩdmẽ-la ne sũ-noogo. Baa ne toogã sẽn tar-ma, mam ka na n kɩɩs Pʋ-Peelem-Soabã goam ye.

¹¹ Mam tara m bõe pãng n tõe n yals n gũ? Mam baoosg na n yɩ a wãn tɩ m baood n vɩɩmd n kaoose?

¹² Mam pãngã zema kugr pãng la? Mam yĩngã yaa wa zũud la?

¹³ Mam sõngrã ka loog n bas maam sɩda? La b ka rig pãng fãa t'a zãag ne-m la?

¹⁴ Ned ning raood sẽn sɛ tog n paama a zoa nimbãan-zoeere, ba yẽnda sã n ka leb n zoet Pãng-Soabã.

¹⁵ Mam saam-biisã zãmba maam wa ko-soogo, b wẽnda ko-sood koom sẽn sɛ.

¹⁶ Waoodã yĩng kɩtame tɩ ko-soodã koom gudgi, neezã yẽnegame n lud-ba.

¹⁷ La tʋʋlg wẽnde, bãmb kʋɩtame, wĩntoogã tʋʋlem sã n wẽ-ba, b kʋɩta zĩig pʋgẽ.

¹⁸ Toandbã bʋdgd n basa b sorã, n kẽ weoog n menem.

¹⁹ Tema tẽng toandbã yong n geta bãmba, Saba tẽng lɛɛbdbã rag n maanda tẽeb ne bãmba.

²⁰ Bãmb sũyã sãama b sẽn dag n tẽed koom beenẽ wã yĩnga. Bãmb sẽn ta wã, b sũyã sãamame.

²¹ Moasã, yãmb me ka baa fɩ. Yãmb yãnda mam toogã tɩ rabeem yõk-yã!

²² Dẽ yĩnga, mam zoe n yeela yãmba: «Bao-y bũmb n kõ-ma! Yãk-y y paoongã n kõ maam kũuni!

²³ Sõng-y maam tɩ m põs m bɛyã, fãag-y maam nin-toosã nugẽ!»

²⁴ Wilg-y maam m kongrã zĩiga, la mam na n sĩndame. Kɩt-y tɩ mam bãng bõe pʋgẽ la m tudg yã.

²⁵ Gom-tɩrs tõeeme tɩ b sak n deege! La yãmb paoogr goamã võor yaa bõe?

²⁶ Yãmb tagsdame n mongd mam goamã bʋʋm, la y get sũ-pa-noaang soabã goam wa sebgo?

²⁷ Yãmb tõe n dɩka kɩɩb n maan poeere, la y tõe n dɩka y zoa meng n koose!

²⁸ Moasã, yãk-y yam n ges maam! Mam tõe n yaga zĩrẽ yãmb taoor sɩda?

²⁹ M kotame tɩ y lebg n wa, da maan-y zãmb ye. Lebg-y n wa-y yɛsa, mam tara bʋʋm yel-kãngã pʋga!

³⁰ Rẽ yĩnga, mam noorã gomda sẽn ka sɩd la? Bɩ mam ka mi wẽng n bake?