A. Zoobe 40 - WẼNNAAM SEBRE 2014

A Zoob pipi leokre

¹ Sẽn-Ka-Saab leb n goma ne a Zoob n yeel-a yaa:

² «Sẽn tar-a bũmb n yetẽ wã baood n zaba ne Pãng soabã bɩ? Sẽn zabd-a ne Wẽnnaamã tara leokr n na n leok bõn-kãens fãa yĩng bɩ?»

³ A Zoob yeela Sẽn-Ka-Saab yaa:

⁴ «Mam paoodame, m na n leoka yãmb tɩ bõe? Mam na n dɩka m nug n pĩ m noor bala.

⁵ Mam goma vugr bala, la m kõn leb n gom ye. Mam zoe n goma wʋsgo, m ka na n leb n paas bũmb ye.»

A Zoob geta a meng wa Wẽnd la?

⁶ Sẽn-Ka-Saab zĩnda sob-kẽeng pʋgẽ n yeel a Zoob yaa:

⁷ «M kot-f lame tɩ f segl-f meng wa gãndaoogo, tɩ mam na n sok-f lame tɩ f wilg-ma.

⁸ Fo sɩd rat n monga maam bʋʋm bɩ? Fo rat n monga maam bʋʋm n kõ f meng bʋʋm la?

⁹ Fo kangã wẽnda Wẽnnaam kangã la? Fo koɛɛgã sãta wa bãmb koɛɛgã la?

¹⁰ Sã n yaa woto, m kot-f lame tɩ f yik n yals ne f naamã la f kãosengã, n yeelg f ziirã ne f waoogrã!

¹¹ Bas tɩ f sũ-yikrã ko-wĩis pid n puugi, ges wilg-m-mens rãmbã n ning-b yãnde!

¹² Ges wuk-m-mens rãmbã fãa n kɩt tɩ b sulgi! Bɩ f neem nin-wẽnsã wakat-yɛng pʋgẽ.

¹³ Naag bãmb fãa n mum zĩ-yende, pag bãmb kɩɩm-kulgu.

¹⁴ Dẽ, mam mengã na n pẽga foom, bala, fo meng nug-rɩtg n tõog n fãag foom!

¹⁵ Ges yemd ning sẽn yaa parwẽndã, mam naan-a-la wa mam sẽn naan foomã. Yẽnda wãbda yamd wa naafo.

¹⁶ Ade, yẽnda pãngã be a sɛɛgẽ ne a pʋgã gĩinẽ.

¹⁷ Yẽnda tõe n tẽega a zʋʋrã tɩ lebg kãenkãe wa sɛɛdr tɩɩg raoogo. A gɛyã gĩin kala taab n tar pãnga.

¹⁸ A kõabã keelem yaa wa zũudu, la a sĩ-bi wã yaa wa kud-bɩlma.

¹⁹ Yẽnda yaa mam pipi tʋʋmde. Mam tãsda yẽnda ne sʋʋga.

²⁰ Yẽnda paamda rɩɩb tãms zutu, zĩig ning we-rũmsã fãa sẽn deemdã.

²¹ Yẽnda gãee mugnus tẽngre. A soondeda tãnwĩis ne bãtã sʋka.

²² Mugnusã kõt-a-la maasem. La ko-soodã tɩɩs gũbgd-a lame.

²³ Gese, baa kʋɩlgã koom sã n fõta, rabeem ka tar-a ye. Baa Zʋrdẽ kʋɩlgã koom sã n pãbd a noore, a pɛlg yaa kãenkãe.

²⁴ Rẽ yĩnga, a sã n puk a nin n getẽ, ãnda soab n tõe n yõk-a? B tõe n bẽd-a lame n yõk n poog n ning bãnga?

²⁵ Fo tõe n yõka parwẽnd ne zĩm-lɛooga? Fo tõe n loe a zelemdã ne wĩiri?

²⁶ Fo tõe n tuii a yõorã ne tãnwĩiga? Fo tõe n yõka a gẽgsã ne lɛooga?

²⁷ A nan yals n bõosa foom tɩ f zoe a nimbãanega? A nan goma gom-nood ne foom?

²⁸ A na n maana kaool ne foom bɩ? Bɩ a na n lebga fo yamb wakat fãa?

²⁹ Rẽ yĩnga, fo na n deema ne-a wa f sẽn deemd ne liuula? Fo na n loe-a lame n kõ f kom-pugli tɩ b reeme?

³⁰ B na n koos-a-la ne toandb la? B na n bees-a lame n koos ne raadb la?

³¹ Fo na n vʋda a gãongã ne pɛɛma, la f kõs a zugã ne kõsdg la?

³² Fo sã n sɩɩs-a ne f nug bala, fo kõn leb n paas beoog ye. Fo na n tẽega a zabrã yell bala.»