Biblia Todo Logo
Bìoball air-loidhne

- Sanasan -

A. Zoobe 39 - WẼNNAAM SEBRE 2014

1 «Fo mii we-bʋʋsã sẽn dogd b kamb wakat ninga? Fo yãta walsã b sẽn wat n dogdẽ wã bɩ?

2 Fo tõe n sõda b sẽn tʋtã kiis sõore? Fo mii wakat ning bãmb sẽn dogd b kambã bɩ?

3 Bãmb põta b mens n dogd b kambã, la bãmb toogã loogdame n basd-ba.

4 Bãmb kambã paamda pãng n bɩt zĩ-pɛɛlẽ wã, la b lakd n basd b ma-rãmb n ka leb n baood b zĩig ye.

5 Ãnda soab n bas we-bõang t'a saad yaare? Ãnda soab n logs a sẽbrã n kõ-a lohorem?

6 Mam kõo bãmb weoogã tɩ b zĩndi. Mam kõo bãmb lɛɛlgã tɩ b maan b yiri.

7 Bãmb toog ka be ne tẽng pʋgẽ bʋrg ye. Bãmb ka wʋmd sẽn tɛt-a bõang tãsg ye.

8 Bãmb gõoda tãms zut n gẽesd yamd zĩiga, n baood yam-maas meng-meng zĩiga.

9 We-naaf sakd n tʋma fo yir sɩda? A sakd n gãee fo bãgrẽ yʋngo?

10 Fo tõe n loee we-naaf ne wĩir n tɛt-a t'a kooda? A tõe n bee fo poorẽ n vuud wãg-koaadg sɩda?

11 Fo tõe n teeg-a lame t'a pãng n yaa wʋsg sɩda? Fo nan dɩka f tʋʋmã n bas ne-a t'a tʋmdẽ?

12 Fo tõe n teeg-a lame t'a tigs f koodã, la a wʋk-a n wa rʋʋg f zɛɛgẽ wã sɩda?

13 Neoong tẽegda a pɩgs ne sũ-noogo. La a ka tõe n yɩk wa bulwãoog ye.

14 Neoong basda a gɛl tẽng tɩ tẽngã tom wɩng-ba.

15 A ka tagsd bãmb yell tɩ daarninga ned tõe n wa beds-b lame, la a ka tagsd tɩ we-rũms me tõe n tab-b lame ye.

16 A kengda a sũur ne a kamb wa ka yẽnda n so-b ye. Dabeem ka tar-a t'a namsgã na n wa yɩ zaalem ye.

17 Yaa maam a Wẽnnaam n mong-a yam. Mam sẽn pʋɩ bãngrã, mam ka yãk n kõ-a ye.

18 La yẽnda sã n yik n zoetẽ, a laada weef ne wed-rʋʋda.

19 Rẽ yĩnga, yaa foom n kõ wiidã pãnga, la f ning-b yublã gɛd tɩ miimdẽ bɩ?

20 Rẽ yĩnga, foom n kɩt tɩ b yɩgd wa sʋyã? Yẽnda fĩisda ne yẽesem n yɛɛsd nebã.

21 Weef bee longẽ n tibd ne pãng t'a sũur noomẽ. Yẽnda zoet n segda bɛɛbã zab-teedo.

22 Yẽnda toog ka be ne rabeem ye, a sũur ka kiuusd zabr sʋʋg taoor ye.

23 Sẽn zao-b yẽnda wã logd rãamd yitame. La b kãna ne b kãn-dibsã pɩndame.

24 A yɩgd n tirsda ne pãng n na n ning tĩiga. Baorg sã n peebe, a ka tõe n leb n yals ye.

25 A sã n wʋm baorg peebgo, a kelemdame. A wʋmda zabr yũug yɩɩga. La a wʋmda nanambsã koees ne zabrã kelemse.

26 Rẽ yĩnga, yaa fo bãngrã n kɩt tɩ wɩbg yɩkd yĩngr n tẽegd a pɩgs n teesd rɩtg bɩ?

27 Yaa foom n yeel pa-nand-tugr t'a yɩgd yĩngr la? Foom n yeel-a t'a tɩʋ a tʋk yĩngr sɩda?

28 Yẽnda bee pĩis zut n gãe be yʋngo, la pĩigã sẽkẽ n yaa yẽnda pãng zĩiga.

29 Yaa beenẽ la yẽnda zao n gẽesd zĩ-zãrsẽ n baood bũmb n na n yõk n dɩ.

30 A kambã yũuda zɩɩm. Bõn-kɩɩng sẽn be zĩig ninga, yẽnda bee beenẽ.»

Moore Bible © Bible Society of Burkina Faso, 2014.

Bible Society of Burkina Faso
Lean sinn:



Sanasan