A. Zoobe 37 - WẼNNAAM SEBRE 2014

¹ Sa-tãsã kɩtame tɩ m sũur kiuusdẽ, tɩ yaa wala a na n fãsgame.

² Kelg-y-yã! Kelg-y Wẽnnaam koɛɛgã rãamde, ne sa-kelems nins sẽn yit bãmb noorẽ wã.

³ Bãmb kɩtdame t'a tat dũniyã zĩigã fãa. La bãmb sa-yãgbã tata dũniyã kɩremsã fãa.

⁴ Rẽ poore, saagã kelemdame, yaa bãmb koe-kãsengã rãamd n sãte. Saag sã n kelemdẽ, bãmb ka gɩdgd sa-yãgbã ye.

⁵ Wẽnnaam koɛɛgã sãtame n wilgd bõn-kãsenga. Bãmb maanda tʋʋm-kãsems tɩ tõnd ka miẽ ye.

⁶ Bãmb yeta neezã t'a sig tẽngã zugu! La b yeel sa-kẽengã t'a ni ne pãnga.

⁷ Wẽnnaam kɩtdame tɩ nebã fãa tʋʋmd yalse, tɩ ninsaalbã fãa sak n deeg tɩ bãmb la b naanda.

⁸ We-rũng kẽeda a gãagẽ n soondedẽ.

⁹ Sob-kãsengã yita goabg n watẽ, la waood tũuda rɩtg sebdã n watẽ.

¹⁰ Wẽnnaam vʋʋsmã kɩtdame tɩ koom gĩsi, la koomã zugẽ fãa lebgda kãenkãe.

¹¹ Bãmb kɩtdame tɩ sawat pid ne koom, la b kɩt t'a bug-pãrsã sãeegdẽ.

¹² Wẽnnaam n kɩtd tɩ sawatã yãgbã tat zĩig ning fãa bãmb sẽn datã, n maand bũmb ning Wẽnnaam sẽn yeel-b tɩ b maanã dũniyã gill fãa zugu.

¹³ Wẽnnaam tõe n tʋma saagã dũniyã zug neb sɩbgr yĩnga, wall b tʋm-a t'a tɩ wilg bãmb nonglmã.

¹⁴ Zoobe, yok f tʋbr n kelg bõn-kãngã! La f yals n tags n wʋm Wẽnnaam tʋʋm-kãsemsã võore.

¹⁵ Fo mii Wẽnnaam sẽn sigind-b to-to bɩ? Fo mii bãmb sẽn maand to-to tɩ sawatã yiisd sa-yãgb bɩ?

¹⁶ Fo mii sawatã sẽn maand to-to n yas zĩ-yɛng yĩngrã bɩ? Fo bãnga sẽn mi-a bũmb fãa zãngã tʋʋm-kãsemsã bɩ?

¹⁷ Goabg sobg ning sẽn wɩngd tẽngã wɩngda fo futã me.

¹⁸ Fo tõe n yɛdga sa-gãongã wa bãmb sẽn yɛdg-a to-to t'a yaa kãenkãe n pɩnd wa zũud nen-gɛtgã sɩda?

¹⁹ Wilg tõnd d sẽn tog n yeel Wẽnnaam bũmb ninga. Bala, yaa lik tɩ tõnd ka mi d sẽn na n yɩ wãn n gom ye.

²⁰ Mam sã n gome, yaa tɩlɛ tɩ ned tɩ togs Wẽnnaam la? B tog n togsa bãmb bũmb tɩ b yaool n bãng la?

²¹ Moasã, b ka tõe n leb n yãnd vẽenem ning sawat sẽn ludã ye, bala, sobg pɩʋʋgame n kãag-b n looge.

²² Vẽenem sẽn yãgd wa sãnem n yit rɩtg n watẽ. Wẽnnaam ziirã bee rabeem.

²³ Tõnd ka tõe n tõog n ta Pãng-Soabã nengẽ ye. Bãmb pãngã ne b tɩrlmã yaa wʋsgo, la b ka bʋʋd bʋ-kegr ye.

²⁴ Yaa woto n kɩt tɩ nebã tog n zoe bãmba. La Wẽnnaam ka get neb nins sẽn tagsd tɩ b yaa yam dãmbã ye.