A. Zoobe 35 - WẼNNAAM SEBRE 2014

A Elihu goam a taaba

¹ A Elihu leb n yeelame yaa:

² «Fo tagsdame tɩ fo tara bʋʋm bɩ? Dẽ yĩnga, fo rat n yeelame tɩ fo tɩrlem yɩɩda Wẽnnaam bɩ?

³ Fo yeela Wẽnnaam tɩ fo sẽn ka maan yel-wẽnã yõod bee yɛ.

⁴ Mam na n naaga foom ne f zo-rãmbã n leoke.

⁵ Nak yĩngr n ges sawatã: bãmb lugame n be fo zugẽ.

⁶ Fo sã n maan yel-wẽnã, a maanda Wẽnnaam bõe? Fo beegrã sã n paase, a maanda bãmb bõe?

⁷ Fo sã n yaa tɩrga, a kõta bãmb bõe? Bãmb deegda bõe fo nengẽ?

⁸ Yaa ninsaal wa foom bal n paamd toog fo wẽngã yĩnga. Fo tɩrlmã nafda ninsaalbã bala.

⁹ Neb yãbda wʋsg b namsgã yĩnga. Bãmb kota sõngre, neb wʋsg sẽn maan-b pãngã yĩnga.

¹⁰ La bãmb ned baa a ye ka sokd tɩ Wẽnnaam ning sẽn naan-a bãmbã bee yɛ ye. Bãmb ka sok tɩ sẽn kõt-a bãmb yɩɩl ne yʋngã bee yɛɛnẽ ye.

¹¹ La b ka sok tɩ sẽn kõta tõnd zãmsg n yɩɩd rũmsã sẽn be tẽng zugã, la b kõt bãmb yam n yɩɩd bõn-yɩgdɩ wã bee yɛ ye.

¹² Bãmb boondame, la nin-wẽnsã tɩtaamã yĩnga, Wẽnnaam ka leokd ye.

¹³ Bãmb kelemsã yaa zaalem. Wẽnnaam ka wʋmd ye. Pãng-Soabã ka ne-b ye!

¹⁴ La sẽn yɩɩda, fo yeelame tɩ fo ka tõe n yãnd bãmba, tɩ f yellã bee bãmb taoore, la f gũuda bãmba.

¹⁵ La moasã, Wẽnnaam sẽn ka ges fo kɩɩsgã n sɩbg-f ne sũ-yikrã yĩng n kɩte,

¹⁶ tɩ foom a Zoob yaagd f noor n gomd gom-vɩɩdo, fo gomda wʋsgo, la bãngr yaool n ka tol n be a pʋgẽ ye.»