A. Zoobe 34 - WẼNNAAM SEBRE 2014

A Elihu dõda a Zoobe

¹ A Elihu leb n yeelame yaa:

² «Yam dãmba, kelg-y m goamã. Bãngdba, yok-y y tʋb n kelg m sẽn yetã!

³ Bala, tʋbr mii goam n bake, wa zelemd sẽn mi rɩɩb noosmã.

⁴ Bɩ d yãk zemsgo, la d naag taab n bãng sẽn yaa sõama.»

⁵ A Zoob yeelame: «Mam yaa nin-tɩrga, la Wẽnnaam monga maam bʋʋm.

⁶ Baa ne mam sẽn tar bʋʋmã, b geta maam wa zĩrẽ-be-neda. Mam poglgã ka tõe n maag ye, tɩ mam yaool n ka beeg ye.»

⁷ A Zoob meng pʋs n yaa ãnda? Yẽnda nonga yaoolg wa b yũud koom.

⁸ Yẽnda tũuda nin-wẽnse. La a kẽnd ne nin-toose.

⁹ Bala, a Zoob yeelame: «Ned sẽn maand sẽn noom Wẽnnaam ka tar nafr ye.»

¹⁰ Woto yĩngã, yam dãmba, kelg-y maam! Wẽnnaam sẽn yaa Pãng-Soabã zãra ne wẽng maanego. Bãmb ka tol n maand wẽng ye!

¹¹ Wẽnnaam keooda ninsaal wa sẽn zems a tʋʋmã. Bãmb donda ned kam fãa wa sẽn zems a manesem.

¹² Hakɩɩka, Wẽnnaam ka maand wa nin-wẽng ye. Pãng-Soabã ka bʋʋd bʋ-kegr ye.

¹³ Ãnda soab n dɩk dũni n kõ bãmba? Ãnda soab n dɩk dũni gill n gũnug bãmba?

¹⁴ Bãmb sã n dag n tagsdẽ b meng yell bala, la b sã n deeg b sɩɩgã ne b vʋʋsmã,

¹⁵ bõn-vɩɩsã fãa rag n na n kiẽ-la wakat-yɛnga, la ninsaal dag n na n lebẽ-la tẽng tomẽ.

¹⁶ Fo sã n tara bãngr bɩ f kelg bõn-kãngã, yok f tʋbr n kelg mam sẽn togsdã.

¹⁷ Tɩrlem bɛ tõe n sooga tẽng la? Fo rat n monga sẽn yaa-a tɩrlem la pãng soabã bʋʋm la?

¹⁸ Bãmb tõe n yeela rĩm-dãmbã tɩ b ka võor ye. La yaa bãmb n tõe n yeel nanambsã tɩ b yaa nin-wẽnse.

¹⁹ Wẽnnaam ka geelgd nanambs ye, la b ka get arzegs rãmb n yɩɩd naong rãmb ye. Bala, bãmb fãa yaa bãmb nus n naane.

²⁰ Bãmb kiida nif kamseg pʋgẽ. Yʋn-sʋk bala tẽngã neb yikdame n wulumd n kʋ a soaalbã. B kɩtdame tɩ pãn-tõog soabã leb kɛɛnga, tɩ rẽ ka tũ ne toog ye.

²¹ Bala, Wẽnnaam geta nebã fãa manesem. Bãmb geta bũmb nins fãa nebã sẽn maandã.

²² Lik bida wall zĩ-libsg ka be yel-wẽn maandb sẽn tõe n kẽ n soond ye.

²³ Wẽnnaam ka baood n gũus ninsaal n ges n kaoos n yaool n bool-a bʋʋd ye.

²⁴ Bãmb lubda pãens rãmb tɩ sokr kaẽ ye, la b kɩt tɩ neb a taab reeg bãmb zĩiga.

²⁵ Bala, Wẽnnaam mii bãmb tʋʋmã. Bãmb lubda bãmb yʋng tɩ b sãame.

²⁶ Wẽnnaam sɩbgda nin-wẽns tɩ nebã fãa yã,

²⁷ bãmb sẽn ka leb n sakd Wẽnnaamã yĩnga, la b sẽn bas bãmb sorã yĩnga.

²⁸ Nin-wẽns kɩtame tɩ naong rãmb yãbd n boond Wẽnnaam. La Wẽnnaam wʋmda nimbãan-nebã kɛlenga.

²⁹ Wẽnnaam sã n sĩndi, ãnda soab n tõe n mong bãmb bʋʋm? Bãmb sã n solg b nenga, ãndã n tõe n yãnd bãmba? Soolem wall ned ka tõe n maan bũmbu,

³⁰ sẽn na n yɩl tɩ nin-wẽng ra rɩ naam ye, la a ra tõog n bẽd neb ne kuusr ye.

³¹ Bala, a Zoob ka tol n yeel Wẽnnaam tɩ: «Mam sak n deega m sɩbgrã la m kõn leb n paas beoog ye.

³² Wilg-y maam bũmb ning mam sẽn ka ne wã y toore. Mam sã n dag n maanã sẽn ka zems m kõn leb n paas beoog ye.»

³³ Fo sẽn kɩɩsd Wẽnnaamã ka tõe tɩ Wẽnnaam bʋ bʋʋdã wa fo sẽn datã ye. Yaa foom n yãkd yam, ka maam ye. Dẽ wã, wilg fo sẽn mi bũmb ninga.

³⁴ Neb sẽn tar bãngre, bɩ ned sẽn tar yam sã n kelg mam goamã a na n yeela maam:

³⁵ «A Zoob ka mi a sẽn gomd ye, la a goamã ka tar võor ye.»

³⁶ Bɩ b kell n mak a Zoob n tãag a tɛka, bala, yẽnda leokda wa nin-wẽnga.

³⁷ Bala, yẽnda kɩɩsgã wa n paasa a yel-wẽnã. Yẽnda pãbda nug-pogs ne wuk-m-meng tõnd sʋka, la a gomd wʋsg n paoogd Wẽnnaam.