A. Zoobe 32 - WẼNNAAM SEBRE 2014

A Elihu leokre

¹ A Zoob sẽn ges a meng wa nin-tɩrgã, nin-kãens b tãabã basa goam n ka leb n leok-a ye.

² Dẽ, Buuz tẽng rao a Barakeyɛll biig a Elihu sẽn yaa Ram buudã nedã sũur yikame. A sũur yika ne a Zoob sẽn tẽed t'a tara bʋʋm n yɩɩd Wẽnnaamã yĩnga.

³ A sũur yika ne a Zoob zo-rãmb a tãabã me. Bãmb sẽn ka tol n tõog n yãnd gomd n leok a Zoobã, ne b sẽn maan wa Wẽnnaam ka tar bʋʋmã yĩnga.

⁴ Bãmb fãa sẽn kẽem a Elihu wã yĩnga, a Elihu yalsame tɩ b gom n sɛ t'a yaool n na n gom ne a Zoobe.

⁵ A Elihu sẽn mik tɩ neb a tãabã rag n ka leb n tar leokr n na n leokã, a sũur puugame.

A Elihu bilgda gomdã võore

⁶ Buuz tẽng rao a Barakeyɛll biig a Elihu leokame: «Mam yẽ paoodame, la yãmb yaa nin-kẽemba. Rẽ yĩng la m dag n zoet rabeem n digda, n ka rat n wilg yãmb m sẽn mi wã ye.

⁷ Mam dag n tagsdame tɩ kãsem dãmbã na n bãnga goamã, tɩ yʋʋm sẽn waoog-b rãmbã zãms tõnd yam.

⁸ La sɩd-sɩdã, ninsaal pʋgẽ, yaa sɩɩg bal n be, yaa Pãng-Soabã sɩɩg bal n kõt ninsaal bãngre.

⁹ Ka yʋʋm sẽn yaa wʋsg n kõt ned yam ye. Ka kʋʋlem n wat ne tɩrlem bãngr ye.

¹⁰ Rẽ n kɩt tɩ mam yetẽ: Kelg maam! Mam me na n wilga m sẽn mi bũmb ninga.

¹¹ Gese, mam gũume tɩ yãmb gom n sɛ. Mam yoka m tʋbr n kelg yãmb tagsgã, la m kelgd ned kam fãa sẽn leokd a Zoob to-to.

¹² Mam maaga m yĩng n kelg yãmb neere. La yãmb ned baa a ye ka tõog n gom n lub a Zoob ye. Ned baa a ye ka tõog n leok a Zoob a goamã pʋg ye.

¹³ Gũus-y y mens n da wa yeel tɩ y paama yam a Zoob nengẽ ye. Wẽnnaam n tõe n gom n lub-a, la ka ninsaal n na n gom n lub-a ye.

¹⁴ Yẽnda ka gom ne maam ye. La mam leokrã me ka na n yɩ wa yãmb dẽndã ye.

¹⁵ Yãmb yɛɛsame n ka tar leokr ye, yãmb ka leb n tar gomd y noorẽ ye.

¹⁶ Mam yalsame n gũ, la y ka gom ye, la yãmb sẽn sĩnd n ka leb n leokdẽ wã,

¹⁷ taa maam tɩ mam me na n leoke. Mam me na n wilga m sẽn mi bũmb ninga.

¹⁸ Bala, mam tara bũmb wʋsg n dat n gome. Bũmb n be mam pʋgẽ wã n pẽdgd-ma.

¹⁹ Tɩ mam sũurã yaa wa reezẽ rãam sẽn wɩk ne ko-waoose, wa ko-wao-paal sẽn dat n pusi.

²⁰ Mam na n gomame la m paam n vʋʋse. Mam na n yaaga m noor n leoke.

²¹ Mam ka na n yãk ned n sõng ye, mam ka na n gom no-noom goam ye.

²² Bala, mam ka mi no-noom goam ye. Mam sã n gom no-noom goamã, m naandã na n sãama maam tao-tao.»