A. Zoobe 31 - WẼNNAAM SEBRE 2014

A Zoob wilgda a pʋ-peelem

¹ Mam dag n maana kaool ne m ninã, tɩ m kõn ges pa-kul ne ratem wẽng ye.

² Sã n ka rẽ, yaa pʋɩ-bʋg la Wẽnnaam na n zĩnd yĩngr n kõ maam? Pãng-Soabã na n zĩnda saasẽ n kõ-m bõe?

³ Sãoong ka nin-wẽns yĩng la? La toog ka tʋʋm-wẽns maandbã yĩng la?

⁴ Wẽnnaam dag n ka ne mam yel-manesmã sɩda? Bãmb ka mi mam nao-yakmã fãa sõor sɩda?

⁵ Rẽ yĩnga, mam yaga zĩrẽ la? Rẽ yĩnga, mam dɩka zãmb sor sɩda?

⁶ Bɩ Wẽnnaam mak maam ne zɩslem makdg sẽn zemse, la b na n mikame tɩ mam tara burkĩndi.

⁷ Mam sã n bʋdg n basa sɩdã sore, mam sũurã ratem sã n tũu mam ninã gesgo, la mam nusã sã n maana sẽn yaa dẽgdo,

⁸ bɩ m bʋd tɩ ned a to wa kẽeb n dɩ. Bɩ b võ m koodã m sẽn bʋdã fãa.

⁹ Mam yamã sã n kẽe m yak paga, tɩ mam soond a zak noor n gũud-a,

¹⁰ bɩ mam pagã wer n moe ned a to, la bɩ raop a taab peeg-a n yo ne.

¹¹ Bala, dag na n yɩẽ-la yel-beed la mam sẽn maanã. Tɩ bʋ-kaoodb tog n kao rẽ bʋʋdo.

¹² Yell a woto dag n na n yɩẽ-la wa bugum sẽn na n sãam maam zãnga. La a rɩ m sẽn so wã fãa zãnga.

¹³ Mam sã n dag n maanã m yem-daoog bɩ m yem-poak pãng b sẽn wa n tar yell ne maam wakate, n ka kõ-b b sẽn tog n paame,

¹⁴ Wẽnnaam sã n wa yiki, mam na n maana a wãna? Bãmb sã n sok maam, mam na n leokame tɩ bõe?

¹⁵ Yaa sẽn naan-a maam m ma pʋgẽ wã n naan m yembsã me. Yaa Wẽnnaam-yɛngã bal n naan tõnd d ma pʋgẽ.

¹⁶ Naong rãmb ka bõos maam tɩ m mong-b ye, la pʋg-kõap ka gũ mam sõngr n kong ye.

¹⁷ Mam ka rɩ m dɩɩb n mong kɩɩb ye.

¹⁸ Bala, hal mam yãadem tɛka, kɩɩbã bɩɩ mam nengẽ wa a sẽn be ne-a ba. Hal mam rogem wakate, mam wilga pʋg-kõor so-sõngo.

¹⁹ Mam zoe n yãnda naong soab sẽn ka tar fuugu, wall nimbãan-ned sẽn ka tar fu-goabga,

²⁰ tɩ mam ka kõ a fuug sẽn wʋg ne m piis kõbd t'a wɩng a yĩng la a ning-m bark sɩda?

²¹ Mam sã n namsa kɩɩba, mam sẽn mi tɩ bʋ-kaoodbã bee mam poorẽ yĩnga,

²² bɩ m bãokã sok tɩ m kangã lʋɩ n kao!

²³ Bala, mam dag n zoeta sãoong ning sẽn yit-a Wẽnnaam nengẽ wã. La mam ka tõe n maan baa fɩ bãmb naamã taoor ye.

²⁴ Mam sã n dag n teegẽ-la m sãnemã, mam sã n dag n yeelẽ lame tɩ m tẽeb bee ne m sãnemã,

²⁵ bɩ mam sã n dag n maanẽ-la sũ-noog mam paoongã sẽn yaa wʋsg yĩnga, arzɛk ning mam sẽn tʋm n paama pʋgẽ,

²⁶ wall mam sã n dag n gesẽ wĩndgã ne a vẽenemã, la m ges kiuugã sẽn kẽnd ne a ziirã,

²⁷ mam sã n dag n sak makr m sũurã pʋgẽ n waoog-ba, la m nug sã n dag n gãd-b lame n moke,

²⁸ bõn-kãng rag n na n yɩẽ-la kongr bʋ-kaoodã sẽn tog n sɩbge, la mam dag n na n kɩɩsẽ-la Wẽnnaam sẽn be yĩngrã.

²⁹ Maana sũ-noog m bɛ sẽn paam toog yĩng bɩ? Mam kɩdma yell sẽn paam yẽnda yĩng bɩ?

³⁰ Mam yaool n dag n zɩ n sak tɩ m noor maan yel-wẽnde ye. Mam zɩ n yaag m noor n kãab m bɛ wẽng n dat t'a ki ye.

³¹ M zakã rãmb dag n yetame: «Ãnda soab la a ka kɩt t'a wãb nemd zakẽ ka n tɩge?»

³² Mam ka tol n bas sãan t'a gãand yɩnga, la m pakda m zak noor tɩ so-toagd kẽ.

³³ Mam zɩ n lud m wẽng wa ninsaalb a taabã sẽn mi n maandẽ wã ye. Mam ka solg m kongrã m sũur pʋgẽ,

³⁴ mam sẽn zoet neb wʋsgã goam yĩng ye. Mam ka zoe buud paoogr n sĩnd n ka yi m zakã pʋgẽ ye.

³⁵ Ad m yaoolem koɛɛga. Kato! Ãnda n na n kelg maam? Bɩ Pãng-Soabã leok maam! N wilg sẽn dõt-b maamã sẽn gʋls sebr n sõdg yɛl ninsã.

³⁶ Woto, mam na n palg-a-la m bãok wa fuugu, la m fõgn-a wa pugla.

³⁷ Mam na n wilga Wẽnnaam m yel-manesmã fãa. Mam na n kolga bãmb wa naaba.

³⁸ Mam pʋʋgã sã n kelem n yeel tɩ m maand-a-la wẽnga, la a kaalem me sã n yãbe,

³⁹ la m sã n dɩ pʋʋgã bõn-koaadlã n yaool n ka yao pʋʋgã ligdi, n kɩt t'a soabã tẽeb sɛ,

⁴⁰ bɩ pʋʋgã tõdg ki womb n yi gõose, la bɩ a tõdg baning wekre n wek nadense. A Zoob goamã baoosgo.