A. Zoobe 30 - WẼNNAAM SEBRE 2014

A Zoob yãba a nimbãanegã yĩnga

¹ La moasã, kom-bõoneg yaanda maam n laadẽ. Pĩnda mam yaool n dag n ka get b ba rãmbã wa neb sẽn zem baasã sẽn gũud mam piisã ye.

² Bõe pʋgẽ la bãmb tõe n naf maam? Bãmb ka leb n tar pãng ye.

³ Naong ne kom kɩtame tɩ b faage. Bãmb tuu zĩ-pɛɛl ne yʋngo, n be namsg pʋgẽ n baood dɩɩbo.

⁴ Bãmb dag n võoda weoogã mood sẽn be tuudã seesã, la b rag n ka tar dɩɩb n dɩtẽ tɩ sã n ka vidb ye.

⁵ B rag n digda bãmb n yiisd nebã sʋka, la b rag n kaasda bãmb wa b sẽn digd wagda.

⁶ Bãmb tɩ bee tãms sẽgsẽ ko-soodã pʋse. Bãmb tɩ bee tãms bogdẽ la pĩis pʋse.

⁷ Bãmb kẽnda tuudã sʋk n kelemdẽ, la b samd taab gõosã tẽngre.

⁸ Bãmb yaa nin-yood sẽn ka tar yʋʋr ye. B rig-b lame n yiis tẽngã pʋgẽ.

⁹ La moasã, yaa maam n lebg b yɩɩle. Mam lebga yel-bũnd ne bãmba.

¹⁰ Bãmb geta maam wa yel-beedo, n zãagd b mens ne maam. Bãmb tʋbsda mam nenga kolkood tɩ b toor kaẽ ye.

¹¹ Bala, Wẽnnaam yolsa mam tãpã n gãneg-m tẽnga. La moasã, nin-kãens ka leb n gũusd b mens ne maam ye.

¹² Nin-yoodã yika mam dɩtg n tusd maam. Bãmb tukda sãoong sor n tat maam n dat n sãam maam.

¹³ Bãmb gɩta m sor n dat n sãam maam. La b ka baood ned sõngr ye.

¹⁴ Bãmb zoet n wata wa b tũuda lalg sẽn wedg n na n kẽ, n tusd taab a tãndã zugu.

¹⁵ Pelen-yɩk wẽnemd n zomba maam. B yiisa m waoogrã tɩ lebg wa sobg n dɩk-a. Mam sũ-noogã looga wa sawaodgo.

¹⁶ La moasã, mam vɩɩmã sɛt n dabdame, tood daar n paam maam.

¹⁷ Yʋngo, toog tara maam, m kõabã zabdame. Toog zabda maam n ka basdẽ ye.

¹⁸ Wẽnnaam gãda m fuugã kokor n sẽbg maam

¹⁹ bãmb luba maam begd pʋgẽ. Mam yaa wa wubsg ne tompeglem.

²⁰ Wẽnnaam, mam boond-y lame tɩ y wa sõng-ma, la y ka leokd ye. Mam sã n pʋʋs yãmba, y ka kelgd-m ye.

²¹ Yãmb lebga nin-toaag ne maam. Yãmb namsda maam ne y nugã pãn-kãsengã.

²² Yãmb kɩtame tɩ sobg rɩk maam n zẽk yĩngr n looge. Yãmb kɩtame tɩ y saaga na n ni n boog-ma.

²³ N-yẽe! Mam miime tɩ yãmb talla maam n taas kɩɩm-kulgu, zĩig ning nin-vɩɩsã fãa sẽn na n seg taabã.

²⁴ Ned sẽn na n sãam ka tẽegd a nug n kot sõngr sɩda? Ned sã n be toog pʋga, a ka bõosd sõngr sɩda?

²⁵ Mam ka yãb neb nins sẽn be namsg pʋgẽ wã sɩda? Nimbãan-ned nimbãaneg ka yõk maam sɩda?

²⁶ Mam dag n baooda sũ-noogo, la m paama sũ-sãanga. Mam dag n gũuda vẽenem la yaa lik la m paam yã.

²⁷ Mam sũur sãama hal wʋsgo. La sũ-sãams daar n paam maam.

²⁸ Mam lebgda sablga, la ka wĩndg n yõog-m ye. Mam yikda kʋʋng sʋk n kot sõngre.

²⁹ Mam lebga we-baas saam-biiga, naneend n lebg mam tũud-n-taase.

³⁰ Mam gãongã lebga sablg n fʋkdẽ. Mam kõabã wɩnga wʋsgo.

³¹ Mam kʋndã lebga sũ-sãang yʋʋm-teoogo, la m wɩɩgã me lebga yãbr yʋʋm-teoogo.