A. Zoobe 3 - WẼNNAAM SEBRE 2014

A ZOOB NE A ZO-RÃMBÃ SÕASGA A Zoob kãaba a sẽn dog daar ningã

¹ Rẽ poore, a Zoob rɩka koɛɛg n kãab a rogmã daare.

² A Zoob yeelame yaa:

³ «Wẽnd na sãam mam dogmã daare, la bɩ yʋng ning b sẽn yeel tɩ: ‹B roga bi-ribla!›

⁴ Bɩ ra-kãng yɩ lik bida. Bɩ Wẽnnaam da zĩnd yĩngr n tẽeg a yell ye, la bɩ vẽenem da leb n yãg a zug ye!»

⁵ Bɩ lik la kũum lik bida soog m dogmã daare, bɩ sawat kell n lud yẽnda, bɩ wĩndg lebg lik bida n kẽes-a rabeem!

⁶ Bɩ lik bida soog yʋn-kãnga! Bɩ a ra naag yʋʋmdã yʋnd a taabã n maan sũ-noog ye. Bɩ b ra sõd-a n naag kitã ray a taabã ye!

⁷ N-yẽe! Bɩ rogem da tol n zĩnd yʋng kãng ye, bɩ sũ-noog kilsg rãamd ra zĩnd a pʋg ye!

⁸ Bɩ neb nins sẽn kãabd ray wẽngã, la sẽn mi-b tɩ nek piryãongã kãab-a wẽnga!

⁹ Bɩ a tõd-beoogã ãds ra tol n puk ye! Bɩ a bao vẽenem n da tol n paam-a ye! Bɩ a ra tol n yãnd beoogã vẽegr ye!

¹⁰ Yaa yẽnda sẽn ka gɩdg pʋg ning sẽn dog maamã yĩnga, yaa yẽnda sẽn ka solg maam ne toogã yĩnga.

¹¹ Bõe yĩng tɩ mam ka ki m ma pʋgẽ? Bõe yĩng tɩ mam ka wẽneg n ki m sẽn wa n yi m ma pʋgẽ wã wakate?

¹² Bõe tɩ b sagl maam b naoẽ? Bõe yĩng tɩ m ma sak n yẽsem maam?

¹³ Woto tɩ mam dag n gãeẽ lame, mam dag n beẽ-la vɩ-bãan pʋga, mam dag n na n gõeẽ lame. Dẽ, mam dag n na n vʋʋsdẽ-la

¹⁴ ne rĩm-dãmba, la ne dũniyã nin-kãsems nins sẽn lebs n met b mens raboodã,

¹⁵ mam dag n na n vʋʋsdẽ-la ne nanambs nins sẽn dag n tar-b sãnem tɩ b rot pid ne wanzuri wã.

¹⁶ Wall mam sã n dag n dogẽ kɩɩmde, mam dag n ka n na n tol n beẽ ye. La m dag n na n yɩẽ-la wa kamb nins sẽn ka tol n dogã.

¹⁷ Beenẽ, nin-wẽnsã basda b maoorã, neb nins sẽn yɛ n ka leb n tar pãngã paamda vʋʋsg beenẽ.

¹⁸ Bi-beesã fãa me vɩɩ ne bãane, la b ka leb n wʋmd b namsdbã koees ye.

¹⁹ Nin-bãooneg ne nin-kãsems fãa bee beenẽ, yamb paama a meng ne a soaalã.

²⁰ Bõe yĩng tɩ Wẽnnaam bas tɩ sẽn namsdb rãmbã rogdẽ, la b kõt sẽn be-b toog pʋgẽ wã vɩɩm?

²¹ Bãmb gũuda kũum t'a ka watẽ ye, b baooda kũum n yɩɩd arzegse.

²² Bãmb sũur noomẽ-la wʋsg b sã n wa rɩk bãmb n loogdẽ, la sẽn kõt-b sũ-noog yaa b sẽn paam yaoogo.

²³ M yaa ned sẽn ka leb n mi a sẽn dabdẽ ye, wa ned Wẽnnaam sẽn wẽ yãgr n gũbg-ma?

²⁴ Bala, sidgrã n lebg m dɩɩbo, mam wõosgã saagda wa koom.

²⁵ Mam sẽn zoet bũmb ningã n paam maam. Bũmb ning sẽn kõt maam dabeemã n paam maam.

²⁶ Mam ka leb n tar laafɩ, m ka tar yam-gãnega, m ka tar vʋʋsgo, yaa toog bal n tar maam.