A. Zoobe 27 - WẼNNAAM SEBRE 2014

A Zoob leb n gomame

¹ A Zoob leb n togsa a sũur koɛɛg n yeele:

² «M wẽenda ne Wẽnnaam sẽn vɩ wã sẽn mong-a maam bʋʋmã, pãng soab ning sẽn kõ-a maam sũ-toogã,

³ tɩ mam sã n be tẽng zug n vʋʋsd ne yõore, tɩ vʋʋsem ning Wẽnnaam sẽn kõ maamã sã n ket n yit mam yõ-bogdẽ wã,

⁴ mam noor kõn tol n gom belgr goamã, la mam zelemd kõn tol n yag zĩrẽ ye.

⁵ Mam ka na n tol n kõ yãmb bʋʋm ye! Hal n tãag mam kũum, mam kõn tol n bas m burkĩndã ye.

⁶ Mam na n gãda m tɩrlmã kãenkãe n ka bas ye. Mam sũ-bãngrã kõn mong maam bʋʋm mam vɩɩmã daar baa a yembr pʋg ye.

⁷ Bɩ b rol mam bɛyã wa b sẽn dond nin-wẽnga, la b rol m zabd-n-taagã wa b sẽn dond ka-tɩrlem soaba!

⁸ Bala, Wẽnnaam sã n deeg ned sẽn yaa nin-wẽng vɩɩm, bõe saagr la yẽnda leb n tarẽ?

⁹ Toog sã n paam-a, Wẽnnaam wʋmda a kelemsã bɩ?

¹⁰ Yẽnda maanda sũ-noog ne Pãng-Soabã n pʋʋsd bãmb daar fãa bɩ?

¹¹ Mam na n wilga yãmb Wẽnnaam pãng zãmsgo. Mam ka na n solg yãmb bũmb nins Pãng-Soabã sẽn dat n maanã ye.

¹² La gese, yãmb fãa yãnd-a lame. Yaa bõe tɩ y gomd gom-vɩɩd a woto?

¹³ Ad bũmb ning Wẽnnaam sẽn bĩng nin-wẽng yĩngã. Ad pʋɩɩr ning Pãng-Soabã sẽn na n kõ nin-toaag yĩnga:

¹⁴ Yẽnda sã n dog kom-dibli wʋsgo, b na n paa tãpẽ. La b yagensã ka na n paam dɩɩb tɩ sek-b ye.

¹⁵ Bãmb neb nins sẽn na n põsã, bã-loangdg n na n kʋ-ba. La b pʋg-kõapã ka na n tõog n yãb b yĩng ye.

¹⁶ Baa yẽnda sã n paam wanzuri wa tẽng tom, la a paam fut wa tãndo,

¹⁷ yaa nin-tɩrsã n na n yeelg futã, la yaa bʋʋm dãmbã n na wʋk a wanzuri wã n sooge.

¹⁸ Yẽnda mee a rogã wa mogdo sẽn maandã la wa pʋʋg gũud sẽn maan a sẽoko.

¹⁹ Yẽnda kẽeda gãag n yaa arzɛk soaba, n wa nek n mik t'a arzegsã fãa menemame.

²⁰ Rabeem-kaseng na n yõka yẽnda wa ko-zoetem. A na n ling-a-la wa yʋng sob-kãsenga.

²¹ Yaang sobg na n dɩk-a lame n looge. A na n võoga yẽnda ne pãng n yiis a zĩigẽ wã.

²² B tãooda yẽnda ne pɛɛm n ka zoet a nimbãaneg ye. La rẽndame tɩ yẽnda mao n zoe n põse.

²³ B wẽeda nug-pogs yẽnda sãoongã yĩnga, la yẽnda sẽn beẽ fãa, b fɩɩnda ne sũ-noogo.»