A. Zoobe 24 - WẼNNAAM SEBRE 2014

Zamaanã neb yel-kɛga

¹ Bõe yĩng tɩ Pãng-Soabã ka yãk bʋʋd wakate? Bõe yĩng tɩ bãmb nebã ka mi a daarã?

² Nin-wẽns sersda pʋt todse, la b kãagd neb a taab rũms n wãbendẽ.

³ Bãmb deesda kɩɩbs bõens ne pãnga, la b reegd pʋg-kõor naaf n tɩgd gãnegd samd yĩnga.

⁴ Bãmb digda naong rãmb n yiisd sor zugu. Bãmb weoogda tẽngã nimbãan-dãmb tɩ b soondedẽ.

⁵ Gese, bãmb sãta beoog n kẽnd we-raoogã pʋgẽ wa we-bõens n baood rɩɩb n na n paam n dɩ la yaa tẽn-nabd-koɛɛngã pʋg la b baood rɩɩb n na n tɩ kõ b kamba.

⁶ Bãmb wʋkda yamd b sẽn bas pʋt pʋsẽ. La bãmb yãgsda tɩ-biis sẽn ket nin-wẽns pʋt pʋsẽ.

⁷ Yʋngo, bãmb gãee bɛɛla. Bãmb ka tar fu-gobs n na n pil waood wakat ye.

⁸ Saag pãbda bãmb tãms zutu. Zĩ-kẽedg kaalem yĩnga, bãmb tɩ soondeda pĩisã seesẽ.

⁹ B fãsgda kɩɩb a ma bĩisrẽ ne pãnga. Bãmb deesda naong soab bũmb n gãneg a samd yĩnga.

¹⁰ Bãmb kɩtdame tɩ naong rãmb kẽnd bɛɛl n ka tar fut ye. La b kɩtdẽ tɩ b tʋkd ka-gĩn tɩ kom tar-ba.

¹¹ La b kɩtdẽ tɩ b be yãg pʋsẽ n wõt oliiv kaam, la b wẽkd reezẽ reezẽ wẽkr koglgẽ, tɩ ko-yũud yaool n tar-ba.

¹² B wʋmda neb sẽn dat n ki wõosg tẽngã pʋgẽ. Sẽn pogl-b rãmbã wiisg rãamd zẽkdame, la Wẽnnaam ka kelgd bãmb pʋʋsgã ye!

¹³ Nin-wẽns n be beenẽ n kɩɩsd vẽenemã. Bãmb ka bãng vẽenemã soay ye. La bãmb ka tũ a so-bugsã zut ye.

¹⁴ Nin-kʋʋd yikda tõd-beoogo, n kẽng n tɩ kʋ naong soab ne nimbãan-neda. La yʋngo, yẽnda wẽnda wagdre.

¹⁵ Nin-yoaad gũuda zĩ-sobdo, la a tagsdẽ tɩ ned ka na n yãnd-a ye. Yẽnda rɩkda peend n pil a nenga.

¹⁶ Yaa lik-bida wã pʋg la wagda wã pood rotã. La wĩntoogo, bãmb sora b rotẽ. Bãmb ka mi vẽenem ye.

¹⁷ Nin-bãmbã fãa geta be-vẽegr wa kũum n wate. Bala, bãmb minima lik yɛla.

¹⁸ B yetame: Koom na n peega nin-wẽng looge t'a tẽngã lebg kãab-wẽnga. Nebã ka leb n dabd nin-bãmb reezẽ pʋtẽ ye.

¹⁹ War ne tʋʋlg sẽn kʋɩɩsd koom to-to wã, kũum me na n looga ne yel-wẽnã soab a woto.

²⁰ Bãmb ma yĩmda b yelle, la zũnzũy rɩt-b lame. B ka tol n leb n tẽeg b yell ye. Nin-wẽng pãng sãama wa tɩɩga.

²¹ Bãmb fãada pʋg-kiir sẽn ka tar biiga. Bãmb ka maand pʋg-kõap neer ye.

²² Baoosgo, Wẽnnaam pãngã sẽn kɩtd tɩ nin-toosã menema yikame, la nin-bãmb ka tõe n leb n vɩɩmd ye.

²³ Wẽnnaam kõta bãmb vɩ-bãane, la bãmb dag n teega bõn-kãnga, la Wẽnnaam ket n geta bãmb tʋʋmã.

²⁴ Bãmb paamda zẽkr wakat bilf pʋgẽ, la bãmb ka leb n be ye. Bãmb lʋɩtame, bãmb daarã tata a tɛk wa nebã fãa. Bãmb kũkd n lʋɩɩ wa b sẽn kẽbg ka-zugu.

²⁵ Sã n ka woto, ãndã n tõe n kɩɩs maam? Ãnda n tõe tɩ mam goamã yɩ zaalem?