A. Zoobe 23 - WẼNNAAM SEBRE 2014

A Zoob leoka a Elifaaze

¹ A Zoob leokame n yeel yaa:

² «Rũndã yɛsa, b geta mam yẽgengã wa kɩɩsgo. Tɩ mam pĩ m noor n ka rat n wõos ye.

³ Mam sã n dag n miẽ bãmb sẽn beẽ, la mam sã n dag n tõe n kẽng zĩig ning Wẽnnaam sẽn zaoẽ wã,

⁴ mam dag n na n togsẽ-b-la m yellã fãa, la m paam goam wʋsg n gom ne-ba.

⁵ Mam na n bãngẽ-la b sẽn na n leok maam to-to, la mam dag n na n wʋmẽ-la b sẽn na n yeel maam bũmb ningã võore!

⁶ Wẽnnaam na n zaba ne maam ne b pãngã fãa bɩ? Ayo! Bãmb na n kelga maam neere.

⁷ Beenẽ, nin-tɩrg tõe n goma ne bãmba, la m bʋ-kaoodã na n kõo maam bʋʋm.

⁸ Mam sã n kẽng yaang n tɩ bao bãmba, m ka yãt-b ye. Mam kẽnga nin-taoor n tɩ bao bãmb n konge.

⁹ Daarninga b bee goabg n tʋmdẽ tɩ mam ka yãnd-b ye, wall b solga rɩtg tɩ mam ka tõe n yãnd-b ye.

¹⁰ Bãmb yaool n mii mam sẽn dɩk sor ninga. Bãmb sã n mak maam n sɛ waa, mam na n yɩɩ yɩlemd wa sãnem halaale.

¹¹ Mam naoã tũuda bãmb naoã bogdo. Mam kẽnda bãmb sor zug n ka bʋdgdẽ ye.

¹² Mam ka kɩɩs tõod nins sẽn yi bãmb noorẽ wã ye. Mam sulga m meng n sak bãmb noorã sẽn togs goam ninsã.

¹³ La Wẽnnaam sã n yãk b yam, ãndã n tõe n kɩt tɩ b teke? Bũmb ning bãmb sẽn dat n maanã, b maandame.

¹⁴ Bãmb na n pidsa yam yãkr ning bãmb sẽn yãk mam yĩngã. La bãmb na n leb paana yam yãkr a taaba.

¹⁵ Yaa woto n kɩt tɩ rabeem kãseng tar maam ne bãmb segbo. Mam sã n tags bõn-kãens fãa yelle, m pɛlengã yɩkdame.

¹⁶ Wẽnnaam kɩtame tɩ m sũ-keelem sɛ. Pãng-Soabã kẽesda maam dabeem kãsenga.

¹⁷ La ka Lik-bida wã n na n tõog n kɩt tɩ mam sĩnd m noor ye. Baa ne lik-bida wã sẽn lud maamã ka tõog ye.»